LUUKA 2:11-38

¹¹Haali/ ka tee yansan mo tani Amanwoṯẖ jin ta Tap̱a Ḵrisṯẖos a’di dho’thkunu mo gom um e Pan Dawuu’d mo be.

¹²Dhali ki jamas mii yan mo tani a’di mina umi nyiṯẖ a’di mo be. Um mini gama ŋa/ ’tamkunu is ki burrinye/ mo dhali mmo/isha kaḵ bip̱ mo be.

¹³Dhali ise/ iman’doyu gwon tiya ka ris ris ’peni momis nyaḵki ’ko ka man’doyu gwo mo be. Uni maŋana Arumgimis mo dhali o gwo mo ki:

¹⁴Monyca ma Arumgimis isi momis mo, dhali moŋḵu’th is e mony’cesh e bwaŋ ’kwani gun ’bora a’di bwa i is mo.

¹⁵Dhali ki iman’doyu gwo doḵkin mo ’peni uni imomis ka nyaŋ’ko’d mo tani imanhil ḵa’bal o gwo ka rem ’kup̱ ki: Dhalki ana iina mo shwane/ e Pam Beeṯlaham dhali p̱ar to yan e jin yayi’d jin ṯora Tap̱a ana mo.

¹⁶Dhali uni iikin mo ise/ tani gamkina Mariyam dhala Yuusup̱ dhali ara ŋa/ mmo/isha kaḵ bip̱ mo be.

¹⁷Dhali ki uni p̱arki a’di e mo tani uni ṯori gwo jin ciḵkina uni mo goma ’ci yan mo be.

¹⁸Dhala ris ’kwani gun ciḵki a’di mo tani meren ki gwo gwansan gun ona imanhil ḵa’bal uni mo be.

¹⁹Hila Mariyam a’di di’d mo mmodhu gwo gwansan mo mmokulum uni eya dum piti mo be.

²⁰Dhali imanhil ḵa’bal doḵkin ka nyaŋ’ko’d mo mmokara Arumgimis ki ca mo, dhali maŋki a’di mo goma ris to gun ciḵkina uni mo dhali kun mishkina uni mo me’d ji gi onu uni mo be.

²¹Dhali ki mo thimi’d mo ka cim pekwara mo tani ki a’di ’ciṯẖkunuwa munyjal yis piti mo tani a’di yerkunu gway ka Yesus mo, gway jin c̱ikin ma man’doyu gwo mo nṯwa/a/ ki a’di ’kokunu mo mmobwaa mo e bwa mo be.

²²Dhali ki mo p̱u’dki’d mo gom mondhelel is buni mo isi ki gwoŋḵan ma Musa jin c̱inu mo tani uni suski a’di mo e Pa Urushaliim mo mmoc̱i a’di ki Tap̱a mo

²³(me’d gwo jin ’kwarkunu mo e gwoŋḵan gi Tap̱a jin c̱inu mo ki: Aris uniŋ gwaṯẖ ka ’deṯe/ ’deṯe/ kun ḵa’dki bwan dho’th mo tani uni minu yuḵ gway ki uni kun dhelelin mo gom Tap̱a mo.)

²⁴Dhali uni suski a’di mo si’da/ mmomii to mmo’ciṯẖa/ basa ’cesh mo isi me’d gwo jin okina gwoŋḵan gi Tap̱a jin c̱inu mo ki bimbir gurko/ su/ walla gurko/ kun bap̱ani su/ mo be.

²⁵Dhali wathi/ diki’d mo e Pa Urushaliim jin yuḵu gway ka Simaan dhali wathi/ yan ta a’diŋ ḵar/e mo dhali ta a’diŋ gayiin mo a’di jin c̱orki momalas gi ’Kwani ma Israyiil mo dhali Shi/in Dheleladhelel diki’da po/ a’di mo be.

²⁶Dhali a’di ṯorkunu a’di eya tente/ mo ki Shi/in Dheleladhelel mo ki a’di midi ’taki diki wu mo nṯwa/a/ ki a’di diki p̱ar Tap̱a jin ta’da Ḵrisṯẖos e mo be.

²⁷Dhali a’di shi/inkunu mo ki Shi/in mo tani a’di p̱u’dki’d mo e gu’b gi mondheleladhelel mo. Dhali ki com dhali kum suskina ’ci jin ta’da Yesus mo tani mmomii a’di me’d isi mii gi gwoŋḵan jin c̱inu mo tani

²⁸a’di bu’th a’di mo ’ko’da bim piti mo dhali ’bora Arumgimis bwa i is mo dhali o gwo mo ki:

²⁹Tap̱a, dhalki c̱iŋkinam pini ya’d mo ki moŋḵu’th is mo ma, isi ki gwom pini mo,

³⁰haali/ em pem p̱arki bway gi mowoṯẖ pini e mo

³¹a’di jin thosonkina /e mo e buŋ’kus gi ’kwani ’baar mo,

³²moŋkush yan mmo’cee eya tente/ gom ’kwani kun ’koki ta ’Kwani Yahuuda/ mo dhali gom monyca gom ’Kwanim pini ma Israyiil mo.

³³Dhali com dhali kum uni merkin mo gom gwo yan jin okina a’di gom a’di mo.

³⁴Dhala Simaan ’bor uni mii mo dhali owa Mariyam jin ta kum gwo mo ki: Hili mo mo ma, a’ci yan karkunu mo gom ku gi ṯa’kkin mo dhali mmocu ’Kwani ma Israyiil ka ris mo, dhali gom jamas mii c̱aan jin okunu gwo mo ap̱o/ a’di mo tani

³⁵(dhali gandala turga/ midi suka ḵashiram pini mo si’da/) ki gwo kun kulumu ka ris eya du mo minu ṯor eya tente/ mo.

³⁶Dhali ayima ’bomiŋ kamu/ diki’d mo jin ta’da Hanna mo. A’di ta ’bwa/ ma P̱anu/iil mo ’pena waḵ ma Ashiir mo. Ayim a’di caki’d ki yil kagahara mo dhali a’di c̱a’bki’d mo nyaḵka kaṯẖim piti mo ki yil pesu/ mo ’peni yil jin dina a’di ki nyaraŋ gana/ mo

³⁷dhala yim wun ma kaṯẖim piti mo dhali a’di di’d kan ntagi yil issi doŋon i’ce’dka doŋon apo/ mo be. Dhala yim diki ya mo ’peni gu’b gi mondheleladhelel mo mmoluŋa luŋ mo ki moŋga/ to mo dhali mmo’tho mo ki mon’thiny mo dhali ki montee ilu/ mo be.

³⁸Dhali ki mo warki’d mo ka tente/ yan mo tani ayim pu’dki’d mo dhali ’bora Arumgimis bwa i is mo dhali mmo/o gwo mo gom a’di gom uni ’baar mo kun ’kokin mo mmohil gom mowan ’ba/ gi Pa Urushaliim mo.