Lukas 14:28-34

²⁸Dadi mete ma nau tungga Au, na, timba-tai matalolole dei. Haꞌi netuduk leo hatahori fo mana nae nambaririik uma katatadak. Ana muste reke natalolole doik dedesin no lutuk. Boso losak doik ta dai.

²⁹Mete ma ta reke no lutuk, fama te ana dei fo tao uma fanderen, te basa doik ena. Boe ma hatahorir hika rakamamaek kana

³⁰rae, ‘Ei mete sudik hatahori naa dei! Ana bei fo tao fanderen, tehuu bei ta hata-hata, te basa doik ena.’

³¹Haꞌi netuduk laen ndia dedeꞌa netatik. Manek fo mana nae natati muste nanggatuuk fo timba-tai nakahuluk no ndia nonoon nara dei. Mete ma soldadun nara kada hatahori rifun salahunu, na, ana bisa laban musu hatahori rifun dua hulu, do taa?

³²Mete ma timba-tai basa ena, tehuu mateꞌen ma ana ta senggi netatik, na, malole lenak neu musu bei nai dook, ana nadenu memak nedenuk, fo raote kada mole-dame leo.

³³Leo naak oo, neu hatahori mana nae tungga Au boe. Ana muste timba-tai neu-mai nae, ana nahani a memak ena fo laꞌo ela basa-basan, do taa? Mete ma taa, na, hatahori naa ta nandaa dadi neu Au ana nuning.”

³⁴Yesus tuti kokolan no netuduk laen bali nae, “Masik naa, neulauk. Ita paken fo tao nalada nanaꞌak. Tehuu mete ma masin ta ena, na, sosoan hata bali? Ta bisa paken fo tao malada nanaꞌak kara bali. Paken fo fufuꞌa neu sele-tandek kara oo, ta bisa boe. Ita nggari henin leo. Dadi ei oo muste sama leo masik boe, fo leo-laꞌo no susue-lalaik mia basa hatahorir. See ka ndiꞌi dook, na, nenene matalolole, ee!”