Text copied!
CopyCompare
Sembeleke - Luku - Luku 20

Luku 20:6-41

Help us?
Click on verse(s) to share them!
6Pate nikana꞉ma꞉ kenke wanda꞉halina꞉ ekie loma꞉ka꞉na꞉ta꞉ do wanda꞉hali wopuma꞉ niki toopima꞉ lilimikie. Pa ekipeke iki paeyaoma꞉ Dionita꞉ Koda꞉na꞉ pi la꞉ mea halo hayeke halie lo halememe.
7Koto ekina꞉ ikana꞉ma꞉ Yesu pa꞉ta꞉ alota꞉ Niki na handoloma꞉me lemekeme.
8Koto lemeke Yesuma꞉ hombo peaaso alota꞉ I̱ma꞉ make yaka pu halo hau manuna꞉ wele peao hala꞉ halina꞉ bikita꞉ iki pa꞉ta꞉ na la kulueke leekeme.
9Kutupa Yesuma꞉ mo wanda꞉hali pa꞉ta꞉ onkoluma꞉ pi ma꞉nda꞉ la halolo alota꞉ Hali homeke ma꞉nda꞉ ipikita꞉ waini pu e pokaata꞉ mo eta꞉ mandane haliwekima꞉ handeteke haena꞉ta꞉ yenki mulu pimiki ekita꞉ hosikima꞉ putupa ipiki pa꞉ta꞉ hala꞉tiki pina꞉yeke halaata꞉ nate hokuluna꞉ papate peekeme.
10Wetepena꞉ mo waini kiliki talemeke nate opolo epeeketa꞉ mo hande haliwekima꞉ ipika꞉ putu piliki wiaemekeeki meaena꞉yeke ipika꞉ e pokaeyeke hali ma꞉nda꞉ tapaeyekeme. Kutu piekepate hande halita꞉ mo haliwekima꞉ yombua bao ala꞉ta꞉ ma꞉nda꞉ siki make na haleke pa tapaemekeme.
11Kutu pimiki handaata꞉ paa ipika꞉ e pokaeyeke hali ma꞉nda꞉ tapaeyekeme. Kutu piekepate mo haliwekima꞉ta꞉ mo halita꞉ yaala꞉ meao yombua bao ombu ala꞉ta꞉ ma꞉nda꞉ make na haleke pa tapaemekeme.
12Kutu pimiki ombu paa tepo peao ipika꞉ e pokaeyeke hali ma꞉nda꞉ tapaeyekepate mo hande haliwekima꞉ta꞉ koto some make lia yombua bao tete tete mea pitao mo e pa꞉ta꞉ yama꞉ mea baemekeme.
13Kotoeki ombu pimiki mo hande waini ena꞉ teke somema꞉ alota꞉ I̱ma꞉ eki pulua꞉pe hone wiaata꞉ Yaka pukima꞉ na kepeleke weki kone tapalueke hone wiekeme. Ipika꞉ honema꞉ alota꞉ Yaka wekina꞉ pita꞉ ota꞉ opua pilimikie laa leekeme.
14Kutu piekepate mo hande e handeteke haemeke haliwekima꞉ta꞉ mo weki epeekeeki handaata꞉ kota꞉ ika꞉ honema꞉ lombolo alota꞉ Hande e teke halina꞉ anke teke mulu pa꞉la꞉ wekita꞉ koto ipula꞉ handa꞉e. Ota꞉ lumana꞉e la alota꞉ Luma꞉ka꞉na꞉ta꞉ kota꞉ mo eta꞉ ota꞉ nika꞉ eki wilieke lemekeme.
15Koto laata꞉ ikana꞉ma꞉ mo someta꞉ e tikene nane yola꞉ mea puaata꞉ lia homaemekeme leekeme. Koto pimanu la paeyeketa꞉ Yesuma꞉ mo wanda꞉hali lota꞉ pitolo alota꞉ Do ena꞉ tekehali opolo epea꞉ka꞉na꞉ta꞉ kota꞉ mo e handeteke haleme haliweki pa꞉ta꞉ta꞉ eki haumanu pilia꞉pe.
16Ipikana꞉ma꞉ a꞉pa mo haliweki liaata꞉ ipika꞉ eta꞉ mo mandane e handeteke halo pa꞉la꞉ haliweki pa꞉ta꞉ hala꞉ monealieke leekeme. Mo wanda꞉halima꞉ doeki opu hao alota꞉ Ota꞉ kutupa dia꞉me lemekepate
17Yesuma꞉ iki handake witolo hata꞉ lota꞉ pitolo alota꞉ Dia꞉me alemepate mo Baibolo bukana꞉ wape pea ula꞉ pima꞉ta꞉ Mo da a꞉eyo haemeke haliwekima꞉ Hoela꞉me laa kiaemeke toopi kone ameta꞉ keneme pa꞉ta꞉ dana꞉ teke toopi ula꞉me la꞉la꞉ ekina꞉ teketa꞉ alekepe la loa꞉me.
