Luku 1:5-58

⁵Herotima kinima Judia kaziga mani'nea knafina, mago prisi nera Sekaraia'e nehia nera, Abaiza nagapinti ne' mani'ne. Hagi nenaro agi'a Elisabeti'e, Aroni nagapinti efore hu'ne.

⁶Ana aravemokea Anumzamofo avurera fatgo hu'ne nemani'ne, maka kasegene tra kea amage nentene, mago havi avu'avara osuke, fatgo huke Ramofontera mani'na'e.

⁷Hu'neangi mofavre onte'na'e. Na'ankure Elisabeti'a mofavre onteno naravo mani'gene tvava ozafa re'na'e.

⁸Mago zupa Sekaraia ene ra mono nompi Anumzamofonte kre sramnavu prisi eri'za eneri'za nagamo'za, zamagrama eri'zama eneri'za kna ege'za emetru hu'naze.

⁹Prisi vahe'mo'za koma zamuzmapina kre sramna vunaku taisi zokago razageno, iza agimo'ma e'amama himofo huntageno ra mono nompi ufreno Ramofonte kre sramna nevia kante, Sekaraina ana hu'za huntageno kre sramna mananentake'za hu'naku ufre'ne.

¹⁰Hagi rama'a vahemo'za fegi'a ra mono no agu'afi manine'za, ana gnamofo agu'afina (hour) nunamu nehazageno agu'afina mananentake'zana kre sramna vu erizana eri'naze.

¹¹Magora Ramofo ankeromo kre sramnavu tra'mofona tmaga kaziga efore huno oti'ne.

¹²Ana'ma higeno'a Sekaraiama ankeroma negeno'a, antri nehuno koro hu'ne.

¹³Hianagi ankeromo'a anage huno hu'ne, Sekaraiaga korora osuo, na'ankure nunamunka'a Anumzamo'a antahi'neankino, neganaro Elisabeti'a mago ne'mofavre kasentegahie. Agi'a Joni'e hunka antemigahane.

¹⁴Ana mofavre ksentenkeno krimpa so'e nehina muse hugahane. Hanki rama'a vahe'mo'za ana mofavrema ksente kema nentahiza anazanke hu'za muse hugahaze.

¹⁵Na'ankure Ramofo avurera ra vahe trohuno manigahie. Agra waini tine, hanave tinena onetfa hugahie. Na'ankure nerera rimpafi maninenigeno'a Ruotge Avamumo'a agu'afi fre avitegahie.

¹⁶Ana mofavremo'a hakare Israeli vahe'mokizmi zamazeri rukrahe hinke'za, Ramofo Anumza zimire egahaze.

¹⁷Ana nehuno agra Ramofona ugota huno nevuno, Ilaija'ma eri'neankna hanavene avamu'ene enerino, afahemokizmia zmagu'a zmagu'a zmazeri rukrehe hina mofavrezmire ne-enageno keontahi vahe'mokizamia zmazeri rukrehe hinke'za kentahi vahe manisaza zamo'a, Ramo'ma esiazamofo ka retro huntegahie. (Mal 4:5-6)

¹⁸Hanki Sekaraia anage huno ankeromofo asami'ne, nankna hanige'na nagra kena antahina hugahue? Nagra ozafa rogeno, a'nimo'a anahukna huno tvavate'ne higeno,

¹⁹ankeromo'a anage huno asami'ne, nagra ankero ne' Gabrieline, Anumzamofo tva'aonte nemanuankino, Anumzamo hunanteno knare musenke erinka ome asamio huno hunantege'na, eme negasamue. (Dan 8:16)

²⁰Hanki kagra knare ke negasamugenka kamentinti osanku, kagerura orunka mni'nenankeno ana kna forehina kea hugahane.

²¹Hagi megi'a ra mono nompi Sekaraia avega maninaza vahe'mo'za, agafa hu'za zmagesa hakare nehu'za, na'a higeno agru huno Ruotage hu'nea nompina zazakna nemanie hu'za hu'naze.

²²Hianagi agrama megia ne-eno'a kea eme huozami avame name hige'za, zamagrama zmagesama antahizana, mago'aza agru huno routge nompina efore higeno ke'ne hu'za hu'naze.

²³Ra mono nompima kre sramnavu eriza kna'amo vgaregeno, atreno noma'arega vu'ne.

²⁴Mago'a gna evigeno, nenaro Elisabeti amu'ene huno mni frakino mani'negeno, 5fu'a ika enevigeno, amanage huno hu'ne.

²⁵Amazana Ramo asunku hunenanteno vahe'mo'zama mofavre onte a're hu'za nehu'za nagazema eri nenamizana eri atre'nante.

²⁶Elisabeti 6si'a ika amu'ene huno mani'negeno, mago ankeromofo agi'a Gebrieli'e nehimofo Anumzamo huntegeno, Galili kaziga osi kuma Nazaretie nehaza kumate uhanatino,

²⁷Maria'a vene omase'nea mofara, Josefe Deviti negeho a' erigahie huza huhampriante'naza mofate uhanati'ne.

²⁸Ana ankeromo Mariante ehanatino anage hu'ne, knare kne Mariaga, Anumzamo'ma avesigantenemoka, Ramo'a kagrane mni'ne.

