Luku 11:10-40

¹⁰Sǝlǝmǝlʋ kɛ pɑ hɑɑkɩ, nɑ pɛɛkǝlʋ hikiɣinɑ, nɑ mɑtʋ kɛ pɑ tʋ́lǝ́ɣɩ́.

¹¹Wulee mǝ tɑɑ ɑwe pǝyɑɣɑ sǝlǝmɑ-ɩ potopoto nɑ pʋntʋ cɛlɛ-kɛɣɛ pǝlɛ ye? Yɑɑ ye kɑ sǝlǝmɑ-ɩ tinte pʋntʋ cɛlɛ-kɛɣɛ tʋm.

¹²Yɑɑ mǝ tɑɑ ɑwe pǝyɑɣɑ sǝlǝmǝnɑ-ɩ yɑtɛ, nɑ pʋntʋ cɛlɛ-kɛɣɛ pǝcɛkɑ?

¹³Ye ɑsɑɣɑɑ mɛ mɩɩ pǝsɑ mǝ piyɑ kɛ kʋpɑntʋ lɑpʋ, Tɑcɑɑ wei ɩ wɛ ɩsɔtɑɑ tɔ ɩ kɑɑ cɛlɑ ɩ Feesuɣu Nɑŋŋtʋ kɛ mpɑ pɑ sǝlǝmǝɣɩ-ɩ tɔ?

¹⁴Yesu loo ɩlɔɣɔhilu kɑɑyɔɣɔtɑɣɑ, ɩlɛnɑ ɩlɔɣɔʋ se. Ɩ se ḿpʋ́ɣʋ́ ɩlɛnɑ kɑmumukɑ sʋʋ yɔɣɔtʋɣʋ nɑ pǝ lɑ sɑmɑɑ kɛ piti kɛ́ sɔsɔm.

¹⁵Mpʋɣʋlɛ pɑ tɑɑ lɛlɑɑ pǝsǝnɑɑ sɩ: Pesepule toŋ kɛ ɩnɩ ɩ tɔɣɔnǝɣǝnɑ ɑlɔɣɑɑ lɛmpɑ.

¹⁶Ɩlɛnɑ Yesu tɔm tʋlɑɑ tɑɑ lɛlɑɑ nɑ́ɑ́ tɔmɩ-ɩ sɩ: Lɑ piti tǝmlɛ nɑ pǝ́ hʋ́lɩ́ sɩ Ɩsɔ toŋ kɛ n lɑkǝnɑ. Pɑ yɔɣɔtɑ ḿpʋ́ɣʋ́ sɩ pɑ nɑɑ ɩ wɑɑlɩ.

¹⁷Yesu nɑ́ cɛkǝnɑ pɑ tɑɑ hʋwɛɛ, ɩlɛnɑ ɩ́ tɔ-wɛ sɩ: Ye kɑwulɑɣɑ wɛɛ nɑ kɑ́ fɛɩ nɔɣɔ kʋlʋmɑɣɑ, nɔɔnɔɔ kɑ yɑwɑɣɑ. Tǝyɑɣɑ ɩ́ wɛ mpʋ, kɛlɛ kɑ yɔkǝɣɩ kɛ́.

¹⁸Ye Sɑtɑnɩ kɑwulɑɣɑ nyǝ́mɑ yooki pɑ tɑɑ pɑ tike, ɩ kɑwulɑɣɑ nyʋɣʋ ntɛ́ kɑ ɩsǝnɑ? Mpi tɔ, mǝ tɔŋ sɩ Pesepule toŋ kɛ mɑ lookinɑ ɑlɔɣɑɑ.

¹⁹Ye Pesepule toŋ kɛ mɑ lookinɑ ɑlɔɣɑɑ ɩsɩɩ mǝ hʋʋkʋɣʋ tɔ, ɩlɛ ɑwe toŋ kɛ mǝ pǝyɑlɑɑ nɑ́ lookinɑ pɑ nyǝ́mɑ? Tǝnɑɣɑ pɑ mɑɣɑmɑɣɑ pɑɑ kʋnɑ mǝ tɔm.

²⁰Amɑ ye Ɩsɔ toŋ tɑɑ kɛ́ mɑ lookinɑ ɑlɔɣɑɑ, ɩlɛ Ɩsɔ Kɑwulɑɣɑ wɛ mǝ tɛɛ mǝ tɛɛ kɛlɛ.

²¹Yʋlʋ toŋ tʋ ɩ́ tɑŋɑ ɩ tǝyɑɣɑ kɛ teu nɑ yoou wontu, pʋlʋpʋ ɩɩ tokiɣinɑ ɩ wɛnɑʋ.