18Mo koto toopi manda lopilia꞉ hali ma꞉nda꞉ a꞉nda꞉ta꞉ ota꞉ pindi pindi pilieke. Kutupa make mo toopima꞉ hali ma꞉nda꞉ a꞉nda꞉ manda lopea꞉ka꞉na꞉ta꞉ kota꞉ mo someta꞉ yombua bao dokolo au lalieke leekeme.
19Koto leeke ekina꞉ mo yeni peao haemeke haliwekina꞉ you haliweki make hande pi ula꞉eki walo haemeke haliwekima꞉ make Yesu koto kone minuluekema꞉ yeke taapemekeme. Ekipeke ika꞉ hone witolota꞉ Ipikana꞉ma꞉ lea꞉ onkoluma꞉ pita꞉ iki pa꞉ta꞉ kone lea꞉me hone witolo hata꞉ pimikime. Kutu puluekema꞉ pimikipate mo wanda꞉halima꞉ paala꞉ pieke handa paemekeme.
20Koto ekina꞉ yeketa꞉ ikana꞉ma꞉ pota꞉ ma꞉nda꞉ weitolo hata꞉ mandane haliwekima꞉ lota꞉ pita꞉la꞉eki manuma꞉ Yesu tamena꞉yeke ma꞉na꞉ yapa꞉ pimikime. Mo haliweki pa꞉ta꞉ alota꞉ Makeaaso hata꞉ kone ikana꞉ma꞉ homu piki pimanu alememe hone wina꞉ lota꞉ pulu pupe lemekeme. Ika꞉ hone tukiki pa꞉ta꞉ta꞉ Koto lota꞉ pilimi ekima꞉ pa makeaaso hata꞉ Yesuna꞉ kiki tondoliki honda꞉ lia mo Loma꞉na꞉ Kapomani You halina꞉ kiki nane hala꞉ monealumeke laa honema꞉ pimikime.
21Koto hambemeke ma꞉na꞉ ikiki haliwekima꞉ pua lota꞉ pitolo alota꞉ Wala꞉la꞉ Halio. Nikana꞉ma꞉ta꞉ nakana꞉ma꞉ lo hale pi make walo hale pi make ota꞉ pi lo haleme hone witoloma꞉me. Kutupa nakana꞉ma꞉ mo biki ula꞉ wanda꞉hali pa꞉ta꞉ hone ma꞉nda꞉ na u hake iki paeyao pa꞉ta꞉ mandake hau piki wanda꞉halie laata꞉ Koda꞉na꞉ ota꞉ hau pita꞉la꞉ pi homeke walo haleme laa alota꞉
22Niki la kie. Mo Kapomani tieke Sisa pa꞉ta꞉ dakisi mani hala꞉la꞉ ekita꞉ a꞉pa꞉la꞉pe o hoela꞉pe. Halomonope o na halomonope lemekeme.
23Koto lemekepate Yesuma꞉ ika꞉ makeaaso pimikieki amba꞉ handaata꞉ mo haliweki pa꞉ta꞉ alota꞉
24Mo toopi kiliki homeke ma꞉nda꞉ i̱ pa꞉ta꞉ wala꞉pe. Do a̱o̱a̱o̱ pita꞉ biki yaapota꞉ epina꞉eki ya꞉ka꞉ta꞉pe laa lota꞉ piekeme. Ikana꞉ma꞉ alota꞉ Mo Sisana꞉ ekie lemekeme.
25Koto lemeke Yesuma꞉ alota꞉ Sisana꞉ alemanu meatiki pitolota꞉ kota꞉ Sisa pa꞉ta꞉ kone mea hala꞉tiki pu hapa꞉peke. Kutupa Koda꞉na꞉ alemanu ya꞉ka꞉na꞉ta꞉ kota꞉ Koda꞉ pa꞉ta꞉ kone pa hala꞉tiki pu hapa꞉peke leekeme.
26Mo wanda꞉halina꞉ leke popelekena꞉ Yesu mea lopapeke tupa꞉ mateeke handaa mo hande haliwekima꞉ pi ma꞉nda꞉ na leke ipika꞉ hombo peayeke ekina꞉ pututuma꞉ homa pitatia yapemekeme.
