Luuk 19:22-37

²²“Kaeŋ ijoro meleema kokaeŋ jeŋ muro, ‘Gii gawoŋ eja bologa. Geeŋgo qaa jejaŋi, niinoŋ iikawaa so gosiŋ goma iroŋa meleema gomaŋa. Nii eja geriawo koloojeŋ. Neeno iwoi kowinoŋ mende ama ii memambaajoŋ momakejeŋ. Neeno nene kota mende komoma iikawaa hoŋa ii kileŋ kotoŋ memambaajoŋ momakejeŋ. Ii saanoŋ moma laligona.

²³Gii kaniana kaeŋ momago mono naambaajoŋ moneŋ esuna ii benknoŋ mende ana somariiro. Ii koŋkororo gawonoŋ anagati eeŋ, iikanoŋ mono seiro niinoŋ kaŋ susuyawo mewenaga.’

²⁴“Kaeŋ jeŋ muŋ eja kosianoŋ naŋgiti, ii kokaeŋ iŋijoro, ‘Oŋo mono iwaa borianoŋga moneŋ esuya ii wama esu 10 mokolooroti, ii mubu.’

²⁵Iŋijoro moma kokaeŋ ijogi, ‘Poŋ, iwaanoŋ moneŋ esu 10 ii edaboroja.’

²⁶Kaeŋ ijogi meleema jero, ‘Niinoŋ kokaeŋ iŋijowe mobu: Ejemba iwoi eŋ oŋono gawoŋa meŋkejuti, kuuya iyoŋoojoŋ Anutunoŋ ii toroqeŋ oŋono seiwaato, mombaanoŋ iwoi melaada moŋ ero gawoŋa mende meŋkeji, Anutunoŋ mono ii kaaŋagadeeŋ wano eeŋ toontooŋ laligowaa.’

²⁷Kaeŋ jejento, kereurunanoŋ niinoŋ eja poŋ kolooŋ galeŋ koma oŋomaŋatiwaajoŋ togogiti, ii mono uŋuama kagi iŋiima jeŋ kotowe uŋugi komuwuya.’” Kiaŋ.

²⁸Jiisasnoŋ qaa ii jedaboroŋ mesaoŋ Jerusalem sitinoŋ umambaajoŋ wala keno.

²⁹Kema Betfage ano Betani gomaŋ woi kosogaranoŋ kaŋ baaŋa qata Oil gere baaŋa qamakejuti, iikanoŋ uma gowokowoita woi wasiŋ orono. Wasiŋ oromambaajoŋ ama

³⁰kokaeŋ irijoro, “Gomaŋ jaasewaŋgaranoŋ raji, mono iikanoŋ kembao. Kema iikanoŋ keuma doŋgi melaa kasanoŋ somoŋgogi nanji, ii mokoloowao. Doŋgi ii dologaga, eja moŋnoŋ qaganoŋ mende rarayaga. Ii mono isama meŋ koi kawao.

³¹Aisni moŋnoŋ ‘Ii naambaajoŋ isanjao?’ jeŋ qisiŋ orono kokaeŋ ijowao, ‘Poŋnaranoŋ iikawaajoŋ amamaaja.’”

³²Kaeŋ wasiŋ orono kema ijorotiwaa so mokoloori.

³³Mokolooŋ doŋgi melaa isambowaajoŋ ani toya yoŋonoŋ irijogi, “Hei! Doŋgi melaa ii naambaajoŋ isanjao?”

³⁴Irijogi kokaeŋ meleeni, “Poŋnaranoŋ iikawaajoŋ amamaaja.”

³⁵Kaeŋ meleema meŋ Jiisaswaanoŋ kaŋ malekugia qetegoŋ doŋgi qaganoŋ tamboma jegi Jiisasnoŋ uma raro.

³⁶Kaeŋ rama keno ejemba tuuŋlelembe yoŋonoŋ goda qeŋ opo malekugia qetegoŋ kana somatanoŋ tamboŋgi.

³⁷Tamboŋgi kema Jerusalem dodowiŋ Oil gere baaŋaa roganoŋ kemero gowoko tuuŋ kuuyanoŋ kanaiŋ aisooŋ aŋgoleto kuuya ku-usuŋ qaganoŋ mero iigiti, iikawaajoŋa qa somata qama Anutu mepeseeŋ muŋ