LUUKA 19:10-37

¹⁰Haali/ Ya/ gi ’Kwani p̱u’dki’d mo mmoŋap̱a ŋap̱ mo dhali mmowoṯẖa woṯẖ mo gom uni gun thiskunu e mo be.

¹¹Me’d jin ciḵkina uni gwo gwansan mo tani a’di marki uni gwoŋ kamu/ is mo mmoṯorki gwom ’bi’th/e mo haali/ a’di ’dishki Pa Urushaliim is mo dhali haali/ uni ṯoshkin ki Bampa/ ma Arumgimis minu piyu/ ki jahanne/ mo be.

¹²Gom gwo gi wakan mo tani a’di ki o gwo mo ki: Wathi/ jin mii’da ṯu’c e bampa/ ma maliḵ tani a’di yaki’d mo e bampaŋ kamu/ jin si’dasi’d mo mmobu’th mom’bi’th ma maliḵ mo dhali doḵu/ ka nyaŋ’ko’d mo.

¹³A’di ki yuḵ c̱iŋkinam piti kun ’koni ’kume’d mo. A’di ki c̱i uni kuluny ’dolkoni ’kume’d mo. Dhali a’di ki o uni gwo mo ki: Miiyi aṯu’c ki uni gwansan mo ma ntagi aha/ mina p̱u’du/ mo.

¹⁴Hili ’kwani gi bampam piti shi/i a’di i e mo dhali hashki a’di ’kwani kun hashu mo mmobaṯẖ a’di isho’k mo mmo/o gwo mo ki: Am ’tena bwa jin mina wathi/ yansan ta tap̱a ap̱o/ am mo be.

¹⁵Ki a’di doḵki’d ka nyaŋ’ko’d mo mmobu’thkina a’di mom’bi’th ma maliḵ mo tani a’di ḵanki c̱iŋkina/ gwansan gwo mo e uni kun c̱ikina a’diya guurush mo ki uni minu yuḵu/ i a’di mo ki a’di midi mish to mo gom nyunycina/ to kun miikunu mo.

¹⁶Jin ṯwa/a/ p̱u’dki’d ibwambori a’di mo mmo/o gwo mo ki: Tap̱a, kuluny ’dolkon pini warki’d ki kuluny ’dolkoni ’kume’d mo be.

¹⁷Dhali a’di ki o a’di gwo mo ki: Mba/ /e ta c̱iŋkina/ jin ’boro’d mo. Haali/ /e ta a’di jin ta isiŋ gana/ mo eya p̱o/ ushi to kun gwa’dan mo tani /e mini ta gi moshirr ap̱o/ ’peŋkuman bampa/ kun ’koni ’kume’d mo be.

¹⁸Dhali jin ’kon ma p̱o/i su/ p̱u’dki’d mo si’da/ mmo/o gwo mo ki: Tap̱a, kuluny ’dolkon pini warki’d ki kuluny ’dolkoni mudhe’d mo be.

¹⁹Dhali a’di ki o a’di gwo mo ki: /e mini ta tap̱a ap̱o/ ’peŋkuman bampa/ kun ’koni mudhe’d mo.

²⁰Dhali yan’ko’d jaŋ kamu/ p̱u’dki’d mo mmo/o gwo mo ki: Tap̱a, kuluny ’dolkon pini a’dan be, a’di jin karkika/ mo eya mantiil mo.

²¹Haali/ aha/ ḵo/ka /e mo haali/ /e ta wathi/ jin ceshi mo mo ki thiṯẖ mo. /e ’de’kki a’di jin dina /e ki kara ’cesh mo dhali /e ’ciṯẖki a’di jin dina /e ki si mo be.

