Luuka 12:18-59

¹⁸Khulupa yoori: ‘Aa, kajuwa etthu yooretta. Kintta opwecha matthala apa mattiitthi kijeke mawulu-mawulu yoori kittheemo peewu zaka na vitthu zaka zooshi epile kiriinaazo.

¹⁹Nawiisha, kuuze nafusi yaka yoori: onaaye peewu na vitthu za waatta zintoshelezaaye nyaakha za waatta; ovumule, oje, onywe na opuhe.’

²⁰Ila Nnyizinku khumuuza yoori: ‘Nlolo! Osikhu otthuupu ontta ofwa. Maali zawo paani anttelaaye osalana?’”

²¹Yinsa khumarisela araka: “Ntthu oto ori nkhama atthu apale anlipanaaye maali zaya ila khuhiiyi mathaajiri mmakhono wa Nnyizinku.”

²²Aphano Yinsa khuwooza anakhiyoni awe araka: “Ti eto kiniwuuzaanini yoori: mwihiiyane shaakha na ohaayi enu, wala etthu mwinttelaaye oja ama etthu mwinttelaaye owala.

²³Maana ohaayi ona fwayita khuluyeene zayita etthu-yoojiwa na mwiili ona fwayita khuluyeene zayita kuwo.

²⁴Mwiwoone anakhuku; khanzala wala khanuurula hatha ntthala khana loopwehavo vitthu-zoojiwa zaya, ila Nnyizinku oniwenkha etthu-yoojiwa. Mweeyo mwinaaye fwayita khuluyeene zayita anyannyi apo!

²⁵Paani vakatthi venu anwahaaye weekezela mansha awe hatha nkhama eetta oshukulikhela?

²⁶Mweeyo khamwinwahi oshintta vitthu ttiitthi-ttiitthi, khi mwinshukulikhela toovi kinoko zaya?

²⁷Moone nanna anwulaazo maluwa oshapweya ntthuttu, khankhola khaazi wala khanvaasha kuwo, ila kiniwuuzani yoori: Seleyimaana aari thaajiri nwulweene, ila khawaleeni kuwo zooripelela nkhama maluwa atthaapo.

²⁸Nnyizinku onwalisa nyaani ziriiye ntthuttu leelo meesho zeettelaka olukula, sapiseni mweeyo atthu a amini ttiitthiiru khatepeeni wuuwalisani?

²⁹Mwihishukulikhele etthu mwinttelaaye oja ama onywa.

³⁰Atthu apale ahininjuwaaye Nnyizinku pa yo anshukulikhelaaye vitthu epo, ila mweeyo Papeenu onjuwa yoori enuuhithajiyani vitthu epo.

³¹Mweekese khapula Ofwalume wa Nnyizinku, vitthu zaya epo mwintta weekezeliwa.”

³²Yinsa khulupa theenya araka: “Mwihoove mweeyo mwiiyiye nkhama khuntti ttiitthiiru ya pwittipwitthi, maana Papeenu ti ye atakhiye owinkhani Ofwalume awe.

³³Muuzanyize zooshi mwiriinaazo nzurukhu aya mwiwenkhe asikhini, mwijaattalelele mifukho zihinvaruwaaye, toowo mwinthokorela maali pinkuuni zihiniishaawo, okhu ahimfiyaawo nantarawu wala maweephe yoori aharipu.

³⁴Maana attaapho eniiyaavo maali zawo rooho yawo eniiya attaapho.”

³⁵Yinsa khuvira alupaka yoori: “Mwiiye anamarumeyela oojeekesela na khantteya zenu ziri zookhoziwa.

³⁶Mwina yawiiya nkhama anamarumeyela aninwejelaaye mbwanaaya yoori arutaka onjampo la harusi, amana apiya nlako amfukulele nasaapiru.

³⁷Ooshapweyiwa anamarumeyela apale mbwanaaya anttelaaye owaasikana eettaka ojeekesela. Kiniwuuzani khweele yoori mbwanaaya na-ye ontta ojiwalisa yoori arumeye, awooze wiikhala vameeza asala awaarumeyela.

³⁸Hatha nkhama ata osikhu layili ama lifwajiri, ooshapweyiwa anamarumeyela apale mbwanaaya anttelaaye owaasikana ari oojeekesela.

