Luku 3:6-13

⁶Dokopa Goteme endakali dupa pyoo nyalanya kalai pingi doko endakali pitakame kandatamina,’” dopa lao pepa pyapae sia-pyaa.

⁷Dokonya endakali tata longo dupa Joneme kaimbu pyekena lao ipata piaminopa, baame dokaita lamaiyoo, “Nyakama kanopato pambeanya mandipae dupa, apimi nyakama Goteme kapa pao imbu kayata doko langipumosa paka kayao wandyalanya epelyamipi?

⁸Nyakama mona kapilyetala endakali mona kapilyetae dupame mana miningimali pyoo minalapape! Nyakamame nyakama tangenya mona dokome, ‘Apotakame naimanya takangena,’ lao masala nayalapape. Kana silyamo datupa Goteme kapa pao Apotakamenya wane jina lapyalina lao nambame nyakama langilyo.

⁹Uaa doko ita tengenya depa latae sepelyamo. Dii epe manja naenge ita doko pitaka pokanya setapala itatenya soo yangatana,” lea-pyaa.

¹⁰Dopa leamopa endakali limbatae peteamino dupame lao pituu, “Dopa tamo doko naimame aipa piamape?” lao piseta piami-pyaa.

¹¹Pisiaminopa baame dokaitanya pii yanu pyakamaiyoo, “Endakali mende yonge pee lapoma pyoo katatamopa endakali mende napyoo katatamo kandao doko, pyoo katatamo dokome mende maina! Endakali mende nee nao katatamopa, mende nanao katatamo doko mainakana!” lea-pyaa.

¹²Dee takisa nyingi akali mendapua kaimbu pyekena lao ipupala dupame baa lamaiyoo, “Mana Lenge Akali, naimame aipa pimape?” leami-pyaa.

¹³Dopa leaminopa baame dupa lamaiyoo, “Nyakamame takisa doko kapomaneme mana seteamoli pyoo nyepala dee mendapua konda pyoo nyala nayalapape!” lea-pyaa.