²²A’di ki o a’di gwo mo ki: Aha/ mina waḵ /e mo ’peni gwo gi ’twam piniŋ gana/ mo. /e ta c̱iŋkina/ jin ta thus mo. /e mishin ki aha/ tana wathi/ jin ceshi mo mo ki thiṯẖ, mmo’de’k a’di jin dika/ ki kara ’cesh mo dhali mmo’ciṯẖ a’di jin dika/ ki si mo tani

²³atinta dina /e ki dhuka guurush pem mo e mo jin dhunuwa guurush mo dhali ki yam pem jin miga/ p̱u’du/ mo tani aha/ mina ’taki tul uni is mo nyaḵki nyunycinam piti mo?

²⁴Dhali a’di ki o uni gwansan gwo mo uni kun doshkin mo ki: Budhi kuluny ’dolkon ’peni a’di mo ma, dhali c̱i a’di jin ta’d gi kuluny ’dolkoni ’kume’d mo.

²⁵(Dhali uni ki o a’di gwo mo ki: Tap̱a, a’di ta’d gi kuluny ’dolkoni ’kume’d mo be Ayy!)

²⁶Aha/ ṯora um gwo mo ki, eya ris uni ’baar mo ka ’deṯe/ ’deṯe/ uni kun tan gi to mo tani minu c̱i ki nyanye/ mo be, hili ’peni a’di jin dara’d mo tani a’di si’da/ jin tana a’di mo tani a’di minu war a’di mo be.

²⁷Hili gom uni gwansan kun ta ’kup̱ ki aha/ mo tani uni kun ’koki ŋap̱ aha/ mo mmota tap̱a ap̱o/ uni mo tani susi uni mmahan mo ma dhali ’kosh uni jwa mo mbwambori aha/ mo.

²⁸Dhali ki a’di oki gwo gwansan mo tani a’di yaki’d nṯwa/a/ mo mmoya ka gagamis mo e Pa Urushaliim mo be.

²⁹Ki a’di ’dishki Pam Beeṯp̱aji is mo dhali Pam Beeṯaniya mo tani e ’kuwosh c̱aan jin yuḵu ka Seṯuun mo tani a’di ki hash uni su/ ’peni imanciḵ a’di gwo mo

³⁰mmo/o uni gwo mo ki: Iiku/ bampa/ mo ma jin di’d ka p̱ar ’twa/ mo. E mo jin cic̱kina umi cine/ mo tani um mini gam ari thuluny jin shi’dkunu mo, a’di jin dina wathin ’deŋ kamu/ ki mera p̱o/ mo ki sule/ mo. ’Cuḵi a’di mo ma dhali susi a’di mmahan mo.

³¹Waḵki/ jan ’deŋ kamu/ doṯi um gwo mo ki: Atinta ’cuḵa um a’di mo tani um mini o gwo mo cikise/ ki: Tap̱a midi mii ta gi a’di mo be.

³²Wakan uni gwansan kun hashkunu mo tani iikin mo dhali gam a’di me’d jin ṯorkina a’di uni gwo mo be.

³³Dhali me’d jin ’cuḵkina uni ari thuluny mo tani icom gi ari thuluny o uni gwo mo ki: Atinta ’cuḵa um ari thuluny mo?

³⁴Dhali uni thoḵ uni gwo mo ki: Tap̱a midi mii ta gi a’di mo be.

³⁵Dhali ki uni suski a’di aYesus mo tani uni ṯa’kki burrinyem buni ap̱o/ ari thuluny mo dhali uni ki kara Yesus ap̱o/ a’di mo be.

³⁶Dhali ki a’di merki’d ki tur mo tani uni p̱a’dki burrinyem buni e bway tur mo be.

³⁷Dhali me’d jin ’dishkina a’di mo is mo tani e mo jin thulkina Wosh ma Seṯuun ’twa/ ka luŋgu’b mo tani awaambuhany ’kwani kun ta imanciḵ a’di gwo mo tani uni ṯelki mii ’pen mo mmo’kuny bwa mo dhali mmomaŋa Arumgimis mo ki ’twa/ jin caaca mo gom miim ’bi’thga/ kun p̱arkina uni e mo