Lukas 6:3-47

³A netabbag hapa ni Hesus ta “Dulay hud ya iningwa da en? Intu mina pagnonotan muy ya iningwa ni mina Dabid ikid na kahulun na kiden ta kawan na kanan da,

⁴te simarok kid la ta bali na Namaratu, a inalap da hapa ya pan kiden nga nedasar ta atubang na Namaratu nga mehangat mina tekid, te kanan hala na padi kiden. A maski nangan kid na kahulun na kiden a bakkan haman ta nakaliwatan da yen,” kunna.

⁵A ya takday para nebar na tekid a “Ya Tolayin taga Langit ya makkamu ta araw na agimmang,” kunna.

⁶A ta takday ha na araw na agimmang a mangituldu i Hesus ta kapilya na Hudyo kiden, a itta ya takday lalaki nga pake nagpilay ya takday kamat na.

⁷A ya Pariseyu kiden ikid na mangituldu kiden a pake aitan da hapa i Hesus talo am pagmappyan na ya kamat na en, te am pagmappyan na ta araw na agimmang a yen sangaw ya pangidaruman da tentu.

⁸Ammi dana amu ni Hesus ya nonotan da, a yen ta binaran na hapa ya nagpilay ta kamat, “E ka bit sin, te magtayuk kan ta pagtatangnganin,” kunna,

⁹otturu pinohutan na hapa ta nagilalap kiden tentu; “Anu hapa ya uray muy ta ipalubus na Namaratu ta araw na agimmang? Intu ipalubus na ya mappya ono dulay? Mappya panaw ta magpamappya kitam ono magpapasi kitam?” kunna tekid.

¹⁰A inaita na kid la kapye na naguhohug ha ta lalaki en. “Uyadam la ya kamat mina,” kunna. A tentu en nanguyad a negitta hapa ta takdayen kamat na nga mappya.

¹¹Ammi ya Pariseyu kiden a nafulotan ya pagporay da tentu, a nagbabidan da am anu mina ya pangpa-gang da te Hesus.

¹²A sangaw gimon i Hesus ta agyan na bagetay kiden, a paghuhuklaw hapa nga nakimalmallak ta Namaratu.

¹³A ta lalakwat a pinaabikan na ya ituldu na kiden, a nagpili ta mafulu duwa la tekid, petta yen kid ya turin na nga ange mangipadangag.

¹⁴Itta i Simon nga nengagan na ta Pedru, ikid na kabagis na en Andres, ikid ni Santiago, ikid ni Hwan, ikid ni Felipe, ikid ni Bartolome,

¹⁵ikid ni Matyu, (intu hala i Lebi), ikid ni Tomas, ikid na takday Santiago nga anak ni Alfeyo, ikid ni Simon nga nakitapil ta gubyernu nga taga Roma,

¹⁶ikid ni Hudas nga anak ni Santiago, ikid ni Hudas Iskaryote nga mangitalaba sangaw te Hesus.

¹⁷A tentu nabalin nagpili tekid a sa dumagut kid ta bagetayen, kapye da nagimmang ta palanada. Pake addu ya ituldu kiden ni Hesus, yaga dumadagdag hapa ya addu na tolay nga taga Herusalem ikid na kompormi na lugar ta Hudeya, ikid na ili na Tiro ikid na Sidon ta bikat na bebayen dakal, te umange kid magdangag ikid na magpauru ta takit da kiden.

¹⁸A ya pinagzigat na anitu da kiden a pinagmappya na kid hapa.

¹⁹A sa ikayat da ya pasi-ged tentu, te itta ya pakapangwa na nga magpamappya tekid ngamin.

²⁰A sangaw imatubang i Hesus ta ituldu na kiden petta ituldu na kid, a ya binida na tekid a intu yan: “Ikamuy nga napanglaw a nagāsāt kanan, te Namaratu ya makkamu tekamuy.

²¹“A ikamuy nga mabisin ta ayanin a nagāsāt kanan hapa, te matappag kam hala sangaw. “A ikamuy nga magdamdam ta ayanin a nagāsāt kanan sangaw, te magayayat kam sangaw.

²²“A maski am ikatupag na kam na ikattolay muy, ikid na dugiman da kam, ikid na amāmatan da kam, ikid na padpadulayan da kam gafu ta ituldu ta kam a nagāsāt kam la.

²³“A magayayat kanan mina am dumatang sangaw ya kumanin na zigat tekamuy, a timollok kam mina setalak, te pake dakal sangaw ya sagolyat muy ta langitewan. A awemuy la magdamdam, te nonotan muy mina ya aglavun kiden na Namaratu ta palungu na araw, te kagitta muy kid hapa nga nekatupag.

²⁴“Ammi ikamuy nga maba-nang a kakallak kam sangaw, te am maafut na sangaw ya kaba-nang muy a awan sangaw ta talak muy.

²⁵“A ikamuy nga magbattug ta ayanin a kakallak kam sangaw, te mabisin kam. “A ikamuy nga magayayat ta ayanin a magtangit kam sangaw ta damdam muy.

