Luke 4:4-19

⁴Jesus ga helekai, “Ma guu lawa di hihi i lodo di Beebaa Dabu boloo, ‘Ma hagalee go nia palaawaa la hua ala e mee di haga mouli tangada.’”

⁵Setan gaa lahi labelaa a Mee gi di gowaa nnoonua, ga haga mmada a Mee gi nia henua huogodoo i henuailala i tama madagoaa bodobodo,

⁶ga helekai gi mee, “Au ga gowadu gi di Goe nia mogobuna mahi huogodoo aanei mo nia maluagina huogodoo. Huogodoo gu dugu mai gi di au, gei au e mee hua di wanga nia maa gi tangada dela e hiihai ginai au.

⁷Nia mee aanei huogodoo ga gowadu gi di Goe, maa Goe ga daumaha mai.”

⁸Jesus ga helekai, “Ma guu lawa di hihi i lodo di Beebaa Dabu boloo, ‘Daumaha ang gi Dimaadua go doo God, go Mee hua dela e hai hegau ginai goe!’”

⁹Setan gaa lahi labelaa a Mee gi Jerusalem, gaa dugu a Mee gi hongo tahuhu o di Hale Daumaha, ga helekai gi Mee, “Maa goe di Tama ni God, hobo ia gi daha mo di gowaa deenaa.

¹⁰Idimaa, ma guu lawa di hihi i lodo di Beebaa Dabu boloo, ‘God ga helekai gi ana gau di langi gi benabena ina Goe gi humalia.’

¹¹“Guu hai labelaa boloo, ‘Digaula gaa kumi laa Goe gi dee tale oo wae gi nia hadu.’”

¹²Jesus ga helekai, “Ma guu lawa di hihi boloo, ‘Goe hudee hagamada ina Dimaadua, go doo God.’”

¹³Di madagoaa Setan ne lawa di hagamadamada Jesus, gei mee ga hagatanga gi daha mo Mee i tama madagoaa bodobodo.

¹⁴Jesus gu maaloo mai i di Hagataalunga Dabu, ge Ia gaa hana gi muli gi Galilee. Dono longo guu dele i nia madagowaa huogodoo ala i golo.

¹⁵Gei Mee e hai ana agoago i lodo nia synagogee digaula, huogodoo gu haga hagaamu a Mee.

¹⁶Jesus gaa hana gi Nazareth, di gowaa dela ne tomo aga ieia, ga ulu gi lodo synagogee i di Laangi Sabad be dana hai nogo haihai. Gei Mee ga duu aga belee dau dana Beebaa Dabu.

¹⁷Gei digaula ga gaamai di beebaa soukohp Isaiah gi Mee, ge Ia gaa huge di beebaa deelaa, gaa dau di gowaa dela e hihi boloo,

¹⁸“Di Hagataalunga o Dimaadua la gu i dogu baahi. Mee gu hagatulu Au gi agoago ina di Longo Humalia ang gi digau hagaloale. Mee ne hagau mai Au gi hagadele ina gi digau ala e lawalawa gi maahede, mo digau ala e dee gida gi gidee, gi haga maahede ina digau ala e noho i lodo di haingadaa,

¹⁹gi hagadele ina bolo di madagoaa gu dae mai, go di madagoaa Dimaadua e haga dagaloaha ana daangada.”