LUUKA 6:3-39

³Dhala Yesus thoḵ uni gwo mo ki: ’Kona um ki deŋ gwo ma Dawuu’d e mo ’taa? Ki a’di ’kosha ṯe/ mo tani a’di dhali uni gwansan kun nyaḵki ’ko ki a’di mo tani

⁴a’di cic̱ki gu’b ma Arumgimis mo dhali bu’th maa gi buŋ’kus ma Arumgimis mo dhali shwa a’di mo, a’di jin diki ta gwoŋḵan gom maa gom ’kwanin tiya mo hili jasi gom igasiis uni ishwa a’di uni ’cena mo be. Dhali a’di ki c̱i uni gwansan gun nyaḵki ’ko ki a’di mo be.

⁵Dhali a’di ki o uni gwo mo ki: Ya/ gi ’Kwani a’di ta Tap̱a ka cim ma pesu/ mo be.

⁶Dhali ka cim ma pesuŋ kamu/ mo tani ki a’di cic̱ki gu’b gi montul is buni mo tani dhali ṯor gwo mo tani wathiŋ kamu/ diki’d mmun jin ḵutha me’da bim poros piti guŋkuru/ mo.

⁷Dhali iman’kwar to dhali ’Kwani P̱arisiyiin timki a’di mo mmop̱ar e mo waḵki/ a’di midi wac̱a wac̱ ka cim ma pesu/ mo. Wakan ki uni mini ’taki gam bway mo mmo’ce’d a’di gwo ap̱o/ mo be.

⁸Hili a’di mishki gwom buni kun kuluma uni ibwa mo dhali a’di ki o wathi/ jin ḵutha me’d guŋkuru/ gwo mo ki: Yayu/ mo ma, dhali doshi imahan mo. Dhali a’di cu mis mo dhali dosh mmaṯṯaan mo be.

⁹Dhali Yesus ki o uni gwo mo ki: Aha/ doṯa um gwo mo, a’di diki ta gwoŋḵan ka cim ma pesu/ mmomii miim ’boro’d mo ’taa? walla mmomii tonthus mo? walla mmowoṯẖa/ woṯẖi kar ki e mo? walla mmo’ce’da ’ce’d sho’k mo?

¹⁰Dhali a’di ’karki uni ’baar mo ki e mo dhali o a’di gwo mo ki: Hethi me’d pini mo ma. Dhali a’di miiki a’di mo wakan dhali me’d piti ’borki’d mo be.

¹¹Hili uni ’tu’dkunu mo ka c̱inthar mo dhali uni o gwo ka rem ’kup̱ gom to jin mina uni ’taki miiya Yesus mo be.

¹²Dhali ka tee gwansan mo tani a’di yaki’d mo e moŋ’kuwosh mo dhali ’tho mo. Dhali ki mon’thinyi ’baar mo tani a’di rashki ’tho mo eya Arumgimis mo be.

¹³Dhali ki mo ta montee mo tani a’di yuḵki imanciḵ a’di gwo mo dhali kwany uni ’peni bwam uniŋ ’kume’d i’ce’dka su/ mo uni gun yuḵkina a’di gway ki uni gun dhunu ki she/ mo:

¹⁴Simaan jin yuḵa a’di gway ka Buṯerus mo, dhala Andaraawus jin ta’da kam piti mo, dhala Yakuub mo dhala Yohaan mo dhala P̱ilibbus mo dhala Barṯulamaawus mo

¹⁵dhala Maṯṯa mo dhala Ṯuuma mo dhala Yakuub jin ta ya/ ma Halp̱a mo, dhala Simaan a’di jin yuḵu gway ka El Ghayuur mo,

¹⁶dhala Yahuusa jin ta ya/ ma Yakuub mo dhala Yahuusa Isḵariyuuṯi mo a’di jin warki’d ka man’ciṯẖ a’di is ki gwo mo be.

¹⁷Dhali a’di thulki’d ka luŋgu’b mo nyaḵki uni mo dhali dosh e momba’da’d mo nyaḵka waambuhany ’kwani kun ciḵ a’di gwo mo dhali abuhany ’kwani ka ris caaca ’peni Pa Yahuudiyya mo dhali Pa Urushaliim mo dhali bampa/ kun ’kon e yana gap̱ gi Pan Sur mo dhali e Pan Saydaa/ mo. Uni p̱u’dkin mo mmociḵ gwo ’peni a’di mo ki uni minu wac̱ mo ’peni ’ba’th kun ’koshki uni mo be.

¹⁸Dhali uni gwansan kun ’kokunu mo mmoṯo’c bwa ka rum thus kun nyo/on mo tani uni wac̱kunu mo be.

¹⁹Dhali awaambuhany ’kwani ŋap̱ki a’di mo mmota a’di is ki me’d mo haali/ mom’bi’th yaki’d mo ’peni a’di mo dhali a’di wac̱ki uni ’baar mo be.

²⁰Dhali a’di ’de’kki em piti ki mis mo ap̱o/ imanciḵ a’di gwo mo dhali o gwo mo ki: Mom’bor mii gom um gun hatha’ko’d mo haali/ ’peŋkuman bampam bum jin tana um mo tani a’di ta ji ma Arumgimis mo be.

