Luuka 8:3-55

³na Zhuwaana muukha wa Kuuza, nsatoro wa Herooti, Suzaana na aakha akinoko aari ontthanttaaye Yinsa na vitthu zaya vamote na anakhiyoni awe.

⁴Phantte za waatta za miti aari otawo atthu enkeene oteela okutthanana Yinsa. Aphano ye khulupa nlikaniso mmote araka:

⁵“Aarivo namazala mmote aalawiiye ozala peewu zawe. Amwazaka, kinoko khukwela nshini wa tarikhi, khuluwatthiwa na khujiwa pi anyannyi.

⁶Peewu kinoko khukwela vahali aariivo mawe, khoottha ila khuuma mwaasa woohiivo maati.

⁷Peewu kinoko khukwela vanyiiwa, khuwula vamote na nyiiwa, khurapeliwa pi nyiiwa khufwa.

⁸Ila peewu kinoko khukwela vanshaka wooshapweya, khuwula khwiima mishumo miiya wakhula peewu.” Alupiyeevo toole, ye khukhuwelela araka: “Ariina mashiilo ti asiile!”

⁹Anakhiyoni awe khumuuzela maana a nlikaniso aya opule.

¹⁰Yinsa khuwaajipu yoori: “Mweeyo mwenkhiwa ojuwa zootikinisa zoofwalume wa Nnyizinku, ila akinoko anuuzaniwa nlikaniso yoori oonaka ahisala ajuwa, asiilaka ehisala eweeleya.”

¹¹Maana a nlikaniso opu pi toono: peewu eti enthoonyeza nttakhuzi la Nnyizinku.

¹²Peewu zaakweliiye ntarikhi, zinlikanisaniwa atthu apale ansiilaaye nttakhuzi la Nnyizinku ila sheethwani khulazavo varoho vaya nttakhuzi ntthile yoori ahaamini apattha wuusurukha.

¹³Peewu epi zaakweliiye vamawe, zinlikanisaniwa atthu apale ansiilaaye nttakhuzi la Nnyizinku khupokherela na furaha. Ila mwaasa woohiina mitathaari, wakathi vattitthiiru nawootootiwa ti sheethwani anlikha waamini waya.

¹⁴Peewu epi zaakweliiye vanyiiwa, zinlikanisaniwa atthu apale ansiilaaye nttakhuzi la Nnyizinku, ila mwaasa wooshukulikhela opattha tuvela na haali za meekhazi, yo waamini waya vattiitthi-vattiitthi onzima, ahifiyelelaka wiima mishumo.

¹⁵Peewu epi zaakweliiye vanshaka wooshapweya, zinlikanisaniwa atthu apale ansiilaaye nttakhuzi la Nnyizinku khuthokorela nroho mwaya khushututela na khwiiyana niiya, apo aniima mishumo zooshapweya.

¹⁶Khaavo ankhozaaye khantteya khufinikha na enyipo wala khupweha nlivuku. Entthiiwa vahali onooneyaavo yoori esala ewaamwasikhela apale anviraaye nnyupa.

¹⁷Khayiivo envithiwaaye ehinttelaaye osaruwela oje, zooshi epile za siiri enttela wiiya payana.

¹⁸Apho mwiyane ophoole wa nanna yoosiila, otule ariina ontta weekezeliwa, ila otule ahina hatha na etile anuupuwelelaaye wiiyana ontta onyakanyiwa.

¹⁹Mamaawe na attwiize Yinsa khulankha yoori amoone, ila khuhisala ewaheya mwaasa yoori aarivo atthu a waatta.

²⁰Khuuziwa Yinsa yoori: “Vaje apho atavo mamaawo na attwiizo.”

²¹Ye khuwaajipu araka: “Maama na attwiizaku pi apale ansiilaaye Nttakhuzi la Nnyizinku khushututela.”

²²Siikhu moote, Yinsa khuwooza anakhiyoni awe yoori: “Olawa neette phantte ya kaapu kinoko.” Khupakhira nkalawa khusala alawa.

²³Aphano eettaka olawa Yinsa khusala alala, khupuwa pheevo ya waatta kalawa khusala esaleela ozama.

²⁴Anakhiyoni apale khoova khusala anlansa Yinsa araka: “Mwanliimu, Mwanliimu nasaleela ozama!” Yinsa khulankha khunyamaza pheevo na mawipi, khupuwa nreke.

²⁵Nawiisha khuwoozela anakhiyoni awe yoori: “Waamini wenu ori vayi?” Yo khwiiya awoova na ooshanka khusala oozelana, araka: “Otu aya paani anrumaaye pheevo na mawipi khunshututela?”

²⁶Yinsa na anakhiyoni awe khulankha khulokhela Keraaza, kaapu ya Kalileya.

²⁷Wakathi Yinsa apakhuwiweevo nkalawa, khuta nlume mmote wa sitati ethiitile aariina masheethwani a waatta. Ye eekhaliye siikhu za waatta ahiwalaka kuwo na ahiikhalaka vaje, aari wiikhala mvilalo.

²⁸N'oomoona Yinsa khunyakula, khunkokhorela khukhuwa araka: “Onkitakhela-ni, Yinsa mwaana wa Nnyizinku Nwulu wa Pinkuuni? Safwatali ohikihukhumu.”

