Luke 19:36-44

³⁶Meke totoso korapa koi la koasa tuna doṉ'ki se Zisu, si ivara ni rina tinoni pa siraṉa sari na dia poko.

³⁷Meke tata la pa Zerusalema se Zisu, koasa siraṉa gore pa Toqere Olive, sa puku vinarigara lavata tadi Nana disaepeli, si podalae velavela vahesia rini sa Tamasa, koari doduru tinavete variva magasa pu ele dogori rini.

³⁸Zama guahe si arini: “Mani tamanae sa Baṉara pu mae pa korapa pozana sa Tamasa! Na binule si koa pa Maṉauru, meke tava lavata sa Tamasa panaulu,” gua si arini.

³⁹Meke kaiqa rina Parese koasa kobi tinoni si zama la koe Zisu, “Titisa, Mu gegesi sari mua disaepeli!” gua si arini.

⁴⁰Meke olaṉa la se Zisu, “Hinokara sapu tozini gamu Rau, sapu pana mokomoko si arini, si kote velavela sari na patu,” gua si Asa.

⁴¹Sipu tata kamo la ia Zisu sa popoa Zerusalema, meke dogoria Sa si kaboa Sa si asa.

⁴²Zama si Asa, “Kei, gamu na tiena sa popoa Zerusalema, be hite gilania mo gamu kamahire sa ṉatina sa binule be leana, ba kamahire si tava paere koa gamu si asa.

⁴³Korapa mae sa totoso sapu kaqu mae sari na mia kana, meke kuria si keke baragoba nomana pa vari likohaena sa mia popoa, meke kaqu koa vari likohaeni gamu rini.

⁴⁴Kaqu huara va inetia rini sa popoa Zerusalema, meke kaqu va mate gamu rini si gamu pu koa pa korapadi rina baragoba. Lopu keke patu pa mia popoa si kote varihakei hola, sina lopu hite doṉo gilania gamu sa totoso sapu mae sa Tamasa pude harupu gamu!” gua se Zisu.