Lukas 12:3-52

³I mavonga kunana, a maki mu taki na uvo bara ni longo na hini palala. A ngava mu reme a viri vona pololilo na ruma bara ni vakalongo dagi na mada.

⁴“Mua o huriki a turagu, a taki mua, naha ni mangenge ne huriki ri ngaru ni rabalaki a kakaine mua. Bara ri rabalaki a kakaine mua, pali a hanune mua, i uka ma ri gi rabalakia.

⁵Ga vakalongo mua vona e rei a viri mu gu mangenge vona. Mu mangenge vona a viri i tahoka a nitora ni rabalaki mua, i tahoka a nitora ni voro puru a hanune mua na kanono. Muholi hateka, a taki mua, ia a viri bara mu mangenge vona.

⁶“A sisiu i rua bara ni habi ni gi kona na 10 toea kunana, pali a Vure i uka ma i lohopilea tara.

⁷Mua ranga, i gi lobo pali a lilina vune mua. I mavonga, naha ni mangenge. A Vure i ngaru hateka mua na kadirovo. A Vure i matakari a maka kadirovo. Mua ranga, a Vure bara i matakari mua.

⁸“A taki muholi mua, e rei a viri i taki e huriki a bakovi ne ia a murimuri nau, iau, a Tuna Bakovi bara vakalongo e huriki a agelo na Vure ne ia a murimuri nau.

⁹Pali e rei a viri i lavuni nau na matane huriki a bakovi, iau tara bara ta lavuni vona na matane huriki a agelo na Vure.

¹⁰E rei a viri i ta hale na Tuna Bakovi, bara ni puga vuroki a naro hale vona. Pali e rei a viri i ta hale na Hanu Kiripiripi, a naro hale vona i uka ma ni gi puga vuroki.

¹¹Na tahuna ni turari mua lakea na roho na vaponga, mu gu pesi na matane huriki a bakovi dagi, naha ni loholege lae mu gu kori navai mua.

¹²A Hanu Kiripiripi bara i taki mua vona a ra ngava mu gu taki na tahuna iea.”

¹³A viri tara ne huriki vonga i takia e Isu, i ta maea, “Mari ni tovo, o takia e turagu ge vaveru ne maria a mahala i pe puru e tamane maria na tahuna i mate.”

¹⁴E Isu i koli i ta maea, “Bakovi, e rei i ru iau ga pelekado o ga kori marua vona a mahala i pe puru e tamane marua?”

¹⁵Muri i taki e huriki, i ta maea, “Mu matadoko! Naha ni ngaru ioe go tahoka a mahala ge kupo. A bakovi bara i tahoka a mahala i kupo, ra mahala vona i uka ma ge habi a nimahuri vona.”

¹⁶Muri i takia ne ria a nita vakakika iea, “A bakovi na mahala tara i tahoka a hania i vakabele a maki ni kani i kupo hateka.

¹⁷I taki mulea, i ta maea, ‘A ra ga ratea ngane? A uka a roho dagi ga ru kadolu a maki ni kani vona.’

¹⁸“Muri i ta maea, ‘Ngane ga rata maea. Ga puka puru a maka roho ni ru kadolu a maki ni kani, ga hae rike tabu ria ri gi dagi. Muri bara ru kadolu a vit, a mahala nau.

¹⁹Muri bara taki mule iau, a ta maea, “A tahoka a mahala i kupo, a ru kadolu na pida i kupo pali. Ngane ga made kunana, ga kani, ga ninu, ga pitei.” ’

²⁰“Pali a Vure i takia i ta maea, ‘Ioe a manga! Na rodo iea bara o mate. Pali e rei ge bole polo a maka maki o rata puru?’

²¹“E huriki a bakovi na mahala, ri mavonga. Ri ru kadolu a mahala i kupo, pali na matana Vure, ria a matasia.”

²²Muri e Isu i taki e huriki a murimuri vona i ta maea, “I mavonga a taki mua naha ni luhoi lege lae vona a nimade ne mua, a maki mu gu kani. Naha ni luhoi lege lae vona a kakaine mua, na a ra maki mu gu rodo.

²³A maki dagi a nimahuri, a maki kiroko a maki ni kani. A maki dagi hateka a kakaina viri, a maki kiroko a varakia.

²⁴Mu matai a maka kadirovo, i uka ma ri varo a maki ni kani, i uka ma ri mirio kilala. Ri uka roho ni ru kadolu a maki ni kani. Pali a Vure i vakani ria. Mua ranga, bara i vakani mua, a vuhuna a Vure i ngaru hateka mua na maka kadirovo.

²⁵A naro ni luhoi lege, i uka ma ge kori ioe go mahuri malaku.

²⁶Ioe o uka a nitora ni ratana a maki kiroko maea, pali naha ni loholege lae vona a maka maki ranga.

²⁷Mu matai a maka hurumade. I uka ma ri leho kilala, i uka ma ri rahi kilala a varakia. Pali a taki mua, a hurumade nga ri bagetu keke hateka, ri kamumu hateka na bagetua ne Solomon, ra hosi i bagetu kamumu hateka.

