Luku 10:6-26

⁶Kutupa koto da pa꞉ta꞉ a꞉nda꞉ peliaasa꞉ ekina꞉ hone wopu u hala꞉ hali ma꞉nda꞉ haya꞉ka꞉na꞉ta꞉ kota꞉ a꞉nda꞉ peliaasa꞉ pi le ekita꞉ ipiki pa꞉ta꞉ pa wina꞉ lapa꞉peke. Dia꞉ya꞉ka꞉na꞉ta꞉ kota꞉ naka꞉ hande a꞉nda꞉ peliaaso pita꞉ pao mia꞉peke.

⁷E pokao hala꞉ hali ipika꞉ yenkita꞉ ota꞉ mea꞉peke ya꞉la꞉ ekina꞉ da lumbu na likita꞉ homeke da pa꞉ta꞉ pa hao hata꞉ ne ikali alekemanu kimika꞉na꞉ta꞉ pa napa꞉peke.

⁸Kutupa ikita꞉ da yu ma꞉nda꞉ pa꞉ta꞉ pemeka꞉na꞉ta꞉ koto pa꞉ta꞉ haleme wanda꞉halima꞉ iki pa꞉ta꞉ ta꞉na꞉ma꞉ homolo hata꞉ hatuku mea nemanu kimika꞉na꞉ta꞉ kota꞉ pa napa꞉peke.

⁹Koto da yu pa꞉ta꞉ yeni haleme wanda꞉hali wopu mea epeapa꞉peke. Kutupa koto pa꞉ta꞉ haleme wanda꞉hali pa꞉ta꞉ta꞉ Koda꞉na꞉ Kilu Tombuao Hala꞉ ekita꞉ iki teke pa꞉ta꞉ amba꞉ opolo a꞉pa꞉la꞉me lapa꞉peke.

¹⁰Koto pa꞉la꞉pate da yu ma꞉nda꞉ pa꞉ta꞉ pemeka꞉na꞉ta꞉ mo wanda꞉halima꞉ iki ika꞉ da pa꞉ta꞉ na hatuku pemeka꞉na꞉ta꞉ kota꞉ ikana꞉ma꞉ mo pota꞉ nina꞉ pua hata꞉ alota꞉

¹¹Ika꞉ daoni tukiki pa꞉ta꞉ ula꞉ dokolota꞉ nika꞉ ankena꞉ ta̱la̱꞉la̱꞉ ekita꞉ iki pa꞉ta꞉ kone koto tandela꞉neasoma꞉pate doeki homeke hone wipee laata꞉ Koda꞉na꞉ Kilu Tombuao Hala꞉ ekita꞉ iki teke siki pa꞉ta꞉ koto epea꞉me hone wotu wia꞉pa꞉peke lapa꞉peke.

¹²I̱ma꞉ iki pa꞉ta꞉ ota꞉ alome. Hande pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ Koda꞉ma꞉ mo Sodomo halo pa꞉la꞉ a꞉ta꞉ma꞉ homa꞉la꞉ ekita꞉ mo hande daoni pa꞉ta꞉ halo pa꞉la꞉ ekita꞉ ota꞉ haka꞉ta꞉pao ankulao halieke alome leekeme.

¹³A꞉ta꞉ tieke Kotaasini daonio. A꞉ta꞉ tieke Betesaida daonio. I̱ma꞉ mo ipiliki pa꞉ta꞉ na handeke haumanu paeyao a꞉nda꞉ mo hande daoni yaapo Taiya Saidoni pa꞉ta꞉ pua꞉ka꞉na꞉ yoluta꞉ kota꞉ koto da yaapo pa꞉ta꞉ haleme wanda꞉hali ika꞉ puki lekelemeka꞉ta꞉me laa Koda꞉ma꞉ handena꞉ta꞉ busa꞉ pitikimanu wepia yamaata꞉ lanka꞉ apolo kitulu pimime. I̱ma꞉ ipiliki pa꞉ta꞉ta꞉ ota꞉ pi alome. Mo pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉

¹⁴Koda꞉ma꞉ mo Taiya Saidoni yaapo pa꞉ta꞉ halo pa꞉la꞉ a꞉ta꞉ma꞉ homa꞉la꞉ ekita꞉ mo ipiliki Kotaasini Betesaida yaapo pa꞉ta꞉ kulu pa꞉la꞉eki ota꞉ haka꞉ta꞉pao ankulao halieke.

¹⁵Kutupa Kapeneamio. Neketa꞉ naka꞉ homeke oli ya nane mea a꞉meiyalueke hone wipe. Neketa꞉ oni ti to hala꞉ pa꞉ta꞉ mea lopaalieke leekeme.

¹⁶Yesuma꞉ ipika꞉ disaipolo haliweki pa꞉ta꞉ alota꞉ Ma꞉nda꞉ epima꞉ ika꞉ pi opia꞉ka꞉na꞉ta꞉ kota꞉ yaka pi kone opita꞉la꞉me. Ma꞉nda꞉ epima꞉ iki kiaeya꞉ka꞉na꞉ta꞉ ota꞉ I̱ kone kiaasa꞉me. Kutupa make hali epima꞉ I̱ kiaeya꞉ka꞉na꞉ta꞉ mo I̱ tapaeya꞉ hali kone kiaasa꞉me leekeme.

