Luuka 20:5-27

⁵Yo khusala oozelana atthaaporu araka: “Amana nilupa yoori waari wa pinkuuni, ontta onuuzela yoori: ‘Khi mwaasa aya niini mwihinkhupalelaka?’

⁶Na amana nilupa yoori waari wa anaatamu, atthu ooshi antta onivonya na mawe maana ankhupalela yoori Yaahaya napiyu.”

⁷Attaaphale yo khujipu yoori: “Khanijuweeni nlupa amwinkhiyeeyo ofwalume.”

⁸Aphano Yinsa khuwooza yoori: “Na-miyo akiniwuuzani ofwalume kinrettanaaye vitthu epi.”

⁹Yinsa khulupa nlikaniso awoozaka atthu yoori: “Aarivo mwinyi mmote aazaliyeeyo mmashapa mwawe miitthi za wuuva, khuweekesa atthu yoori asala alimela, ye khulawa safwari yawe khwiikhala siikhu za waatta.

¹⁰N'oofiya wakathi wa wuurula khunruma karumeyaawe mmote yoori alawe enkiwe wuuva, ila anamalima apale khumpiya, khumwiikara woohimwinkhi etthu.

¹¹Mwennyewe nshapa khunruma nkina, na oto theenya yo khunveyisa, khumpiya khumwiikara woohimwinkhi etthu.

¹²Aphano khunruma wattaatthu, anamalima apale khumpiya, khunvulalisa na khumwiikara.

¹³Paata ya toole, mwennyewe nshapa khusala oopuwela araka: ‘Kirette-ni? Aa! Kintta onruma mwanaka kinimphetachaaye, n'oomoona khweele khweele antta onhishimu.’

¹⁴Anamalima apale wakathi amooniyeevo mwaana wa mwennyewe nshapa ntthile khulupa yoori: ‘Namarithi nshapa ntthi ti otu. Olawa nimuule, liiye leetthu.’

¹⁵Khunsukhumela othetekele wa nshapa khumuula. Mwennyewe nshapa onttela owaarettela niini?

¹⁶Ye ontta ota awoole anamalima apale, nshapa laya ntthile awenkhe atthu akina.” Atthu apale aariivo n'oosiila mattakhuzi apale khulupa yoori: “Zihirettikhane vitthu epo!”

¹⁷Yinsa khuweekesa khuwoozela yoori: “Maana a mattakhuzi apa aatikhiweeyo anlupa-ni? ‘Liwe ntthile eeseliyeeyo anamajeka nyuupa, larettiwa wiiya liwe lootafikhana zayita mawe ooshi.’

¹⁸Otule anttelaaye okwela liwe nttho ontta onyenyeya, na otule lininkwelaaye ontta osakeya eeye lifufu.”

¹⁹Attunkhulu a mahaakhimu a tiini na anamanozela a kano khusala eekesa nanna yonkhola wakathi otthuupule, maana yo aajuwiye yoori nlikaniso opule oniwaalupa yo. Ila khuhisala akholeya mwaasa woowoova atthu apale aari attaaphale.

²⁰Aphano yo khusala anlupattha, khuwaaruma atthu aari ojinkhelelaaye wiiya anashariya onsaya sirini, yoori ansikanane paathuli ankhole anlawane wa mfwalume.

²¹Yo khusala amuuzela yoori: “Mwanliimu, fweeyo najuwa yoori onttakhula na onnozela epile ziiyiyeeyo za shariya, ninjuwa yoori khuninthawula ntthu, onnozela haakhi wa nanna Nnyizinku antakhaazo.

²²Nkanuuze, nkhama ti yooshapweya oripha lumpuru la Seezari ama wala?”

²³Yinsa khujuwa olavilavi aya khuwooza yoori:

²⁴“Nkakitiiseleni nzurukhu apha. Ratarato eti vanzurukhu apha ti yaani?” Atthu khujipu yoori: “Ti ya Seezari!”

²⁵Khuwooza yoori: “Mwimwinkhe Seezari etile yiiyiye ya Seezari na mwimwinkhe Nnyizinku etile yiiyiye ya Nnyizinku.”

²⁶Yo khuhisala ansikanana hatha paathuli vakatthi wa atthu apale; khwiiya ootikinisiwa pi mattakhuzi apale aajipwiweeyo ti Yinsa, yo khunyamala.

²⁷Masatukhi apale ahaari okhupalaaye osisimuwa wa anamfwa, khulawa akina khumwaattama Yinsa.