Lukas 2:9-29

⁹Molo som na, aŋela ki Merere ipet kizin. To azuŋka ki Merere iyaara su ma iliu zin. Tabe motoŋana biibi ikam zin ma tisaana kat.

¹⁰Tamen aŋela iso pizin. Iso: “Komoto pepe. Keleŋ. Nio aŋmar be aŋso yom pa uruunu ambaiŋana tabe ikam yom ta munŋaana men ma menmeen yom biibi.

¹¹Mbeŋ ta koozi, Ulaaŋa tiom, ni tipeebi isu kar ki Dabit kek. Ni Mesia, mi ni Merere tiom.

¹²Mi koroŋ tiŋgi ko iwe kilalan piom: Kala, to ko kere pikin ta tizuki pa kawaala, mi ikenne sula koror ta imbot la mbili murin na.”

¹³Molo som na, iwal munŋaana men ki kar saamba timeke ma tisu, mi tigaaba aŋela tana ma tipakur Anutu pa mboe ta kembei. Tiso:

¹⁴“Tapakur Anutu ta imbot kor a. Pa ni zaana biibi. Wal ta so ni leleene pizin, nako lelen ndabok. Pa iŋgi sua luumuŋana isu toono kek.”

¹⁵Tona zin aŋela tizem zin, mi timiili ma tisala saamba mini. Mi zin mboroŋan tiparso pizin ma tiso: “Ou, tamaŋga ta buri mi tala Betelem be tere koroŋ ta Merere iso piti pa na.”

¹⁶Tana loŋa men mi tila. Mi tindeeŋe Maria ziru Yosep, mi pikin ta ikenne sula koror.

¹⁷Tila ma tire i, tona tipit mbol pa sua ta aŋela iso pa pikin tana.

¹⁸Mi zin tomtom ta tileŋ sua kizin mboroŋan na, timap timurur pa.

¹⁹Tamen Maria ikam ŋgar pa mbulu ta boozomen tana ma iur se ndomoono.

²⁰Kaimer na, zin mboroŋan timiili ma tila, mi tipakurkur Anutu mi tiwidit uruunu pa uraata boozomen ta tileŋ mi tire na. Paso, ila itoptop kat la aŋela kalŋaana tau.

²¹Aigule lamata mi tel ilae, to reeteŋana ka nol ipet. Mi tipaata zaana be Yesu. Pisis tana, Maria kopoono zen mi aŋela iso la kini.

²²Timbotmbot ma irao nol tabe tiurpe zitun ma tiŋgeeze mini pa Anutu mataana kembei ta tutu ki Mose iso na, to tikam pikin tina, mi tisala pa Yerusalem be tiuri ma iwe Merere lene.

²³Pa ka sua tibeede ila Merere tutu kini pataaŋa kek ta kembei: Pikin tomooto boozomen ta muŋgamuŋga na, bela kakam zin ma tiwe Merere lene.

²⁴Tana ziru tila tiur pikin ma iwe Merere lene, mi tipatoron Merere pa mbalmbal munmun ru, bekena Maria iŋgeeze mini pa Anutu mataana. Tito tutu ta Merere iso na.

²⁵Tomtom ta, zaana Simeon, ni imbotmbot Yerusalem. Ni tomtom ndeeŋeŋana mi imoto Anutu mi ileŋleŋ la kalŋaana. Mi iurur mataana pa mazwaana tabe Anutu ikam zin Israel ma timbot ambai mini. Mi Bubuŋana Potomŋana imbotmbot raami.

²⁶Mi Bubuŋana Potomŋana iso i kek ta kembei: Ni ko imbotmbot mi ire Mesia ki Merere, mana imeete.

²⁷Yesu naana ma tamaana tikami ma tilela Urum Merere be tikam pini kembei ta tutu iso na. Mi indeeŋe tana, Bubuŋana ipaŋgutŋguutu Simeon ma imbotmbot lela Urum Merere leleene kek.

²⁸Tana ni ire pikin, to ikami mi imbaraari. Mi ipakur Anutu ma iso:

²⁹“O Merere, sua ta nu mbuk pa mbesooŋo ku, ta iŋgi iur ŋonoono kek. Tana sombe aŋmeete, na aŋmeete lak. Nio ko aŋma raama leleŋ ambai.