Lukas 8:15-26

¹⁵“A maka vutuna vit ri boru langa na malala kamumu ri manga e huriki a bakovi kamumu, a bakovi ni ta muholi. Ri longo a nitana Vure, ri ru na hatene ria, ri lohotata vona. Na tahuna ri lohotata na ngava, ri hatenono, bara ri vakabele a kanene ria i kupo.

¹⁶“I uka ma si namia a lam muri si gi kavi­tagua. A lam bara si vakatavorea, lakea e rei a viri i valai bara i masia a hini palala.

¹⁷A rabu lobo ni rata kapi­loho bara ni vakalongo lae muri ma. A maki ni ruhulolo, bara i bele kavakava.

¹⁸E rei a viri i longokilala a ngava bara ni habi tabu ranga. A viri i uka ma i longokilala a ngava, pali ra ngava i luhoi ta i longokilala, bara ni bole hamule vona. I mavonga, mu luhoi kamumu a ngava mu longo.”

¹⁹Na parava tara e kinana e turana mai ri valai ri gi masia e Isu, pali ri keri ni dili, a vuhuna ri ala kupo e huriki ri made, ri longoa e Isu i vara.

²⁰Lakea a bakovi tara i vakalongoa e Isu, i ta maea, “E kinamu, e tarimu mai to pesi polovavo, to ngaru ni matai ioe.”

²¹E Isu i koli i ta maea, “E nana, e turagu mai re huriki ri longo a nitana Vure, ri muri mai a ngavana.”

²²Na parava tara e Isu i tura e huriki a murimuri i ta maea, “Si vano si gi lakea na tabeke tara na darilomu.” Lakea ri rike na aga ri vano.

²³Na tahuna ri vore lokovonga, e Isu i mahita. I pori ngane a taiava i toko dili na aga, a dari i ratea a aga i popote ge mabubu.

²⁴E huriki a murimuri ri vangoa e Isu ri ta maea, “Bakovi Dagi, Bakovi Dagi, i popote bara i mabubu a aga. Bara si pasiri!” Lakea e Isu i pesi rike i tahate a vilu a naru, naha ru gu pori. Lakea i pasi puru a taiava, i malilo a dari.

²⁵E Isu i nana e huriki a murimuri vona i ta maea, “I vai a niluhoi ne mua?” E huriki a murimuri ri mangenge ri ngapa, lakea ri vanana, “E rei a viri iea? I vakuku a vilu a dari, ru longototoa!”

²⁶Ri bele na tabeke ne Gerasa, na tabeke tara na Darilomu e Galili.