Màndiŋ ma 10:8-30

⁸Na doomi Aaróona sarxalkat yi di wal liit yi, te mu doon dogal bu leen saxal dàkk, ci seen maasoo maas.

⁹«Bu loolu wéyee, bu ngeen dee xare ci seenum réew, ak noon bu leen songsi, nangeen riiral liit yi riir mu xumb, su boobaa dees na leen bàyyi xel fa seen kanam Yàlla Aji Sax ji, ba wallu leen ak seeni noon.

¹⁰Seen bési mbég itam, muy seen bési màggal, di seen ndoortel weer, nangeen ciy riiral liit yi riir mu xumb, yéenee ko seen saraxi rendi-dóomal, ak seen saraxi cant ci biir jàmm. Riirum liit yooyu mooy doon seen baaxantal fa seen kanam Yàlla. Maay seen Yàlla, Aji Sax ji.»

¹¹Ca ñaareelu at ma, gannaaw ba bànni Israyil génnee Misra, ca ñaareelu weer wa, keroog ñaar fukkeelu fanam, ca la niir wa bàyyikoo fa tiim màkkaanu seedes kóllëre ga.

¹²Bànni Israyil daldi sumb seen yooni tukki ya, bàyyikoo màndiŋu Sinayi. Ci kaw loolu niir wa daleji ca màndiŋu Paran.

¹³Booba lañu jëkka fabu ci kàddug Aji Sax ji, Musaa jottli.

¹⁴Raayab dalu Yudeen ña moo jëkka jóg, ànd aki gàngooram, njiital gàngooru Yuda di Nason doomu Aminadab,

¹⁵njiital gàngooru Isakareen ña di Netanel doomu Suwar,

¹⁶njiital gàngooru Sabuloneen ña di Elyab doomu Elon.

¹⁷Ci biir loolu ñu wékki jaamookaay ba, Gersoneen ñaak Merareen ñay gàddu jaamookaay ba daldi dem.

¹⁸Raayab dalu Rubeneen ña jóg ànd aki gàngooram, topp ca, njiital gàngooru Rubeneen ña di Elisur doomu Sedeyur,

¹⁹njiital gàngooru Cimyoneen ña di Selumyel doomu Surisadaay,

²⁰njiital gàngooru Gàddeen ña di Elyasaf doomu Dewel.

²¹Gannaaw loolu Keyateen ñay gàddu yëf yu sell ya, ñoo fabu, topp ca. Bala ñoo àgg fa ñuy dalewaat nag, day fekk jaamookaay ba sampewaat.

²²Ci kaw loolu raayab dalu Efraymeen ña jóg, ànd ak seeni gàngoor, topp ca, njiital gàngooru Efraymeen ña di Elisama doomu Amiyut,

²³njiital gàngooru Manaseen ña di Gamalyel doomu Pedasur,

²⁴njiital gàngooru Beñamineen ña di Abidan doomu Gidoni.

²⁵Ba mu ko defee raayab dalu Daneen ña doora jóg, topp ca gannaaw kurél yépp, ànd aki gàngooram, njiital gàngooru Daneen ña di Ayeser doomu Amisadaay,

²⁶njiital gàngooru Asereen ña di Pagyel doomu Okkran,

²⁷njiital gàngooru Neftaleen ña di Ayra doomu Enan.

²⁸Noonu la bànni Israyil topplantee, ànd ak seeni gàngoor, tegu ca yoon wa.

²⁹Ba loolu amee Musaa wax ak Obab doomu Ruwel waa Majan ba, baayu soxnaam, ne ko: «Nu ngi nii jëm fa nu Aji Sax ji wax ne moom lanuy jox. Kaay nu ànd, dem, nu baaxe la, ndax Aji Sax ji moo digee baaxe Israyil.»

³⁰Mu ne ko: «Déedéet, duma dem, samam réew kay laa jëm, ca saay bokk.»