Luku 11:18-35

¹⁸Dokaita joo Satane baa tangeme wakale pyoloo petala yanda pitamo kandao doko, baame isilyamo tata doko aipa petala katatape? Nyakamame namba kandao Belesapulu mambele nambame enjele koo dupa watao pilino lelyamino.

¹⁹Kiningi, nambame Belesapulu mambele enjele koo dupa watao pyapuli kandao doko, nyakamanya mana nyingi dupame api mambele enjele koo dupa watao pyapimilipi? Dokonya dokaitame, ‘Nyakamame kopeta leami lamona,’ latami.

²⁰Goteme namba kingi ditamopa nambame enjele koo dupa watao pyato kandao doko, Goteme nyakama isala ipatamosana,” lea-pyaa.

²¹“Akali pupu lapae mendeme yanda yandatepi minatae katao baanya anda doko tange isilyamopa baanya oapi dupa auu pyoo singi.

²²Baame yanda yandatepi dupame baa nisetana lao masetamoaka doko, akali etete pupu lapae mendeme ipao baa yanda pimaitala ita minata. Dokopa akali etete pupu lapae dokome yanda yandatepi dupa nyoo nepatala baanya oapi dupa pitaka endakali waka dupa mokosoo maitana,” lea-pyaa.

²³“Endakali mende namba tata joo nakalyamo doko nambanya yandapipi lamo. Dee endakali mendeme namba-pipa endakali nyoo limbala naelyamo dokome endakali dupa saa lasingina,” lea-pyaa.

²⁴“Enjele koo mendeme endakali mende yakinatala dokopa, baa mendasa koto nyoo kalyanya yuu sapu dupanya paelya paena pyoo panda kutingi. Kutao kayapala baame lao pituu, ‘Nambame anda wamba yakineo dokonya dee pilyoo patoo,’ lenge.

²⁵Dopa latala baame anda dokonya pao kandelyamopa, potoma polao yati petae kalyamo kandenge.

²⁶Dopa petae kalya silyasa baame pupala enjele etete koo mendapua lanyepala anda dokonya dee pilyoo ipao katengema. Dokopa akali doko wamba kopeta kateamoaka doko, indupa etete kopeta katengena,” lea-pyaa.

²⁷Jisasame pii lao kateamo gii dokopaka endakali longo kambu piamino dupanya enda mendeme puu lao dapa lea-pyaa: “Wamba emba mandipala andu diamo enda doko mona yaepao pituu pilyamona,” lea-pyaa.

²⁸Dopa lateamopa Jisasame endakali dupa lamaiyoo, “Dopaka doko, Gotenya pii doko soo watao minilyamino endakali dupa kiningi mona yaepao pilyaminona,” lea-pyaa.

²⁹Dee endakali kambu longo dupame Jisasa kateamo dokonya ipao kapata-kapata piaminopa, Jisasame dokaita lamaiyoo, “Endakali indupa palelyamino dupa kooma lamo. Dupame kongali mende kandamana lelyaminoaka doko, nambame kongali waka mende pyakala nayatoana, Goteme akali Jonaa-kisa kongali piamo dokoaka makande petae seta.

³⁰Wamba akali Jonaa dokome Gotenya makande petae joo katao yuu Nenepa tange dupame kandeamino dopaka pyoo Endakalinya Ikiningi doko Gotenya makande petae katatamopa endakali indupa kalyamino dupame kandatami.

³¹Wamba Isingi Enda Kuini mendeme yuu Sauta-kaita pituu masingi akali Solomone lenge doko kanjanya kaita etete londe mendenya epea-pyaa. Epeamoaka doko, indupa akali mendeme Solomone etete ita minao ae kalyamo. Tenge dokonya Goteme endakali mokosetamo gii dokopa, Isingi Enda Kuina dokome sakatatala nyakama kosimi latana lao masalapape!

³²Wamba akali Jonaa dokome yuu Nenepa tange dupa pii panao lamaiyamopa dokaitame sepala mona kapilyiaminoaka doko, indupa Jonaa doko ita miningi akali doko ae kalyamo. Tenge dokonya Goteme endakali mokosetamo gii dokopa, Nenepa tange dupame sakatatala nyakama kosimi latamina,” lea-pyaa.

³³“Endakali mendeme lama mende kaiyepala yalo pipenge panda mendenyapi titopene penge nenge lanao setapae mendenyapi setala naenya, endakali andaka kolandatamino dupame tii pitamopa kandao kolandena lao baame lama doko setenge toko ketae dokonya setenge daape!

³⁴Embanya lenge doko embanya yongenya kia joo telyamo. Embanya lenge doko auu pyoo tao payateno kandao doko, emba tii pita. Dopaka doko, embanya lenge lapo tao payateno kandao doko, emba iminjeta.

³⁵Aopyoo latala emba-kisa tii pipae silyamo doko iminjetae jetana kandao isoo katape!