²⁶“A kakallak kam hapa sangaw am mappya la ya bibidan na ngamin tolay gafu tekamuy, te negitta kanan hala ta matulad kiden aglavun nga dinayawan na tolay kiden ta idi. “A mehulun kam sangaw tekid ta pama-gang na Namaratu.

²⁷“A am madangag muy ya uhohugan ku tekamuy a iddukan muy ya mangikatupag tekamuy, a uffunan muy kid.

²⁸A am igaged da kam a bendisyonan muy kid, a pakimallak muy ya manguyoyung tekamuy.

²⁹A am linappongan na ya pahingil muy a itayan muy hala tentu ya taakub. A am gubatan na ya barawasi muy a idagga muy hapa ya kamasita muy.

³⁰A maski am anu ya adangan na ono gubatan na tekamuy a iatad muy la a awemuy petoli.

³¹“A kumanen hapa am anu ya ikayat muy ta ipaita na ikattolay muy tekamuy a mappya ta kumanen hapa ya ipaita muy tekid.

³²Te am intu la iddukan muy ya mangidduk tekamuy a anu hud sangaw ya pangsagolyat na Namaratu tekamuy, te maski ya awan kiden mangurug a iddukan da hala ya mangidduk tekid.

³³A am intu la uffunan muy ya manguffun tekamuy a anu hud sangaw ya pangsagolyat na Namaratu tekamuy, te awan haman ta pagdaduman muy ta awan kiden mangurug.

³⁴A am intu la pagatutan muy ya amu muy nga magpagatut tekamuy a anu hud sangaw ya pangsagolyat na Namaratu tekamuy, te maski ya awan kiden mangurug a pagatutan da hala ya kagitta da kiden nga awan mangurug petta paggatutan da kid hapa.

³⁵“Ammi bakkan mina ta kunna ten tekamuy, te iddukan muy hud la ya mangikatupag tekamuy, a uffunan muy kid ikid na pagatutan muy kid, a awemuy nonotan ya pagsupapak da tekamuy, te am kunna ten ya tarabakun muy a dakal sangaw ya sagolyat muy, a megitta kam ta Namaratu ewan, te maallak hapa ya Namaratu ta dulay kiden na tolay nga awan matalak tentu.

³⁶Mappya mantu ta parigan muy ya pangikallak na Dama muyewan.”

³⁷“A ya ibar ku para tekamuy a awemuy ka-ma la paliwatan ya ikattolay muy talo am paliwatan na kam hapa na Namaratu ewan. A awemuy hapa mangigaged talo am igaged na kam hapa. Mappya hud la ta pakoman muy ya magliwat tekamuy, te am pakoman muy a pakoman na kam hapa na Namaratu ewan.

³⁸“A am mappya ya iatad muy ta ikattolay muy a mappya hapa sangaw ya iatad na Namaratu tekamuy, te pannun na ya sabok muy, a sadsadan na, kapye na ha surokān. Te am anu ya pangsukat muy ta kadwan a kumanen hala sangaw ya pangsukat na Namaratu tekamuy.

³⁹“A kumanen hapa am itta ya pagkurangan na kabagis mu nga alaassang ta kuman na salasangkap ta mata na tolay a anu kawagan na ta ihuyam ta awem haman amu ta itta ya pagkurangam nga kuman na tarosu?

⁴⁰A am awem maita ya kuman na tarosu ta matam a annum hud ibar ta kabagis men ta ‘O, kabagis, azin ku bit ya salasangkap ta matam.’ “Kuga magimmamappya ka. Azim bit apolu ya kuman na tarosu en ta matam, a sangaw magdakar ya pakaitam, pettam maazim hapa ya salasangkap ta mata na kabagis mu.

⁴¹Te am daram ya tolay a mabalin hud ta itulud na ya sakā daram na en awa azo metawag kid nga meavut.

⁴²A yen mina ya pagnonotan muy, te maski am inya ya metuldu a assang la ya amu na ammi ta mangituldu tentu, a am nabalin na metuldu a megitta hala ta mangituldu en tentu.

⁴³“A nonotan muy para ya gagangay na kayu: te am kakurugan ta mappya ya fun na kayu en a magmayan hud sangaw ta dulay awa mappya haman. A am dulay ya fun a magmayan hud ta mappya awa dulay hapa ya mayan na en.

⁴⁴Te ya mayan na kayu ya pakaitan am mappya ono dulay ya fun na en. A bakkan mantu ta patani ya mayan na lanut na mawini. A bakkan hapa ta anyog ya mayan na fun na ambabanga

⁴⁵A kumanen hapa ta tolay, te am mappya ya tolay a mappya hapa ya pohetan na ta nonot na, a am dulay ya tolay a dulay hapa ya pohetan na ta nonot na. Te am anu ya nauknud na tolay ta nonot na a yen sangaw ya iuhohug na.

⁴⁶“Ibar muy haman ta iyak ya dafu muy, ammi anu kawagan na ta awemuy idulot ya patarabakuk tekamuy?

⁴⁷Ammi ya ngamin kiden ange teyak ikid na mangdangag ta uhohug ku ikid na mangidulot ta madangag da a ibar ku tekamuy ya keangarigan da,