Lumu 11:4-15

⁴Purisu igtigkané si Pedro igulit kandan tingód katô langun na ilumu.

⁵Igkagi si Pedro, na mà din, “Tô igóddô a tun ta Jope, róggun igdasalla, duwán igpakita ka Manama kanak. Duwán igsunnad kanak iring na dakál kisì na igtuntun tikud tun ta langit asta iring na igikáttan tô áppat sunu.

⁶Tô igsállágga, igkita ku tun dalám tô ássa-ássa mga mannanap asta mga manuk ta kayun.

⁷Na, duwán kagi na igdinág ku tikud tun ta langit, na mà din, ‘Pedro, tindág ka, iyó ka, asta kan ka.’

⁸Asal igtaba a, ‘Áglangngagán, diya mému kuman, su diya lumapas katô mga sugù i Moises na inalayun ku ágtumanán.’

⁹Asal igkagi puman sikandin kanak tikud tun ta langit, ‘Yaka ágkagi na dì ka mému kuman, su Manama tô igkagi na mému gó makan.’

¹⁰Ikatállu ni ilumu kanak, ibatun tô iring na kisì tun ta langit.

¹¹Na, sékót dád igdunggù tun ta balé na igóddóan ku tô tállu manubù na igpapid tikud tun ta Cesarea ébô mangé kanak.

¹²Na, igkagi tô Ugis Espiritu kanak na diya méllé mákkás kandan agad ánnà dan Judio. Na, igtákkás pagsik kanak ni ánnám kataladi tikud tun ta Jope. Tô igdunggù ké tun ta balé i Cornelio, igahu ké langun.

¹³Igulit si Cornelio áknami na igkita din tô panaligan ka Manama tun ta balé din. Igkagi kun tô panaligan, ‘Pasadunán nu tô manubù tun ta Jope ébô mangé ki Simon na ágngadanan ki Pedro.

¹⁴Tuminurù sikandin áknikó asta katô langun manubù na góddô tun ta balé nu ébô matábbus kó.’

¹⁵Tô igtinurù a kandan, igdunggù tô Ugis Espiritu tun kandan magunawa katô kadunggù din áknita tun ta katigkanayan.