Lukasi 21:11-35

¹¹Chila honhu howa na jimachinyina mikulu, kowa na nzala na matamwa ga kulecheza. Kowa na vinduzanduza vya kudumbigwa na ulajilo mkulu kilanga.

¹²Ila logowa gang'hali kulawila ago geng'ha, wokubatani, wokugazani na kuwagalani mli ng'handa za kusalila na kuwawika mchinweng'ho. Mohilikwa kuli wandewa na vilongozi kwa chiwalo cha itagwa lya heni,

¹³leka mlavye ulolezi kwa hewo.

¹⁴Ila hemwe mleche kuwa na lunhwinhwi ndaze vyomchigombela.

¹⁵Kwa vila nene ndokupani ulonzi wa kulonga na wanhu wakwihileni howoweza kiziganila na hemwe kahi howoibeza.

¹⁶Molemigwa na wakulu wa hemwe na wang'holozenu na wanhu weng'ha womiganaga. Nawo wowakopola wamwe wa hemwe.

¹⁷Wanhu weng'ha wokulemani kwa nongwa ya kumbinza heni.

¹⁸Ila nemnvili imwe haikwajilila mmitwi ja hemwe.

¹⁹Kwa kwimilila kwa hemwe, molohola ukomu wa hemwe.

²⁰“Lomuuwona muji wa Yelusalemu uzumgulutwe na wamizi, mvizele kuwifigwa kwake kwa habehi.

²¹Aho wawele Yudeya wabilimile kuchidunda, wala wawele mli muji walawe na wala wawele kumgunda waleche kwinjila kuli muji awo.

²²Mazuwa ago ndo mazuwa ga kugazigwa, leka geng'ha gandikwe galawile.

²³Mane wawo wala wawele na himila na walingonyeza zuwa azo! Mina muli isi mowa na nongwa ng'hulu ng'hatu na ng'halazi ya Nguluwi yowoyela wanhu awa.

²⁴Wamwenga wakopoligwa kwa ipanga, wamwenga wochibatigwa woholigwa mli isi zeng'ha, na muji wa Yelusalemu wobijigwa na isi zinji, mbaka mhela houkuya.

²⁵“Kowa na vinhu vyokoneka kuli zuwa na nyelezi na nondwe. Wanhu weng'ha muisi wozangugaya kwa chiwalo cha kudumba mtigasiko wa nigu za bahali.

²⁶Wanhu wozilika kwa kudumba, wololela mbuli ziza ngulawila muisi, mina mong'ho ubatilile vinhu avyo vyeng'ha wotigaswa,

²⁷Hamba womona Mwana wa Munhu yokuya kuli ng'hungugu. Yali na ludali na ukulu lwinji.

²⁸Mhela mbuli azo lozikwaluka kulawila, mwinuche na kwinula mitwi jenu mchanya, mina kugomboligwa kwa hemwe kwa habehi.”

²⁹Hamba nakawalangusa yolonga kwa nhelo, “Mlole ikuyu na migodi jinji jeng'ha.

³⁰Wone mone galuka kuzuka mahamba, mvizela mhela wa nhonya wa habehi.

³¹Namwe hihyo, homkona mbuli azo zilawila, mvizele Undewa wa Nguluwi wa habehi.

³²“Ndanguwalonjelani ndikomya, lulelo alu halubagama gang'hali ago geng'ha kulawila.

³³Ulanga na isi zopuluta, ila ulonzi wa heni haupuluta hebu.

³⁴“Muwe meho nhumbula za hemwe zileche kuganilila kuli vinhu vinji vya ukomu awu, kudita kuli mbuli zihile na mijito ja amu muisi. Zuwa alyo lyokuyilani ne kuvizela.

³⁵Mina chokuyilani kota chinhu chitejigwe, wanhu weng'ha wali ngikala muli isi.