Luuka 23:17-33

¹⁷Tawi no farlii mo kanko Pilaatu, juldeere bee accitangol ɓe nangaaɗo goo.

¹⁸Onsay ɓe fow ɓe sonki, ɓe wi'i: «Waree oo ɗoo! Accitanon men Barabaasi!» (

¹⁹Tawi on-le ko sokiraa, ko sabu gere no waɗunoo ka saare e waru hoore.)

²⁰Pilaatu yewti ɓe fahin, ɓay hari no e fondo makko accitugol Iisaa.

²¹Kono hiɓe sonkaynoo, wi'a: «Fempee mo! Fempee mo!»

²²Pilaatu wi'i ɓe tammun: «Hara ko honɗun oo bonni? Min mi yi'aali dalil woo ko oo wariree. Jooni mi donkinay mo, mi accita.»

²³Kono ɓe catii e ɗun e hoore sonko njano, hiɓe toroo yo o fempe. Ngon sonko maɓɓe fooli mo kanko Pilaatu.

²⁴Pilaatu jaɓani ɓe faale maɓɓe on.

²⁵O acciti on mo ɓe torii mo fii mun, ɗun ko oo sokiranooɗo fii gere e waru hoore, o waɗi Iisaa faale maɓɓe on.

²⁶Fewndo ɓe naɓaynoo Iisaa fii warugol mo, ɓe hendii goɗɗo mo Sirenii iwaynooɗo ngesa, on no wi'ee Sim'uunu. Ɓe rondi mo *leggal altindiraangal ngal, o iwtiri ɓaawo Iisaa.

²⁷Tawi jamaa moolanaaɗo no iwtiri ɓaawo makko wondude e rewɓe, ɓen no wulla fesa fii makko kanko Iisaa.

²⁸Onsay Iisaa fewtiti ɓe, wi'i: «Ko onon yo rewɓe Yerusalaam, wota on wullu fii an, kono wullee fii mon e fii ɓiɓɓe mon ɓen.

²⁹Ko fii ɲalaaɗe no aroya ka wi'oytee: ‹Maloore wonanii ɓen ɓe jiidotaako e ɓen ɓe heɓaali ɓiɓɓe e ɓen ɓe muyninaali!›

³⁰Onsay yimɓe ɓen wi'oyay: ‹Pelle yanee e hoore amen! Cehe suumee men!›

³¹Hara si leɗɗe kecce ɗen warraama nii, haray ko honno yorɗe ɗen warroytee?»

³²Tawi bonɓe ɗiɗo no naɓideede e Iisaa fii waridoyegol e makko.

³³Ɓay ɓe hewtii e ndee nokkuure wi'eteende Laalagal Hoore, ɓe fempi mo ɗon wondude e ɓen bonɓe ɗiɗo, goɗɗo on ka sengo makko ɲaamo, oya on ka nano makko.