Luke 12:39-48

³⁹Jesus-elan angka ingwer-anem ikwer-rnem ilenh. “Irrtyert-awarr alhew anyelkel-antey warl anyent-warl. Rap warlew-artey iley-angenh-antey, warlew-artey ra ikwer atyek-anteyarl arntarnt-arelherl-anewerr, alwernemel renh irrentewerrarl. Rap kwen aylpenhew, ilek-ilek-anem inew.

⁴⁰Ayengan Artwa Inngarl Akngey-wenh. Arrantherr atyeng arntarnt-arelheyewan, arrantherrarl iterl-arey-angenh, ayengarl angkep apey-alheyenhan. Arrantherr apal anerl-anewerr, ayengan arwapeny apey-alheyenh, aremerrey-alheyenh.” Alakenh-anyem Jesus ilelhenh kwertengerl ikwerenh-rnemew.

⁴¹Peter-el Jesus ayernew, “Ingkartay, 12 anwernantherrant iterrem angka nhenhew? Ingkerrenh-antey apek iterrem angka ikwer?”

⁴²Jesus-elan tyernew alakenh: “Atha angka arrenhantherrenh artwa akalty-akert ileyew, rarl arraty intem Akngeyew anem. Artwa ilkwel artwa nhelkwer-anyem arew. Rap renh arrernew, atyetyart ampepel aneyew, rarl warrkenh ingwer-rnem arntarnt-araynteyew, amern antherl-aynteyew.

⁴³Artwa ilkwa alhew-tangkwel. Rarl apey-alpewel, warrkenh renh arey-alpew, mwerrarl warrkerrenh artewentyel.

⁴⁴Ra inkwerelhew, rap angkew warrkenhew, ‘Nga mwerr-angker innga warrkerrew. Nhepenh-anyem nga warlewant atyetyart aney-angenh. Ngan atyetyart aneyenh ilek-ilekew; warlew, pwelek-rnemew, atherrkew, ilek-ilek ingkerrenh atyenhew.’

⁴⁵Warrkenh ingweran arraty warrkerrey-angenh apek. Ra iterrew, ‘Atyengew-artey apey-alpey-angenh-antey, intem apek alhew.’ Ran iltemel atwenh warrkenh ingwer-rnem, artwernem-then arelh-rnem-akerr. Ran aynterlant-anenh, amernant akngerrarl arlkwemel, ngkwarl-then antywenh, terangkerreyew-atety.

⁴⁶Rap apal ayntem, ikwerew-arteyarl apey-alpewel. Artwa ikwerew-arteyel renh artewentyel atwew, irrentemel ingwer-rnemarl anenh-warl, Akngey apentey-angenh-rnem-warl-anem.” Alakenh-anyem Jesus ikwer-rnem angkenh.

⁴⁷Jesus-el angka warrkenh-akert anayntelew. “Mwerr arrantherr aweyel angka nhenhan? Warrkenhel iterl-areyel arraty-angkwarr, ikwerew-arteyelarl renh ilanthew-angkwarr, rap alakenh irremer. Ra apmwelhelenty, ikwerew-arteyel renh artewentyel irrwampenh-anthem.

⁴⁸Ikwerew-arteyel renh mwanty iley-angenh apek, alakenh ileyew. Warrkenh ra apmwelhelenty, ikwerew-arteyel renh alyepelant irrwampenh-anthem. Kel alakenhaym Akngeyelan anthem warrk akely ingwerenty anyentew. Akngey ilkelhem, ikwer arraty warrkerreyew. Rap renh ayerney-angenh warrk ingwerewan. Akngeyel apek warrk ilkwarl ingwerentyak anyentew anthem-anem. Akngey ilkelhem, ra ikwer arraty warrkerreyew arrpemarl. Nthekwern ra alakenh angkey-angenh, ‘Warrk nhayman ilkwarl, nthekwern atha arnwarney-angenh.’”