²⁹Ye aalupiye mattakhuzi apa mwaasa yoori Yinsa aarumiye onsaruwa masheethwani. Masheethwani apale eekhaliye siikhu za waatta mmwiili wa nlume otule. Na afukaniwaavo makwinjili khwinkhiwa atthu oomweekesela, eetta ottumulaka n'oothuuliwa pi masheethwani n'onlawana makuluttu.

³⁰Aphano Yinsa khumuuzela yoori: “Weeyo nzina lawo o paani?” Ye khujipu yoori: “Miiyo nzina laka ki omathi,” mwaasa yoori ntthu otule aamweettiye masheethwani a waatta mmwiili mwawe.

³¹Masheethwani apale khusala anvekela Yinsa yoori ahiikarele khilintti.

³²Liphanko liwululene la kuluwe laari oshukisiwa vamwaako, masheethwani apale khunvekela ruhusa Yinsa yoori eette nkuluwe, ye khukhupalela.

³³Wakathi aliiyeemo masheethwani apale mmwiili wa nlume otule khweetta nkuluwe, aphano kuluwe khusala zitthira ziishukhela vantthatta khutupweela.

³⁴Apale aari oshukisaaye kuluwe epile nawoona vitthu epile zaarettikhaniyeezo, khutthira khulawa khulupa hapari epile nsitati mphule na miti mikinoko zaya.

³⁵Khulawa atthu a waatta olawa woona vitthu epile zaarettikhaniyeezo. Wakathi amwaattamiyeeyo Yinsa, khumoona nlume otule ansaruwiyeeyo masheethwani eekhaliye nshini wa moolu a Yinsa awaliye kuwo zawe na atthiiyemo akhili zawe, yo khwiiya awoova.

³⁶Apale ooniiyeeyo, khulawa khuwooza atthu nanna aavonisiweezo nlume otule.

³⁷Aphano atthu ooshi apale a nti opule wa Keraaza khunvekela Yinsa yoori aleemo mmuti mwaya mwaasa wa woova channu, Ye khuwela nkalawa khulaawo.

³⁸Nlume otule ansaruwiyeeyo masheethwani khusala anvekela Yinsa amuuzaka yoori anlikhe alawe vamote na-ye. Ila Yinsa khumuuza olawa araka:

³⁹“Orutele owawo wawooze atthu etile Nnyizinku ooretteliyeeyo.” Nlume otule khulankha khusala alawa owawe alaleyaka sitati yooshi etile aaretteliweeyo ti Yinsa.

⁴⁰Wakathi Yinsa arutiyeevo, khuntti khuluyeene ya atthu ooshi atthaapale aari onwejaaye khumpokherela na furaha.

⁴¹Aphano mwinyi mmote aari wiitthiwaaye Yayiiru namalokozela wa nyuupa yoosifwiwamo Nnyizinku, khuta khunkokhorela Yinsa nshini wa moolu awe anvekelaka yoori alawe owawe,

⁴²mwaasa yoori mwanawe aariina mmote paasi wa nyaakha khumi na miwiri aari osaleela ofwa. Yinsa alawaka, atthu khusala aphunyana-phunyana.

⁴³Attaaphale khutavo muukha aariina nyaakha khumi na miwiri ari nlwele, yaari omwiittikhaaye taamu wakhula siikhu. Khuharipu nzurukhu awe wooshi aariina nkatthi wa akulukhala, ila khuhiivo mmote aawahiyeeyo onvonisa.

⁴⁴Ye khuta mpakha onyoko wa Yinsa khusapa ajapi yawe vattitthiiru, omuuta otthuupule khulikha wiittikha taamu etile.

⁴⁵Yinsa khuuzela yoori: “Paani akisapiyeeyo?” Atthu ooshi khusala akhana, Pheeturu khulupa yoori: “Mbwana, atthu pi a waatta pa yo anuuphunyaaye na wuusukhuma!”

⁴⁶Ila Yinsa khusala avira akhanyarelaka yoori: “Nna akisapiyeeyo keetta woona okisaruwiye owahi waka.”

⁴⁷Aphano muukha otule ooniyeevo yoori khaari owahi ojivitha, khuta eettaka othukumela khunkokhorela Yinsa vakatthi wa atthu ooshi khusala alupa wa nanna ansapiyeezo na avoniyeezo nasaapiru.

⁴⁸Attaaphale Yinsa khumuuza yoori: “Mwanankha waamini wawo woovonisa! Olawe na heeri.”

⁴⁹Attakhulaka etthiipile Yinsa, khuta karumeya mmote wa vaje vawe Yayiiru khumuuza yoori: “Ohimwantipu Mbwana olawa vamote na-weyo, maana mwanawo aya afwa.”

⁵⁰Yinsa n'oosiila khumuuza Yayiiru yoori: “Ohoove, wiiyane amini, mwanawo ontta wiiya nkumi.”

⁵¹N'oofiya owawe Yayiiru, Yinsa khuhinlikhi hatha ntthu ovira nnyupa mphule, khuvira na Pheeturu, Yaahaya, Yaakhumpa, papaawe mwaana na mamaawe.

⁵²Atthu ooshi aasaliye vaje eettaka olila, Yinsa khuwooza yoori: “Mwihilile, otu khafweeni ontta olala.”

⁵³Yo khusala antheya Yinsa mwaasa wa ojuwa yoori afwa.

⁵⁴Ye khuntheteezela nkhono awe khumuuza yoori: “Mwaari, lankha!”

⁵⁵Rooho yawe khunrutela khulankha nasaapiru. Aphano Yinsa khumuuza papaawe yoori amwinkhe etthu-yoojiwa.