Luuka 11:19-52

¹⁹Nkhama pi etthiipo, khi aaneenu aniikara na owahi waani? Atthaapo pa yo anttelaaye wuuthoonyezani yoori khamwina shariya.

²⁰Ila nkhama khweele masheethwani apa kiniikhara na owahi wa Nnyizinku, eto enthoonyeza yoori ofwalume wa Nnyizinku wafiya vakatthi venu.

²¹Ntthu woozivala na woojuumaanya, amana eekeselaka vaje vawe saaneene, mali zawe ziniiya zookholeleleya.

²²Ila ntthu woozivala zayita ye, amana ankukuttela khunshintta ontta onnyakanya zaana zawe anroromelaazo athuule phantte ya mali zawe.

²³Otule ahina vamote na-miyo oto ona lupattha na-miyo, otule ahinkusanyaaye na-miyo ontta omwaza.”

²⁴Yinsa khurutela olupa yoori: “Sheethwani, amana alaamo mmwiili oneekesa puuro yoohiina maati yoori avumule, n'oohisikani puuro ye onlupa yoori kintta orutela mphule kaariimo.

²⁵Amana aruti asikana nnyupa ori wooseeliwamo na wa waattaleliwamo,

²⁶ontta oruti eettele masheethwani makinoko sapa ootepa zayita otule, aviremo asala eekhala nttumphule. Attaaphale ohaayi wa ntthu aya otule oniiya wootepa zayita omwanzo.”

²⁷Yinsa eettaka olupa mattakhuzi apale, muukha mmote aari attaaphale khunyakula araka: “Wooshapweyiwa muukha otule oovokoliyeeyo khuwaamwisa.”

²⁸Ila Yinsa khunjipu araka: “Ooshapweyiwa pi apale ansiilaaye nttakhuzi la Nnyizinku khushututela.”

²⁹Wakathi atthu akusanyeyiyeevo vahali vamote, Yinsa khusala alupa yoori: “Atthu a leelo pi ootakhala rooho, anveka woona alama ya minjuza ila khanlawa othoonyeziwa hatha alama moote, yoohiiyi etile ya napiyu Yuunusa.

³⁰Nkhama etthiipo Yuunusa eeyiyeeyo alama ya atthu a Neniive, na-ye Mwaana wa Pinaatamu onttela wiiya alama ya atthu a leelo.

³¹Siikhu ya khiyaama rayisi wa kusini onttela olankha awaaphuke atthu a aphano; maana ye alankha okhu wiisheliyeewo olumwenku oteela osiila ojuwa wa Seleyimaana, ila otu mwiriina apha anziti Seleyimaana.

³²Siikhu ya khiyaama atthu a Neniive anttela wuuphukani mweeyo, maana yo athupwiya twampi zaya, n'oosiila tafusiiri epile aari olupaazo Yuunusa; otu mwiriina apha nasaapi anziti Yuunusa.”

³³Yinsa khuvira alupaka yoori: “Khaavo ntthu ankhozaaye khantteya khuvitha ama khukhutela na yuuku, ila entthiiwa vahali wa wooneyavo yoori esala ewaamwasikhela apale anviraaye nnyupa.

³⁴Khantteya ya mwiili maasho, amana maasho awo eeya oosaana, mwiili awo wooshi oniiya wa nuuru. Ila amana maasho awo ahiiyi saana mwiili awo oniiya n'yiiza.

³⁵Wiiyane phoole na nuuru eto oriinaaye yoori ehiiye yiiza.

³⁶Amana mwiili awo wooshi wiiyana nuuru khuhiina hatha phantte moote ya yiiza, oniiya woomwasikheliwa nkhama khantteya yuumwasikhelaka weeyo.”

³⁷Wakathi Yinsa eeshiyeevo ottakhula, mfwarizeewu mmote khumuuza olawa oja owawe. Ye n'oofiya khwiikhala vameeza.

³⁸Mfwarizeewu otule khushanka mwaasa woomoona Yinsa eettela oja woohinawi.

³⁹Mbwana khuwooza yoori: “Mweeyo mafwarizeewu, mwinoosa koopho na parathu oje waya, ila rooho zenu zeetaala vitthu za omaasho kopho na zoohusuti.

⁴⁰Alolo! Otule aattaliyeeyo oje khahi othuuto attaliyeeyo nkatthi?

⁴¹Khapula mwaaze winkha etile eriiye nkatthi wa rooho yenu nkhama zimola, toowo mwintta woona zooshi ziwiikhaleliyeni saana.

⁴²Olaanikha pu weenu mweeyo mafwarizeewu, maana mwininkha lifunku lakhuumi mathapa na vitthu za nwoorotha, ila khusala mwitarawu shariya na pheta ya Nnyizinku! Mweeyo mwina yooretta vitthu epo woohilikhi phantte kiina.

⁴³Olaanikha pu weenu mweeyo mafwarizeewu, wawuutuvelani puuro ya wiilokozi nnyupa woosifwiwamo Nnyizinku na ochelisiwa wa shitahavo vamwanttiwa.

⁴⁴Olaanikha pu weenu mweeyo, mwiiyiyeeyo nkhama khapuri yoohooneyi anviraavo atthu vatulu vaya khuhijuwi.”

⁴⁵Aphano namanozela wa kano mmote khunjipu Yinsa araka: “Khahiyo toowo! Mattakhuzi apo kinoona yoori annithoonya fweeyo.”

⁴⁶Yinsa khuri: “Olaanikha pu weenu mweeyo anamanozela a kano, mwiniwaapwecherisaaye atthu mapwattha oolemela wala mweeyo mwihinwahaaye osapa na yaala yenu.

⁴⁷Olaanikha pu weenu mweeyo mwiniwaajekelaaye khapuri zooshapweya manapiyu, atthaapale ooliiweeyo pi amarehemu apapazenu.

⁴⁸Apho mweeyo mwinthoonyeza yoori mwinlawela oshaahiti wookhupalela epile apapazenu arettiyeeyo, yo awoola manapiyu, mweeyo khuwaajekela khapuri zooshapweya.

⁴⁹Ti eto Nnyizinku alupiyeeyo nkatthi woojuwa wawe yoori: ‘Kinlawa kawaaperekhe manapiyu na maaswihaapa; yo anteela owoola, akina aweekarise.’

⁵⁰Mwaasa wa manapiyu apa ooliiweeyo tokhiya olumwenku waazaka, atthu ooshi apa a leelo eti ana paathuli.

⁵¹Waaza taamu ya Apeele mpakha taamu ya Zakariya otule ooliiweeyo kharipu ya vaalitaari vaje wa nyuupa ya Nnyizinku. Kiniwuuzani yoori, atthu a leelo anlawa ahukhumwiwe mwaasa wa ethiito.

⁵²Olaanikha pu weenu mweeyo anamanozela a kano, maana mwathuula efukulo yoojuwa, ila khuhivirimo na khuwaakhattaza apale aari otakhaaye oviramo.”