²⁹Hianagi ana mofamo'a, ana musenkema nentahino'a, antahintahi hakare nehuno, ama kea nankna agu'agesa me'nea musenke nehie huno hu'ne.

³⁰Ana higeno ankeromo'a ana mofamofonku anage hu'ne, korora osuo Mariaga, na'ankure Anumzamo'a kagrira antahi muse hunegante.

³¹Hanki kma antahio, kagra kamu'ene hunka ne'mofavre ksentenka agi'a, Jisasi'e hunka antegahane.

³²Ana mofavremo ra vahe fore nehinke'za vahemo'za, Marerisa Anumzamofo Mofavre nehnageno, negeho Deviti kini trara, Anumzamo'a eri aminigeno kva hugahie.

³³Agra, Jekopu nagate kegva huzmantevava nehinkeno, kini erizama'amo ene Agrama kegva hania kumamo'a mevava hugahie.

³⁴Maria'a anage huno ankeromofo asami'ne, inankna huno fore huku higenka nehane, nagra venena omasenoanki?

³⁵Ankeromo'a kenona'a anage huno asami'ne, Ruotge Avamumo kagrite ne-enkenka, Marerisa Anumzamofo hihamu'amo refitegantegahie. E'ina hu'negu ksentesana Mofavremo'a ruotge hanigeno, Anumzamofo mofavre hu'za hugahaze.

³⁶Hanki ko, negamomo Elizabeti'a anahukna huno tavava'tefinka amu'ene hu'ne. Naravo a' manino mofavre onte are hu'nazanagi, menina amu'ene higeno' 6si'a ika agatere'ne.

³⁷Na'ankure Anumzamofontera mago'zamo'e huno amuho osugahie.

³⁸Higeno Mari'a anage hu'ne, izo nagra Ramofo kazokzo eriza are, atregeno kema hana kante efore hino, higeno ankeromo atreno vu'ne.

³⁹Ana knafina Maria agona kumatega ame huno otino Judia kaziga rankumate uhanatino,

⁴⁰Sekaraia nompi umarerino, knare kne huno Elisabetina humuse huntene.

⁴¹Mariama knare kne huntea kema, Elisabetima netahigeno'a, rimpafi mani'nea mofavremo muse nehuno, haru huno marerigeno Ruotage Avamumo'a Elisabetina agu'afi frevite'ne.

⁴²Ana higeno ana amo'a ranke huno, maka a'nemofo asomura agatereno kagrira rama'a asomu Anumzamo'a huneganteno, karimpafima mani'nea mofavrea asomu huntene!

⁴³Nagra iza'na mani'nogeno Ranimofo nerera'a, eno eme nage.

⁴⁴Hanki antahio, kagra humuse hunka, anama knare kne hunka nehankena nentahugeno'a, narimpafi mani'nea mofavremo'a haru huno marenerino muse hu'ne.

⁴⁵Hagi Ramo'ma hu'nea kemofo kamentinti hanku, asomu hunegantena, anama hu'nea kemo'a, kagripi avufa'a efore hugahie.

⁴⁶Maria amanage hu'ne, nagu'amo'a Ramofo ragi amigeno,

⁴⁷nagri avamunimo'a naguvazi Anumzamofo agafa huno muse huntene.

⁴⁸Na'ankure Agra anteramina kazokzo eriza vahe'ama mni'noana navu'navara nage'ne. Menima agafa huno vaniana maka vahe'mo'za Anumzamo'a asomu hunte'ne hu'za hugahaze.

⁴⁹Na'ankure Hihamu'ane Anumzamo'a raza hunante'ne, Agri agi'a ruotage hu'nemo'e.

⁵⁰Henkama efore'ma huterema hanaza nagapinti'ma, iza'zo Agriku koro hanamokizmia asuragizmanteno zamaza hugahie.

⁵¹Ramo'a hanavenentake avu'avaza azanura eri fore'ma nehuno, antahintahizmifima zmagima eri'za mareneri'za vahera zmahe panani hu'ne.

⁵²Agra hanave kini vahera, kini tratetira zmazuhu fenkama netreno, hanave'a omane vahera ana kini trate zamavre antene.

⁵³Zmagaku haza vahera, knare'zanu erivite'nezmanteno, fenomo avitenea vahera, zmaza zamavapa huzmantege'za nevaze.

⁵⁴Agra eri'za vahe'a Israeli vahe zmaza nehuno, asunku huzmantegahue huno huvempa hu'nea kegura agera nokanie.

⁵⁵Tahi'mofo koma mevava huvempa ke Abrahanku asamino, agehemo fore hunante fore hunante knane knane hu'noma esia vahe zamaza huku hunte'ne.

⁵⁶Maria anage huno Elisabeti asamiteno, 3'a ika agranena maniteno noma'arega vu'ne.

⁵⁷Hagi Elisabeti mofavre kasentesia kna egeno, ne' mofavre ksente'ne.

⁵⁸Ana a'mofo nagamo'zane, agri kumapi nagamo'za Ramofo asuntagizamo'ma Elisabetinte'ma eama hu'nea kema nentahiza rama'a musenkase hu'naze.