Lukas 6:3-39

³Iwe, Jesus a pölüeniir, “Ousap mwo aleani mine Tafit a föri lupwen i me chiechian kewe ra echik?

⁴A tolong lon imwen Kot o angei ewe pilawa ra eäni asor ngeni Kot, a mongö, a pwal ngeni chiechian kewe. Nge ei a ü ngeni allükün lamalam, pun esap wor eman a tongeni mongö ekei pilawa pwe ekewe chök souasor.”

⁵Jesus a pwal apasa, “Nöün Aramas i Sounemenemen ewe ränin sapat.”

⁶Lon pwal eu ränin sapat Jesus a feila lon eu imwen felikis o afalafal. Ikenan a wor eman mwän mi mä pöüifichin.

⁷Iwe, ekoch Sensen Allük me Farisi ra kütta eu popun pwe repwe tongeni atipisi Jesus, iei mine ra mamasafichi are epwe apöchöküla ewe mwän lon ewe ränin sapat.

⁸Nge Jesus a silei ar ekiek o üreni ewe mwän, “Kopwe ütä o feito ikei mwen ekewe aramas.” Iwe, ewe mwän a ütä mwer meinisin.

⁹Mürin Jesus a üreniir, “Ngang üpwe aisinikemi: Met allükün ach we lamalam a mwüt ngenikich sipwe tongeni föri lon ewe ränin sapat? Sipwe föri mine a öch ngeni aramas, are sipwe föri mine a ngau? Sipwe amanaueer, are sipwe amälaar?”

¹⁰Iwe, Jesus a nenengeniir meinisin, mürin a üreni ewe mwän, “Kopwe aitiewu poumw!” Iwe, a aitiewu pöün, iwe, a pöchökülsefäl.

¹¹Nge ekewe Farisi me Sensen Allük ra fokun song o ra popuetä le pwüngüpwüngfengen lefiler usun mine repwe föri ngeni Jesus.

¹²Lon ena fansoun Jesus a feitä won eu chuk pwe epwe iotek. Iwe, a nonom ikenan o iotek ngeni Kot lon unusen ewe pwin.

¹³Lupwen a ränila, a körato nöün kewe chon kaiö o a filätä engol me ruoman me leir, ätekewe a pwal aita ngeniir soukünö:

¹⁴Simon (ätewe Jesus a aita ngeni Petrus) me Andru pwiin we, James me Johannes, Filip me Partolomeus,

¹⁵Mateus me Tomas, James nöün Alfäus me Simon i eman Selot,

¹⁶Jut nöün James me Jut Iskariot, ätewe mi afangamä Jesus.

¹⁷Lupwen Jesus a feitiu seni won ewe chuk me nöün kewe chon kaiö, a ütä lon eu leni mi sosonöch. Iwe, chomong nöün kewe chon kaiö ra mwicheto ren, pwal eu mwichen aramas mi chomong seni unusen ewe fanü Jutea, seni Jerusalem pwal seni ekewe telinimw Tirus me Siton mi nom aroset.

¹⁸Ra feito pwe repwe rong ngeni än Jesus afalafal, epwe pwal apöchöküleretä seni ar kewe samau. Pwal chokewe mi riaföü ren ngününgau ra feito ren o küna pöchökül.

¹⁹Ekewe aramas meinisin ra sotuni ar repwe atapa Jesus, pun och manaman a towu seni o apöchöküleer meinisin.

²⁰Iwe, Jesus a nenengeni nöün kewe chon kaiö o apasa, “Oua feiöch ämi mi wöüngau, pun oupwe mwüni ewe Mwün Kot.

²¹Oua feiöch ämi mi echik lon ei fansoun, pun oupwe mötüla. Oua feiöch ämi mi kechü lon ei fansoun, pun oupwe fokun pwapwa.

²²“Oua feiöch are aramas ra oputakemi o likitikemi, are ra aitengauakemi o kapasingau usumi pokiten oua lükü Nöün Aramas.

²³Oupwe pwapwa are a fis ei sokun lapalap ngenikemi, oupwe mwetemwet fän pwapwa, pun liwinimi mi watte epwe iseis lon läng fän itemi. Pun ar kewe lewo ra fen föri ekei sokun föför ngeni ekewe soufos.

²⁴Nge feiengauemi ämi mi pisekisek lon ei fansoun, pun oua fen nom lon manau mi mecheres.

²⁵Feiengauemi ämi mi mötüla lon ei fansoun, pun oupwe echik. Feiengauemi ämi mi pwapwa lon ei fansoun, pun oupwe letipeta o kechü.

²⁶Feiengauemi are aramas meinisin ra kapasöch usumi, pun ar kewe lewo ra fen eäni ei sokun kapas ren ekewe soufos chofona.

²⁷“Nge üpwe ürenikemi ämi mi aüselingaei: Oupwe echeni chon pölüenikemi, oupwe föföröch ngeni chokewe mi oputakemi.

²⁸Oupwe afeiöchü chokewe mi ottekikemi o iotek fän iten chokewe mi föföringau ngenikemi.

²⁹Are eman a pösapek, kopwe pwal akulu ngeni ewe epek. Are eman a angei üfom sekit, kopwe pwal mwüt ngeni üfom söch.

³⁰Are eman a tüngorek och mettoch, kopwe chök ngeni, nge are eman a angei och pisekum, kosap aissefäl fan pöchökül.

³¹Oupwe föri ngeni aramas usun chök mine oua mochen repwe föri ngenikemi.

³²Are oua chök tongei ekewe aramas mi tongekemi, met popun ämi oupwe angei och feiöch? Ekewe mwo chon tipis ra pwal tongei chokewe mi tongeer.

³³Nge are oua chök föföröch ngeni chokewe mi föföröch ngenikemi, met popun ämi oupwe angei och feiöch? Ekewe mwo chon tipis ra föri iei usun.

³⁴Are oua chök mwütätä pisekimi ngeni chokewe oua apilükülükü pwe repwe aliwinisefäli ngenikemi, met popun ämi oupwe angei och feiöch? Ekewe mwo chon tipis ra mwütätä pisekir ngeni chon tipis pwe repwe angesefäli won ükükün met ra fangala.

³⁵Nge ämi oupwe echeni chon oputakemi o föföröch ngeniir. Oupwe mwütätä pisekimi ngeniir, nge ousap ekiekin angesefäli. Mürin oupwe angei liwinimi mi watte o wiliti Nöün Kot ewe mi Unusen Tekia. Pun Kot a kirikiröch ngeni chokewe resap sile kilisou, pwal ngeni ekewe aramasangau.

³⁶Oupwe eäni ümöümöch usun chök Sememi a eäni ümöümöch.

³⁷“Ousap apwüngü aramas, pwe Kot esap apwüngükemi. Ousap atipisi aramas, pwe Kot esap atipisikemi. Oupwe amusala än eman aramas tipis, pun Kot epwe pwal amusala ämi tipis.

³⁸Oupwe fangafangöch ngeni aramas, pun Kot epwe fangafangöch ngenikemi. Ewer, oupwe angei eu aükük mi unusöch, mi itelong o chachelong o säsewu, epwe urourela me le pöümi. Pun ewe chök aükük oua aea le aükük ngeni aramas, Kot epwe pwal aea ngenikemi.”

³⁹Iwe, Jesus a pwal apworausa ngeniir eu pworausen awewe: “Epwe tufich än eman chon chun epwe emweni eman mi chun? Ifa usun, resap turulong me ruoman lon eu pwang?