²²Amɑ wei ɩ kǝlɑ-ɩ toŋ tɔ ɩ́ kɔmɑ nɑ ɩ́ kʋlɩ ɩ tɔɔ nɑ ɩ́ pǝsɩ-ɩ, ɩlɛ ɩ lɛɛkǝɣɩ ɩ yoou wontu nti ɩnɩ ɩ tɑɑkɑɣɑ tɔɣɔ, nɑ ɩ́ mǝŋnɑ ɩ wɛnɑʋ mpɩ, nɑ ɩ́ tɑlɑ lɛlɑɑ.

²³Wei ɩ fɛɩ mɑ tɔɔ, pʋntʋ kɛ́ mɑ kolontu kɛ́. Wei ɩɩ sǝŋnɑ-m tɔɔsʋɣʋ tɔ, ɩ yɑɑsǝɣɩ kɛ́.

²⁴Ḿpʋ́ɣʋ́ Yesu tɔmɑ sɩ: Ye pɑ loowɑ ɩlɔɣɔʋ, wʋlɑɣɑ tɑɑ kɛ́ ɩ cɔɔkɩ sɩ ɩ́ hɛɛsɩ. Ɩ lɑŋǝɣɩ, ɩlɛnɑ ɩ́ tɑɣɑnɩ ɩ tɑɑ sɩ: Mɑɑ mǝlɩ tǝyɑɣɑ ŋkɑ kɑ tɑɑ mɑɑ lɩɩwɑ tɔɣɔ.

²⁵Ɩ tɑkɩ kɛlɛ kɑ tɑɑ, ɩlɛ ɩ kɑ́ mɑɣɑnɑ pɑ hɑsɑ-kɛ nɑ pɑ́ tɑɣɑnɩ pǝ tǝnɑɣɑ teu.

²⁶Pǝlɛ tɔ, ɩ puki kɛ́ nɑ ɩ́ cɑɑ ɑlɔɣɑɑ lɛlɑɑ mpɑ pɑ kǝlɑ ɩnǝɣɩ ɩsɑɣɑtʋ tɔɣɔ nɑɑtosompɔɣɔlɑɣɑ, nɑ pɑ́ kɔɔ nɑ pɑ́ cɑɣɑ tǝyɑɣɑ ŋkɛ kɑ tɑɑ. Ɩlɛnɑ lɔŋ nyǝntʋ nɑ́ɑ́ mǝlɩ nɑ tǝ́ lɑ sɑnɑ nɑ nɔɔnɔɔ nyǝntʋ.

²⁷Yesu tɔŋnɑ ḿpʋ́ɣʋ́ yɔɣɔtʋɣʋ, ɩlɛnɑ ɑlʋ nɔɣɔlʋ ɩ yɔɣɔtǝnɑ nɔɣɔ sɔsɑɣɑ kɛ sɑmɑɑ tɑɑ sɩ: Pʋwɛ nyɑ́ too wei ɩ lʋlɑ-ŋ nɑ ń mʋsɩ-ɩ tɔ, ɩ nyʋleleŋ wɛ sɔɣɔntʋ.

²⁸Ḿpʋ́ɣʋ́ Yesu cɔ ɑlʋ ɩnɩ sɩ: Mpɑ pɑ nɩɩ Ɩsɔ Tɔm nɑ pɑ́ tɔkɩ-tɩ, pʋntʋnɑɑ ntɛ́ nyʋleleŋ nyǝ́mɑ te.

²⁹Sɑmɑɑ tɔŋnɑ-ɩ nyǝkʋɣʋ kɛ sɔsɔm, ɩlɛnɑ ɩ́ sʋʋ ɩ fɑɑci tɑɑ sɩ: Kʋfɑlɑŋ yǝlɑɑ pɑnɛ ɑsɑɣɑɑ kɛ́. Piti tǝmlɛ nte tǝ hʋ́lǝ́ɣɩ́ sɩ Ɩsɔ lɑkǝnɑ tɔɣɔ mpɛ pɑ cɑɑkɩ. Ɩlɛ pɑ kɑɑ nɑ nɑtǝlɩ, ye pǝ tɑɣɑ Yonɑɑsɩ nyǝntɛ.

³⁰Ɩsǝnɑ mpi pǝ lɑpɑ Yonɑɑsɩ kiŋ tɔ pǝ hʋlɑ Ninifi nyǝ́mɑ kɛ́ sɩ Ɩsɔ lɑkǝnɑ. Nɑ mpʋ ɩnɩ tɔtɔɣɔ Yʋlʋ Pǝyɑɣɑ mɑ́ mɑ nyǝntʋ kɑ́ hʋ́lɩ́ kʋfɑlɑŋ yǝlɑɑ tɔtɔ sɩ Ɩsɔ lɑkǝnɑ.