27Kutupa mandane Sa꞉dusi haliwekita꞉ homemeke wanda꞉hali paa na tialieke lo haemeke haliwekima꞉ Yesu ombu lota꞉ pulu a꞉pa alota꞉
28Wala꞉la꞉ halio. Mosesima꞉ nika꞉ Lo Pi dupa lao wiala꞉me. Hali ma꞉nda꞉ta꞉ wekiwandiki ma꞉nda꞉ na mondu wiki weteke homeke mina꞉pa꞉lao homea꞉ka꞉na꞉ta꞉ kota꞉ mo kosa꞉ piki wanda꞉ta꞉ ipika꞉ hamekema꞉ meaata꞉ mo mendilipi wekiwandikita꞉ mo homea꞉ somena꞉eki mendiaena꞉ laa la꞉la꞉me leekeme.
29Kota꞉ amba꞉ a꞉nda꞉ hama̱la̱꞉ hama̱la̱꞉ watake hata꞉ haemekeme. Kutupa mupeke halita꞉ wanda꞉ mea hao kone wekiwandiki ma꞉nda꞉ na mondu wiki pa homeekeme.
30Kutu pieke handaa mo hoki pa꞉ta꞉ halima꞉ mo kosa꞉piki wanda꞉ miekepate homeke tupa꞉ kone homeekeme.
31Kutu pieketa꞉ kota꞉ tepo peao halima꞉ mea ipikana꞉ma꞉ make homeke hau piekeme. Kutupa mo hama̱la̱꞉ hama̱la̱꞉ paeyao pa꞉ta꞉ homeke hau ombu piekeme.
32Kutu pua꞉tiki pua paelo pulu hata꞉ta꞉ mo hande wanda꞉ make homeekeme.
33Kutu pimikipate mo wanda꞉hali paa tialimi natena꞉ta꞉ mo hande wanda꞉ta꞉ ota꞉ epina꞉ wanda꞉ haliepe. Pa ekipeke mo hande watake hata꞉ hali paeyaoma꞉ mo homeke wanda꞉ kone mimiki ekina꞉ loma꞉me lemekeme.
34Yesuma꞉ ika꞉ pi hombo peaaso alota꞉ Ame do kenkena꞉ hatia ipula꞉ wanda꞉halita꞉ mu alualu pea tooli hao halemepate
35pa mo homa paa tiao mo wetepe nane ipilia꞉ natena꞉ta꞉ paa hao haena꞉ ana꞉pa꞉la꞉ wanda꞉hali ikita꞉ tooli au na lelimikie.
36Ikita꞉ enisoloma꞉ handaa paa na homeke hao halimikie. Ikita꞉ Koda꞉na꞉ wekiwandiki halimikie. Pa ekipeke ikita꞉ homa paa tialememe.
37Kutupa Mosesima꞉ta꞉ homeleme wanda꞉halina꞉ paa tiaasa꞉ ekita꞉ ana꞉na꞉ peneme yao wala꞉la꞉me. Mo Baibolo bukana꞉ tunkula ula꞉eki ma꞉nda꞉ pa꞉ta꞉ta꞉ Mosesima꞉ mo ti talo hala꞉ pa꞉ta꞉ pua Tekehali pa꞉ta꞉ alota꞉ Koda꞉ neketa꞉ Eipoloha꞉ma꞉na꞉ Koda꞉ make Aisa꞉kena꞉ Koda꞉ make Dieikopena꞉ Koda꞉ haleme laa leekeme.
38Kota꞉ koto Koda꞉ta꞉ paa hao hala꞉ wanda꞉halina꞉ Koda꞉ hala꞉me. Homeleme wanda꞉halina꞉eki dia꞉me. Ekipeke. Ipiki pa꞉ta꞉ta꞉ wanda꞉hali paeyao paa hao halememe leekeme.
39Mandane Lo Pi walo haemeke haliwekima꞉ alota꞉ Wala꞉la꞉ Halio. Nakana꞉ma꞉ta꞉ epeke tupa꞉ la꞉ka꞉la la꞉neaseme lemekeme.
40Koto lemeke ekita꞉ ikana꞉ma꞉ lota꞉ pita꞉la꞉eki ma꞉nda꞉ lapeke ana꞉ na poloma꞉me hone witolo hata꞉ lemekeme.
41Yesuma꞉ iki pa꞉ta꞉ alota꞉ Ekipa wanda꞉halima꞉ Ketisota꞉ hande Deipidina꞉ tapake weki yelieke lapeke ya꞉la꞉pe.

Read Luku 20Luku 20
Compare Luku 20:6-41Luku 20:6-41