¹⁷Mo hande 72 haliwekita꞉ ta꞉na꞉ tiekema꞉ homolo hata꞉ paa opolo epemekeme. Tekehalio. Nikana꞉ma꞉ naka꞉ biki laaso hata꞉ teliolo hamono kone mo hoke temoko manuma꞉ nika꞉ pi ota꞉ opimime lemekeme.

¹⁸Yesuma꞉ ika꞉ pi hombo peaaso alota꞉ I̱ma꞉ Sadani oli ya nane yama꞉ ti tekele manda꞉na꞉ do kenkena꞉ lopea꞉ ekita꞉ handoa꞉me.

¹⁹Opua꞉pe. Ikana꞉ma꞉ mo ketomanu make tei halimanu make da꞉ka꞉pa꞉ tombuamena꞉ make mo a꞉nda꞉ tunkuliki hoke temokona꞉ honkopu paeyao lu tombuao bepolamina꞉ta꞉ ya bikina꞉ welema꞉ iki handeteke halieke. Koto ekina꞉ta꞉ ikita꞉ ala꞉ta꞉ ma꞉nda꞉ma꞉ na hoeyaalieke.

²⁰Koto pa꞉la꞉ma꞉ mo hoke temoko manuma꞉ ika꞉ pi opua pilia꞉eki pa꞉ta꞉ ta꞉na꞉ma꞉ na homa꞉pa꞉peke. Pate ika꞉ bikita꞉ amba꞉ hepeni nane wape pea ula꞉ma꞉ ta꞉na꞉ma꞉ homa꞉pa꞉peke leekeme.

²¹Koto natena꞉ta꞉ mo Holi Sipitidima꞉ Yesu pa꞉ta꞉ epeke ta꞉na꞉ pita꞉la꞉ ekima꞉ tumbieketa꞉ Yesuma꞉ alota꞉ Apa꞉o. Oli ya do kenke yaapona꞉ Tekehalio. I̱ma꞉ neke pa꞉ta꞉ Ta꞉na꞉e alome. Ekipeke nakana꞉ma꞉ mo hande hone wotu u tekele peleme wanda꞉hali make mo sukulu wotu peleme wanda꞉hali ameda pa꞉ta꞉ a꞉mbao wina꞉ le hau manuta꞉ pa mo panake wekiwandiki sunu pa꞉ta꞉ wala꞉leke handa alome. Aowe Apa꞉o. Koto ekita꞉ naka꞉ hone pieke yekeeki yaena꞉yeke pina꞉ aleme leekeme.

²²Yaka Apa꞉ma꞉ta꞉ ala꞉ta꞉ ala꞉ta꞉ paeyao sikita꞉ I̱ pa꞉ta꞉ ka꞉la꞉me. Mo Eiyeketa꞉ ma꞉nda꞉ma꞉ hone na ula꞉pate ipika꞉ Atekema꞉ homeke hone ula꞉me. Kutupa Ateketa꞉ ma꞉nda꞉ma꞉ hone na ula꞉pate ipika꞉ Eiyekema꞉ homeke hone ula꞉me. Kutupa make mo Eiyekema꞉ ipika꞉ hone pilia꞉ wanda꞉hali pa꞉ta꞉ta꞉ ipika꞉ Ateke walea꞉ka꞉na꞉ta꞉ kota꞉ ikana꞉ma꞉ homeke Ateke hone wilimikie leekeme.

²³Kutupa Yesuma꞉ ika꞉ honumake siki hata꞉ ipika꞉ disaipolo haliweki pa꞉ta꞉ la꞉ka꞉la꞉ moneaaso alota꞉ Ikita꞉ ta꞉na꞉ma꞉ homa꞉pa꞉peke. Ikana꞉ma꞉ handeleme ale handolo peleme ekina꞉ loa꞉me.

²⁴I̱ma꞉ iki pa꞉ta꞉ loa꞉ma꞉ mo amba꞉ potopede haliweki wopu make kini haliweki make ikana꞉ma꞉ handeleme alemanu handuluekema꞉ taapemekepate handa꞉peke na yaalo make ikana꞉ma꞉ opitelemeeki opuluekema꞉ pimikipate opua꞉peke ana꞉ na piekeme leekeme.

²⁵Mo Lo Pi walo hayeke hali homekema꞉ Yesu tamuluekema꞉ la handolo alota꞉ Disao. Deto hala꞉eki muluekema꞉ eki pionope laa lota꞉ piekeme.

²⁶Koto leeke Yesuma꞉ ipika꞉ pi hombo peaaso alota꞉ Mo hande Baibolo pi manuma꞉ta꞉ eki ala꞉pe. Nakana꞉ma꞉ta꞉ ekipa hone wilipe leekeme.