Lukas 23:12-25

¹²A srefi dei dati, Herodes nanga Pilatus tron mati. Ma fosi dati den ben e libi leki feyanti nanga densrefi.

¹³Dan now Pilatus kari den prenspari domri, a folku nanga den edeman fu a folku kon makandra. A taigi den taki:

¹⁴“Un tyari a man disi kon na mi tak' A e drai a folku ede. Ma luku, let' na un fesi mi aksi En, ma mi no feni noti fu den sani san un e taki fu En.

¹⁵Herodes srefi no feni noti, bika a seni En kon baka gi wi. Luku, A no du noti fu A mus dede.

¹⁶Dat'ede mi o wipi En, dan mi o lusu En.”

¹⁷Pilatus taki dati bika tapu a Paskafesa, a ben mus lusu wan straf'man gi den.

¹⁸Ma den sma bari leki wan man taki: “Puru En na un tapu! Lusu Barabas gi unu!”

¹⁹Den ben sroto a man disi fu wan dyugudyugu ini a foto, èn fu di a ben kiri wan sma.

²⁰Dan fu di Pilatus ben wani lusu Yesus, a taki baka nanga den sma.

²¹Ma den ben e bari taki: “Spikri En na wan kroisi! Spikri En na wan kroisi!”

²²Pilatus taki a di fu dri leisi nanga den. A aksi den taki: “Ma sortu ogri a man disi du? Mi no feni noti fu meki tak' A mus dede. Dat'ede mi o wipi En, dan mi o lusu En.”

²³Ma den sma ben e tan bari bun tranga tak' den mus spikri En na wan kroisi. Te fu kba a ben abi fu yere den.

²⁴Dan Pilatus teki a besroiti fu gi den san den wani.

²⁵A lusu a man san den ben wani, di ben sroto fu wan dyugudyugu èn fu di a ben kiri wan sma. Dan a gi Yesus abra fu den du nanga En san den wani.