³⁹Mwijuwe yoori eriwaka mwennyewe nyuupa eetta ojuwa wakathi nantarawu antaavo, toono ahinlikhaka ovira nnyupa mwawe.

⁴⁰Na-mweyo mwiiye woojeekesela, maana Mwaana wa Pinaatamu ataaka khaavo anjuwaaye wakathi aya.”

⁴¹Aphano Pheeturu khumuuzela Yinsa yoori: “Mbwana, nlikaniso opo pu weetthu ama pu wa atthu ooshi?”

⁴²Mbwana khujipu araka: “Paani eeyiyeeyo karumeya wa waamineya na w'aakhili, mbwanaawe amwinkhiyeeyo owaalokozela akarumeya azaawe na owenkha etthu-yoojiwa mmana ofiya wakathi?

⁴³Wooshapweyiwa karumeya otule mbwanaawe amana ataaka anttelaaye onsikana arettaka etthiipo.

⁴⁴Weekhweele, kiniwuuzani yoori onttela wiiya wa waaminiwa alikheliwe weettettisa maali zooshi.

⁴⁵Mwaakanyerele, karumeya otule amana alupa nroho mwawe yoori: ‘Mbwanaaka khanta nasaapi,’ khwaaza owaapiya akarumeya apale akina aakha na aalume, okhuno ajaka, anywaka na ahapaliwaka,

⁴⁶mbwanaawe onttela ota siikhu etile ye ahaari waakanyerelaaye na wakathi ahaari ofikhirelaaye, ahukhumwiwe venkivene atthiiwe puuro ya atthu oohaamineyi.

⁴⁷Karumeya otule anjuwaaye matakhelo a mbwanaawe, ila khuhisala ajeekesela na khuhisala aretta epile antakhaazo mbwanaawe, onteela ohukhumwiwa na ojaphiwa venkivene.

⁴⁸Ila otule ahinrettaaye matakhelo a mbwanaawe mwaasa woohijuwi, onteela ojaphiwa na ohukhumwiwa vattitthiiru. Wakhula otule enkhiweeyo za waatta ona yoorutisa za waatta; na otule aaminiweeyo venkivene, onlawa avekeliwe zooziti channu.”

⁴⁹Yinsa khuri: “Miiyo kateela okhoza moottho vatuniya, enikituvela ovira okholelaka!

⁵⁰Ila yamwanzo kina yoohoowa kifwe, kina huzuni mpakha vitthu epi zirettikhane ziishe!

⁵¹Mweeyo mwinaakanyera yoori miiyo katana heeri vatuniya? Wala! Kiniwuuzani khweele yoori miiyo katiisa ohisiilani.

⁵²Waaza leelo eti mpakha okho ninttaawo, nkatthi woojama wa atthu athaanu, onteela opuwamo waawanyeya; attatthu ohisiilanani apale awiri, apale awiri ohisiilanani apale attatthu.

⁵³Paapa wuumana na mwanawe na mwaana wuumana na papaawe. Maama wuumana na mwanawe wankha, mwaana wankha wuumana na mamaawe, namaraliwa wuumana na nkhwewe, akhwe wuumana na namaloola.”

⁵⁴Yinsa khuwooza atthu aakusanyeyiyeeyo yoori: “Mweeyo amana moona liwiku liwelelaka phantte y'ookhu lintupweelaawo njuwa mwinlupaka yoori: ‘Entakha onya vuula’, khweele khurettikhana.

⁵⁵Amana moona pheevo ya kuusi mwinlupaka yoori: ‘Enteela opuwa haari’, khweele khurettikhana.

⁵⁶Manaafikhi! Mweeyo mwinjuwa olupa alama za vatuniya na z'ootulu; aphano toovi mwihijuwaka olupa alama za wakathi opu?

⁵⁷Mwaasa aya niini mwihijuwaka othawula etile yiiyiyeeyo ya shariya?

⁵⁸Amana weeyo na muumani awo mwilawaka wa namaphuka, enhithajiya osiilana khapula rakuzeene mwihinalawe, maana amana ofiya wa namaphuka ontta omuuza namweekesela ootthe nkalapooso.

⁵⁹Miiyo kiniwuuza khweele yoori khunlaamo ohiripheeni khapula.”