²¹Mom’bor mii gom um gun ’kosha ṯe/ shwane/ mo haali/ um minu kap̱ mo be. Mom’bor mii gom um gun gwokin mo shwane/ haali/ um mini p̱e’th mo be.

²²Mom’bor mii gom um ki ’kwani shi/i um i e mo dhali ki uni mini ḵwa’th um mo dhali waḵ um mo dhali ṯa’k gway bum mo me’d tonthus gom gway gi Ya/ gi ’Kwani mo.

²³’Kunyi bwa mo ma ka tee c̱aan mo dhali iiyi i mis mo gom bwam ’borga/ mo haali/ hili mo mo ma, adhan tom bum kun ish ḵumma/ mo tani uni ’kon mo e momis mo be, haali/ wakan miikina ibabam buni mo gom imanc̱i gwo ma Arumgimis kadhamo/ mo be.

²⁴Hili wayyi e um mo kun ta pa ki pa mo haali/ um bu’thki momalas bum mo.

²⁵Wayyi e um kun ’tu’du/ mo shwane/ haali/ um mina ṯe/ i’kosh mo. Wayyi e um mo kun p̱e’thkin mo shwane/ haali/ um mini ko mo ki kony jabu’th mo mmomiiya c̱inthar mo.

²⁶Wayyi e um mo, ka ris ’kwani ’baar mo mini o gwom ’boro’d gom um mo haali/ wakan miikina ibabam buni mo si’da/ gom imanc̱i gwonthus mo be.

²⁷Hili aha/ ona um gwo mo um gun ciḵ gwo mo ki: Eni uni gwansan kun ta ’kup̱ ki um mo ma. Miiyi ki ’bore/ gom uni gwansan kun shi/i um i e mo.

²⁸’Bori uni gwansan mii mo ma kun jee um mo. ’Thoyi gom uni gwansan kun sorki um mo ma.

²⁹E a’di jin dori /e mo e ’peshe/ mo tani ṯu’kki a’di ’pesheŋ kamu/ si’da/ mo, dhali ’peni a’di jin gu /e burrinyem p̱o/ mo tani dhalku/ ki non a’di ki burrinyem bwaman si’da/ mo.

³⁰C̱ika ris ’kwani ’baar mo ka ’deṯe/ ’deṯe/ to mo ma kun doṯki to ’peni /e mo dhali ’peni a’di jin ḵalki tom pini mo tani dhalku/ ki doṯ uni ka nyaŋ’ko’d mo doḵ/e.

³¹Dhali me’d jin ona bwa um mo jin mina ’kwani mii to ki ’bore/ gom um mo tani, miiyi a’di wakan si’da/ mo ma gom uni mo.

³²Waḵki/ um eni uni gwansan kun eni um mo tani um minu o gwo maŋ kata mo ’te/? Haali/ me’d uni gwansan kun miiki miinthus mo tani uni enki uni gwansan kun enki uni mo be.

³³Dhali waḵki/ um miin ki ’bore/ gom uni gwansan kun mii ki ’bore/ gom um mo tani um minu o gwo maŋ kata mo ’te/? Haali/ me’d imanmii miinthus mo uni mii a’di jin nyaḵka’d kan mo be.

³⁴Dhali waḵki/ um wan to e ki ’kwani gwansan mo tani ’peni uni kun tana uma ’teŋ kap̱e/ mo mmobu’th to mo tani um minu o gwo maŋ kata mo ’te/? Me’d imanmii miinthus mo uni wanki to e ki imanmii miinthus mo tani uni ki bu’th a’di jin nyaḵa she/ kan doḵ/e mo.

³⁵Hili eni uni gwansan kun ta ’kup̱ ki um mo ma dhali miiyi ki ’bore/ gom uni mo dhali wani to e mo mmo’koki c̱or toŋ kamu/ mmodoḵu/ um ka nyaŋ’ko’d mo, dhali tom bum kun ish ḵumma/ mini eḵa/ eḵ mo dhali um mini ta iya/ gi a’di jin Cayaa/ e ki Ca mo, haali/ a’di mii’d ki mo/en gom uni gwansan kun dar ga nynyc̱a/ mo dhali kun tana ham ’kus ka ham ’kus mo.

³⁶Wari ki imanmiimii mo ma, me’da Babam bum a’di ta’da manmiimii mo be.

³⁷Dhalku/ ki c̱iŋitha c̱iŋi’th mo ma dhali um minu ’koki c̱iŋi’th si’da/ mo. Dhalka waḵ ki waḵ mo ma dhali um minu ’koki waḵ mo be. Dhalki markin ’kwani ’pen mo ma dhali um minu dhal markin ’pen mo be.

³⁸C̱iyi to mo ma dhali a’di minu c̱i um mo be, tombar tom ’boro’d jin shomu is mo tani uni shekemkini monṯal ’de/ mo mmo’tu’d mo mmogac̱a ’cesh mo dhali uni minu dhu ’ko’da ’dup̱un bum mo. Haali/ to jin bara um mmoc̱i mo tani mini ta tom bum kun baru um ka nyaŋ’ko’d mo be.

³⁹A’di si’da/ ki ṯor uni gwo ki gwom ’bi’th/e mo mmo/o gwo mo ki: Mina wathiny ja’da/ mish sus wathiny ja’da/ mo ’taa? Mina uni su/ ’koki ṯa’k mo e bwany jis mo ’taa?