³¹Ye pǝ tɑlɑ hʋʋlɛ wule, ilim mpǝtǝŋ tɔɔ wulɑʋ ɑlʋ nyǝŋ kɑ́ kʋ kʋfɑlɑŋ yǝlɑɑ pɑnɛ pɑ tɔm kɛ mpi pǝ tɔɔ ɩ́lɛ́ ɩ kɑ lɩɩ hɑtoo tɛtʋ pooluŋ tɑɑ nɑ ɩ́ kɔɔ, sɩ ɩ nɩɩkɩ ɩsǝnɑ Sɑlʋmɔŋ yɔɣɔtǝnɑ lǝmɑɣɑsɛɛ tɔ. Pǝ́cɔ́ pʋlʋpʋ wɛ cǝnɛ nɑ pǝ́ tɛɛ Sɑlʋmɔŋ tǝcɑɣɑcɑɣɑ.

³²Ye pǝ tɑlɑ hʋʋlɛ wule Ninifi nyǝ́mɑ kɑ́ kʋ kʋfɑlɑŋ yǝlɑɑ pɑnɛ pɑ tɔm. Pǝ tɑɣɑ pʋlʋ, kʋyɑŋku pɛlɛ pɑ nɩɩ Yonɑɑsɩ wɑɑsʋ tɔ, pɑ yelɑ pɑ ɩsɑɣɑtʋ kɛ kpɑkpɑɑ kɛ́. Pǝ́cɔ́ pʋlʋpʋ wɛ cǝnɛ nɑ pǝ tɛɛ Yonɑɑsɩ ɩnɩ.

³³Nɔɣɔlʋ ɩɩ mʋsǝɣɩ fǝtǝlɑ nɑ ɩ́ ŋmɛsɩ-ɩ, yɑɑ ɩ́ pɑmɩ-ɩ nyɑnɑɣɑ tɛɛ. Amɑ ɩ sɩɩ-ɩ timpi tɑɑ ɩ́ wɛɛ pɩɩ nɑɑ yǝlɑɑ tǝnɑ tɔɣɔ. Ɩlɛnɑ mpɑ pɑ kɔŋ tɔ, fǝtǝlɑ kɔkɔ nɑ-wɛ.

³⁴Ḿpʋ́ɣʋ́ pǝ wɛɛ nɑ nyɑ́ ɩsɛ. Anɩ ɑ kɛnɑ nyɑ́ tɔnʋɣʋ pǝlimile fǝtǝlɑ. Ye nyɑ́ ɩsɛ ɩ́ nɑɑkɩ teu, pǝ wɑɑsǝɣɩ nyɑ́ tɔnʋɣʋ tǝnɑɣɑ. Amɑ ye nyɑ́ ɩsɛ ɩ́ yʋlʋmɑɑ, nyɑ́ tɔnʋɣʋ tǝnɑ pǝlimile wɛ sǝkpɛtʋɣʋ tɛɛ kɛ́.

³⁵Lɑ lɑɑkɑlɩ, pǝ tɑɑ kɔɔ nɑ ɩsǝnɑ n nɑɑkɩ tɔ pǝ mǝlɩ sǝkpɛtʋɣʋ.

³⁶Pǝ wɛ mpʋ tɔ, ye n nɑɑ tǝcɛɩcɛɩ, nɑ pǝ fɛɩ-ŋ tǝyuɣulee, n nɑɑ teu kɛ́, ɩsɩɩ fǝtǝlɑ kɔkɔ nɑɑkʋɣʋ yʋlʋ tɔ sǝkpɛtʋɣʋ fɛɩ.

³⁷Yesu tɛmɑ yɔɣɔtʋɣʋ kɛ mpʋ, ɩlɛnɑ Fɑlisɑ nɔɣɔlʋ ɩ́ yɑɑ-ɩ sɩ ɩ́ sʋʋ ɩ tɛ nɑ ɩ́ nyɔɔ lʋm. Ḿpʋ́ɣʋ́ Yesu sʋʋwɑ Fɑlisɑ tɛ nɑ ɩ́ niki tɔɣɔʋ.

³⁸Fɑlisɑ nɑwɑ ɩ tɔkɩ nɑ ɩ́ nyɔɔkǝnɑ ɑsilimɑ, ɩlɛnɑ pǝ lɑpɩ-ɩ hɑ.

³⁹Tǝnɑɣɑ Tɑcɑɑ tɔmɑ-ɩ sɩ: Anɩ Fɑlisɑnɑɑ mǝ nyǝntʋ ntɛ́ mpʋ. Iyisi nɑ nyǝnɑsɩ wɑɑlǝnɑɑ kɛ ɩ́ nyɑɑlǝɣɩ tǝlɑɩlɑɩ. Amɑ pǝ kpɑɣɑʋ mǝ tɑɑnɑɑ tɔ, ŋmɩɩlǝm nɑ ɩsɑɣɑtʋ pǝ hʋwɛɛ mɑɣɑlǝnɑ.

⁴⁰Lǝmɑɣɑsɛɛ fɛɩnɑɑ mɛ, Ɩsɔ wei ɩ ŋmɑ yʋlʋ tɔɔ tɔ, ɩ́lɛ́ ɩ wɛnɑ ɩ tɩ nɑ wei ɩ ŋmɑ yʋlʋ lotu tɑɑ tɔ yɛɛ?