²⁸A Vure i vakabagetu a maka hurumade ri tabuli popote kunana, muri ri mate. Pali mua ranga, a Vure bara i vakabagetu mua. A bagetua ne mua bara i kamumu hateka na bagetua na hurumade. Ra mua, i uka ma mu luhoi tora hatekea a Vure.

²⁹Naha ni luhoi hateka a maki mu gu kani, mu gu ninu. Naha ni luhoi legelege.

³⁰E huriki a bakovi a ngatavine na uvo ri luhoi hateka a maki nga. E Tamane mua i lohoka vona mu ngaru a maki nga.

³¹Mu luhoi kunanea a harikianga na Vure, lakea a maki nga ranga bara ni habi.

³²“Mua o huriki a kabu kiroko na sipsip nau, naha ni mangenge, a vuhuna e Tamane mua i vivi ni habi ne mua a harikianga vona.

³³Mu habi a maka mahala ne mua ne huriki a matasia, lakea bara mu tahoka a mahala meli na hunu. A mahala meli i uka ma ge matutu, i uka ma ge lobo, i uka ma ni gi panaho, i uka ma ge kani a kuruve.

³⁴A hatene mua bara i lakea mai kunana a tabeke mu ru a mahala ne mua vona.

³⁵“Mu bagetu, mu nami puru a lam.

³⁶Mu dava manga e huriki a vora ri pasimata na matakari ne ria ge hamule valai na habu na parangia. Ri davea ge hamule valai, bara ri talea a logo na ruma, ge dili a matakari ne ria.

³⁷Na tahuna i hamule valai, bara i rata kamumu e huriki a vora vona i uka ma ri mahita. A taki muholi mua, ra bakovi dagi iea bara i bagetu i taki ria ri made na dede, i vakani ria.

³⁸Bara a matakari ne ria i hamule valai na kuru rodo, o na hatelanga pokopoko, i matai e huriki a vora vona ri tabana ni matapara, ri pasimata vona, bara i rata kamumu hateka ria.

³⁹Mu luhoia a ngava iea: A tahona ruma bara i lohoka vona a kilala ge valai vona a bakovi ni panaho, bara i matapara mavonga, i uka tara viri ge pukea a ruma vona.

⁴⁰I mavonga, mu pasimata vona a Tuna Bakovi, a vuhuna bara i valai na tahuna i uka ma mu luhoi ge valai vona.”

⁴¹Lakea e Petrus i nanea, “Bakovi Dagi, ra nivakakika iea o vakakika mia kunana vona, o e huriki lobo ranga, o vakakika ria vona?”

⁴²E Bakovi Dagi i koli, i ta maea, “A bolekori i rata lobo a leho a bakovi dagi vona i habia, a bakovi dagi vona bara i ratea ge matakari e huriki a vora. Bara i takia ge veru a maki ni kani ne ria na tahuna i lakea na tanga tara.

⁴³Muri, na tahuna a bakovi dagi i hamule valai, i masia a bolekori iea i rata kamumu a leho vona, bara i rata kamumu hatekea.

⁴⁴A taki muholi mua, bara i ru ia ge matakari a mahala lobo vona.

⁴⁵Pali a bolekori bara i taki mulea i ta maea, ‘A viri dagi nau i uka ma ge valai malaviriri.’ Lakea i vakatubu ni ubi a vora bakovi a vora ngatavine, i kani i ninu, i manga manga viliha lae.

⁴⁶Ra bakovi dagi vona, bara i valai vakaturutu na parava a vora i pahaluhoi ta i uka ma ge valai vona. Bara i luve na kilala a vora i pahadaki ta i uka ma ge luve vona. Lakea a bakovi dagi bara i tolo pilea a vora iea. Muri bara i ru turane huriki i uka ma ri luhoi torea a Vure.

⁴⁷“A bolekori i lohoka vona a ningaru na bakovi dagi vona, pali i uka ma i toni ni rata, bara ni ubi balaka kupo.

⁴⁸Pali a bolekori i uka ma i lohoka vona a ningaru na viri dagi vona, lakea i rata ruru a maki, bara ni ubi popote kunana. A viri a Vure i habi a leho i kupo vona i uka ma ge made tavula. A Vure i ngarua ge vakabele a kanena i kupo.

⁴⁹“A valai ga rungania a malala. A dodo vona a hini i uka ma ni rungani ma.

⁵⁰Iau ga bole a nimadihi dagi. A luhoi legelege hateka, a ngarua a parava iea ge valai malaviriri, ge lobo.

⁵¹Naha ni luhoi a valai ga habi a nivalemu na malala. I uka liu. A valai ga vakalipida e huriki.

⁵²I vakatubu mona, a viri ala lima na kabu i taku bara to vagima. A viri ala tolu bara to vagima turana viri ala rua. A viri ala rua bara ru vagima turana viri ala tolu.