Lukas 22:41-60

⁴¹Mürin a feila seniir ina epwe ükükün toauen än eman monei eföü fau. Iwe, a fotopwäsuketiu o iotek.

⁴²A apasa, “Semei, are ka mochen, kopwe angei seniei ei kapen riaföü, nge esap fis letipei pwe letipom.”

⁴³Iwe, eman chon läng a pwä ngeni o apöchöküla.

⁴⁴Lon an nom lon riaföü watte a achocho le iotek, nge mononan a usun chök supun cha a suputiu le pwül.

⁴⁵Iwe, lupwen a ütä seni an iotek, a liwinsefäliti ekewe chon kaiö o a küneer pwe ra möür, pun ra fokun chouchou ren ar lolilen.

⁴⁶Mürin a aisiniir, “Pwota oua chök mömöür, oupwe pwätä o iotek, pwe ousap turulong lon sosot.”

⁴⁷Iwe, lupwen Jesus a chüen kakapas, a war eu mwichen aramas fän emwenien Jutas, eman lein ekewe engol me ruoman chon kaiö. Jutas a feiliti Jesus pwe epwe mitiri.

⁴⁸Nge Jesus a üreni, “Jutas, ifa usun, kopwe afangamä Nöün Aramas ren och mitimit?”

⁴⁹Iwe, lupwen ekewe chon kaiö mi eti Jesus ra küna mine a fis, ra ais, “Äm Samol, aipwe nöünöü nöüm ketilas?”

⁵⁰Eman me leir a pöküela pelifichin selingen nöün ewe Souasor mi Lap we chon angang.

⁵¹Nge Jesus a üra, “Oupwe ükütiu! Ousap chüen föri ei sokun.” Iwe, a atapa selingen ewe mwän o a öchusefäl.

⁵²Mürin Jesus a üreni ekewe souasor mi lap, ekewe meilapen chon tümwünü ewe imwenfel me ekewe souakomwen lamalam mi feito pwe repwe turufi, “Oua feito fän ketilas me wok pwe oupwe turufiei, usun ämi oupwe turufi eman chon föföringau?

⁵³Üa nonom remi iteiten rän lon ewe imwenfel, nge ousap sotuni pwe oupwe turufiei. Nge iei a tori ämi fansoun, lupwen rochopwak a nemenem.”

⁵⁴Iwe, ra turufi Jesus o etekinala lon imwen ewe Souasor mi Lap. Nge Petrus a tapwela mürin me toau.

⁵⁵Lupwen ra akküw eu ekkei lukalapen ewe leni mwen imwen ewe Souasor mi Lap o motfengen ünükün, Petrus a pwal mot rer.

⁵⁶Mürin eman chon angang fefin a küna Petrus pwe a momot ikenan ünükün ewe ekkei, a newenewen ngeni o üra, “Ei mwän a pwal eti Jesus.”

⁵⁷Nge Petrus a amamäsini o üreni, “Fefin, ngang üsap silei ätewe.”

⁵⁸Ekis chök fansoun mürin eman mwän a pwal esilla Petrus o üreni, “Pwal en eman leir.” Nge Petrus a pölüeni, “Mwän, ngang sap eman me leir.”

⁵⁹Ina epwe eu awa mürin, eman mwän a pöchökül le üra, “Enlet, ei mwän a pwal eti Jesus, pun pwal i eman re Kalilea.”

⁶⁰Nge Petrus a pölüeni, “Mwän, ngang üsap silei mine ka kapas usun!” Iwe, lon ewe chök otun, lupwen Petrus a chüen kakapas, eman chuko a kökkö.