Luke 19:10-37

¹⁰Ura sa Tuna na Tie si mae pude hata ia, meke harupu pule nia si asa sapu muliuṉu,” gua se Zisu.

¹¹Pa totoso asa sipu korapa va avosia rina tie sari nana zinama, si balabala ia rina tie sapu tata hokara mo sa totoso, sapu kote vura koa rini sa Binaṉara te Tamasa, gua. Ura pa dia inene la, si ele tata kamo pa Zerusalema si Asa, ke tozia pule Sa koa rini sa parabolo hie,

¹²meke zama si Asa: “Keke tie pa tututi baṉara, si taluarae la pa keke popoa pa seu, pude la tava turu baṉara si asa, beto meke kote pule mae baṉara pa nana popoa.

¹³Ba sipu lopu ele taluarae sa, si tioki sa sari ka manege puta nana nabulu, meke hopeke hia poni poata sa, meke tozi ni sa, ‘Tavetavete ni sari poata hire, mamu va toqoli, osolae kaqu pule mae si rau,’ gua si asa.

¹⁴Ego, taluarae si asa, ba sari na tie pa nana popoa soti si kukiti nia si asa, ke va garunu luli la nia rini sa zinama koasa ṉati baṉara pa popoa sana meke zama guahe: ‘Lopu hiva nia gami sa tie sana pude koa baṉara koa gami,’ gua.

¹⁵Ba totoso tava turu baṉara sa, meke pule mae, si tioki sa sari kasa nana nabulu sara, pude hopeke mae va vurai sari na tinoqolodi rina poata pu hopeke poni sa, gua.

¹⁶Sa nabulu kekenu si mae, meke zama, ‘Baṉara, va vurai rau si ka manege puta poata qolo pule,’ gua si asa.

¹⁷‘Leana hola sa mua tinavete, na nabulu leamu si goi! Sina ele ta ronu si goi koa keke tiṉitoṉa hitekena, ke va palabatu igo rau koari ka manege puta vasileana,’ gua sa nana baṉara.

¹⁸Beto si mae pule sa nabulu vina rua, meke zama, ‘Baṉara, va vurai rau si ka lima poata qolo pule, koasa mua poata,’ gua si asa.

¹⁹Meke zama sa nana baṉara, ‘Va palabatu igo rau si goi koari ka lima vasileana,’ gua si asa.

²⁰Beto si mae gana si keke nabulu pule, meke zama, ‘Baṉara, hie sa mua poata qolo, hade tome vekoa mo rau pa keke poko hite.

²¹Matagutu nigo qua, sina keke tie tasunamu si goi. Hoke vagia goi sa mua sapu lopu veko sotia telemu, meke hoke pakepakete si goi pa mua vasina sapu lopu uma sotia telemu,’ gua si asa.

²²Meke zama la koasa sa nana baṉara, ‘Na nabulu kaleamu si goi! Kaqu zutugo rau si goi koari na mua zinama soti telemu! Nake gilanau mua mo sapu keke tie tasunaqu si rau, sapu hoke vagi qua hinia koari na ginani vasina lopu lelete si rau, meke hoke pakepakete vasina lopu taburu kiko si rau.

²³Ba na vegua ke lopu la va nuquria goi pa beṉ'ki sa qua poata, pude totoso pule mae rau si boka vagi pulea rau si asa, meke sa vasinahite tomona sapu va gavoro ia sa?’ gua sa nana baṉara.

²⁴Meke zamai sa baṉara sari kasa pu turu tata vasina, ‘Mae vagia sa poata qolo koa sa, mamu vala nia koasa nabulu sapu ka manege puta nana,’ gua si asa.

²⁵Ba zama la ia rini sa baṉara, ‘Baṉara, ele tagoi sa si ka manege puta nana poata!’ gua.

²⁶Meke olaṉa sa baṉara, ‘Asa sapu ari nana, si kaqu ta poni va soku pule tugo, ba asa sapu loke nana, si kaqu ta vagi palae sa vasina hite sapu tagoa sa.

²⁷Ego, kamahire si mi la vagi sari kasa tie pu kukiti nau, meke lopu hiva nau pude koa na dia baṉara. Turaṉa mae ni, mi va mate beto pani pa kenuqu Rau!’ gua,” gua se Zisu.

²⁸Sipu beto tozia Zisu sa parabolo hie, si taluarae taloa si arini, meke ene va kenu la gua pa Zerusalema si Asa koari Nana disaepeli.

²⁹Totoso tata kamo si arini pa Betipezi meke Betani, sapu pa Toqere Olive, si garunu va kenu lani Sa si karua Nana disaepeli,

³⁰meke tozini Sa si arini, “Mi la koasa vasileana pa kenumia la hoi, meke pana kamo la gamu kara vasina, si kote dogoria gamu si keke tuna doṉ'ki sapu ta sidolo vekona, loke tie si ele koi ia. Rupahia, mamu turaṉa mae nia tani.

³¹Be nanasa gamu ke tie, ‘Pude vegua ke rupahia gamu sia?’ gua, si mi tozi nia, ‘Hiva nia sa Baṉara si asa,’ mi gunia,” gua si Asa.

³²Meke taluarae la sari karua, meke la dogori rini sapu gua putaputa tugo pu tozi ni Zisu.

³³Sipu korapa rupaha vagia ri karua sa tuna doṉ'ki, si mae nanasi rina tie pu ari dia sari karua, “Pude vegua ke rupahia gamu sia?” gua si arini.

³⁴Meke olaṉa sari karua, “Na hiva nia sa Baṉara,” gua si arini.

³⁵Meke turaṉa la nia rini koe Zisu sa tuna doṉ'ki, meke ivara va hake lani rini pa mudina sari dia poko, meke va habotu la ia rini se Zisu.

³⁶Meke totoso korapa koi la koasa tuna doṉ'ki se Zisu, si ivara ni rina tinoni pa siraṉa sari na dia poko.

³⁷Meke tata la pa Zerusalema se Zisu, koasa siraṉa gore pa Toqere Olive, sa puku vinarigara lavata tadi Nana disaepeli, si podalae velavela vahesia rini sa Tamasa, koari doduru tinavete variva magasa pu ele dogori rini.