Lukas 15:6-19

⁶i lakea na tanga. Muri bara i gale palupu e huriki a turana, i taki ria, ‘Mu vivi turagu a vuhuna a matavisia pali a sipsip nau i velu.’

⁷A Vure tara, na tahuna a bakovi hale i pulo a vilona, i vivi hateka. I vivi ne huriki ala 99 ri kamumu pali, ri pulo pali a vilone ria. Pali i vivi hateka na bakovi hale ala taku i pulo a vilona.”

⁸E Isu i taki tabua tara nivakakika i ta maea, “A ngatavine tara i tahoka moni silva vona i ravulu, lakea i velu tara. A ra mu luhoia ge ratea? Bara i namia a lam, i kovo kadoa a ruma, i matakana lae, muri bara i matavisia.

⁹Na tahuna i matavisia bara i gale palupu e huriki a turana, e huriki ri made tabukoi vona, i taki ria, i ta maea, ‘Mu vivi turagu, a vuhuna a matavisia pali a moni nau i velu.’

¹⁰I mavonga kunana, a Vure turana e huriki a agelo bara ri vivi hateka, na tahuna ri masia a bakovi hale tara i pulo a vilona.”

¹¹E Isu i ta lokovonga liu, i ta maea, “A bakovi tara i tahoka e tuna bakovi ala rua.

¹²A viri kiroko i takia e tamana i ta maea, ‘O habi nau ngane a mahala nau.’ Lakea e tamane rua i vaveru rua vona mahala vona.

¹³“I uka ma i tabaka, a viri kiroko i bole lobo a maki vona i vano, i havai maia a robo basi tara. I bele vona a robo iea, i vakalobo a mahala vona na naro hale.

¹⁴I vuroki lobo a mahala vona. I bele ngane na robo iea a pago. I matasia, i vitolo mavonga.

¹⁵Lakea i vano i bole a leho vonga na tahona malala tara. A bakovi iea i rudua ge matakari a nure na boro.

¹⁶I vitolo hateka, i ngaru ni kani a maki ni kani na boro, pali i uka tara viri ge habi a maki ni kani vona.

¹⁷“I bele vona ngane a niluhoi kamumu, lakea i ta maea, ‘E huriki a vora ne tata ri tahoka a maki ni kani i kupo, pali iau a mate mavonga koea na vitoloa!

¹⁸Ga vano ga hamule mai e tata, ga takia ga ta maea, “Iau a rata virihi a naro hale na Vure, a rata a naro hale virihi mai ioe.

¹⁹I uka ma a bakovi kamumu go gale iau ge iau e tumu. O rata iau, ge iau a vora vomu kunana.’”