LUKU 19:17-35

¹⁷Ben à bènɛ: Ń kɛ̀, zĩkɛri maa. Lán ń náanɛ vĩ kↄ̃n à féteo nà, nɛ́gↄ̃ iko vĩ wɛ́tɛ mɛ̀n kurinↄa.

¹⁸Gbɛ̃ plaadee mↄ̀ à bè: Dii, n ↄↄ pì àre kɛ̀ lɛo sↄↄro.

¹⁹Ben à bènɛ: Mmↄn sↄ̃, nɛ́gↄ̃ iko vĩ wɛ́tɛ mɛ̀n sↄↄroonↄa.

²⁰Ben gbɛ̃ pãnde mↄ̀ à bè: Dii, n ↄↄɛ kɛ̀. Má ùtɛ kokona bisa kãsãa guu.

²¹Má n vĩa vĩ, zaakɛ n yãnↄↄ zĩ'ũ. Nɛɛ̀ pↄ́ kɛ̀ nɛ́ɛ diɛro sɛ́, nɛɛ̀ pↄ́ kɛ̀ nɛ́ɛ tↄ̃ro kɛ̃.

²²Ben à bènɛ: Zĩkɛri zaa, n lɛ́ bé à n kari kɛ̀. Ń dↄ̃ kɛ̀ ma yãnↄↄ zĩ'ũ, mɛɛ̀ pↄ́ kɛ̀ mɛ́ɛ diɛro sɛ́, mɛɛ̀ pↄ́ kɛ̀ mɛ́ɛ tↄ̃ro kɛ̃.

²³Kɛ̀ ń dↄ̃ lɛ, bↄ́yãnzin nɛ́ɛ ↄↄdaa kɛońnɛ, lɛ tó ma su, mà a pↄ́ sí kↄ̃n à àreoroo?

²⁴Ben à bè gbɛ̃ kɛ̀ aↄ̃ↄ kú gweenↄnɛ: À à ↄↄ pì sía à kpá gbɛ̃ kɛ̀ àre è lɛo kuria.

²⁵Ben wà bènɛ: Dii, à àre lɛo kuri kũna kↄ̀.

²⁶Ben à wèńla à bè: Mɛ́ɛ ooare, gbɛ̃ kɛ̀ pↄ́ vĩin Luda é kaaranɛ. Gbɛ̃ kɛ̀ vĩroo sↄ̃, baa kɛ̀ à vĩi Luda é síamɛ.

²⁷Ma ibɛɛ kɛ̀ aↄ̃ↄ yezi mà kí bleńnɛroonↄ sↄ̃, à mↄ́ńyo kɛ̀ à ń dɛdɛ ma aɛ.

²⁸Kɛ̀ Yesu yã pì ò à yã̀a, ben à dà zɛ́n, èe gaa Yerusalɛmu.

²⁹Kɛ̀ à kà kĩi kↄ̃n Bɛtɛfageo kↄ̃n Bɛtanio sĩ̀sĩ kɛ̀ wè be Kùkpɛ gɛɛzi, ben à a ìba zĩ̀ gↄ̃ↄn plaa

³⁰à bèńnɛ: À gá lakutu kɛ̀ kú a aɛ kɛ̀kãa guu. Tó a gɛ̃, é zaakinɛ bↄ̀rↄ e bàdↄna gwe, gbɛ̃kee e dia zikiro. À poro à suo.

³¹Tó wà a la wà be, à kɛ̀ dia ée poroo, à be Dii bé à yezi.

³²Ben zĩ̀rinↄ gàa, aↄ̃ↄ è lán à òńnɛ nà.

³³Kɛ̀ aↄ̃ↄe zaaki pì poroo, ben à diinↄ ń lá wà bè: À kɛ̀ dia ée zaaki pì poroo?

³⁴Aↄ̃ wèńla wà bè: Dii bé à yezi.

³⁵Ben aↄ̃ sù zaaki pìo Yesunɛ, aↄ̃ ń utanↄ kpàɛa, ben aↄ̃ Yesu dìa.