Luku 1:11-31

¹¹Sakatayame kandeamopa Kamongonya enjele mende ipupala tunduma pingi yangenge olata toko kingi tolae-kaita singi dokonya ipao katea-pyaa.

¹²Kateamopa Sakatayame baa kandatala walu lao etete paka kaya-pyaa.

¹³Dokopa enjele dokome baa lamaiyoo, “Sakataya, emba paka nakayape! Embame mende Gote-kisa tee lao loma sipino doko baame sepelyamona, embanya enda Ilisapeta dokome wane ane mende manjakatana, embame wane doko kenge Jone lape.

¹⁴Emba mona yaepao eteke kayao katate. Wane doko mandipatamopa, endakali longo dupame mona yaepatamiaka.

¹⁵Baa Kamongonya enomba dokonya andake joo katata. Baa bia akipi waenepi dupa etete nanao katata. Baa endanginya ingiandaka pititamopa Oli Sipitisa doko tee pyao baa-kisa tumbasalanya ipata.

¹⁶Dopa pitamopa baame Isataele endakali longo dupanya mona sakatasakamaitamopa dupame nyakamanya Kamongo Gote doko lao masetami.

¹⁷Oli Sipitisa dokome Ilainja-kisa pupu lao epeamoli pyoo baa-kisa ipatamopa baame Kamongo doko ipatana lao baa wambata. Wambatala baame wanepi takangepi waka joo katenge dupa nyoo pyaseta. Baame Gotenya pii watao minala naenge dupame mana tolao minao paenge endakali dupame masingimali pyoo masina lao minao kapilyeta. Baame endakali dupa depa lakamaitamopa dokaitame Kamongo dokonya depa latae endakali joo katatamina,” enjele dokome dopa lea-pyaa.

¹⁸Dopa leamopa Sakatayame enjele doko lamaiyoo, “Embanya pii leeno doko aipa petala nambame kiningina lao masotope? Namba akali wambake. Nambanya enda dokonya ee kana longo dupa patayakana,” lea-pyaa.

¹⁹Dokopa enjele dokome baa lamaiyoo, “Namba Gepetiele lenge! Namba Gotepa awapa katenge! Gote tangeme embanya pii wai epe dake nambame minakao langya puu lapumosa epelyo.

²⁰Dopana, embame nambanya pii doko kiningi lamo lao masala nayaleno dokonya emba pii laa nayao nengekaita lyokatae katao pii lalo dutupa kiningi jetamo gii doko kandao nyete. Pii dutupanya gii doko ipatamopa angi jetana,” enjele dokome dopa lea-pyaa.

²¹Endakali kateamino dupame Sakataya malisoo kateami-pyaa. Sakataya baa losuu anda andake dokonya aki mendeme minanjipumosa yapa naepelyape lao longo lao masiami-pyaa.

²²Maitakao Sakataya kamanda epeamopa baanya nengekaita lyokeamosa endakali dupame baa losuu anda andake dokonya mendita mende kandalame lamo lao masiami-pyaa. Dokopa baame pii mende nalenya nengekaita lyokatae katao kingimiaka makande pia-pyaa.

²³Dokopa losuu anda andake dokonya Sakatayanya kalai pingi gii doko etapeamopa baa andaka pilyia-pyaa.

²⁴Pilyeteamopa maitakao baanya enda Ilisapeta dokonya inginya wane tee piamopa kana yuungi dupanya andaka yalo petae pitipala pii dapa lea-pyaa:

²⁵“Namba wane namandipala endakali dupanya enombanya elya nyingi doko Goteme koe pyekeana,” Ilisapetame lea-pyaa.

²⁶Ilisapeta doko wane tongata pituu kana tokange pateamopa Goteme enjele Gepetiele doko Galili yuu dokonya yuu taono Nasatete lenge dokonya pena lea-pyaa.

²⁷Yuu dokonya enda mapuakae mende akali Josepe lenge dokonya nyetana latae doko pii lamaiya pena lea-pyaa. Josepe doko Kiŋi Dapiti lenge dokonya tatanya mandipae-pyaa. Enda mapuakae doko kenge Matia lenge-pyaa.

²⁸Enjele Gepetiele dokome Matia peteamo andaka dokonya kolandatala baa lamaiyoo, “Emba mona yaepao pitipi! Kamongo dokome emba kandao mona epe palyetelyamo. Baa embapa awapa kalyambinona,” lea-pyaa.

²⁹Enjele dokome Matianya mona epe palisoo pii dutupa leamopa, Matiame mona andao etete walu lao pii doko aipale mende langilyape lao masia-pyaa.

³⁰Dokopa enjele dokome baa lamaiyoo, “Matia, emba paka nakayape! Goteme emba kandao mona epe palyetelyamo.

³¹Kandeleno, embanya inginya wane ane mende palitamopa mandipala embame baa kenge Jisasa late.