Lukaj 2:11-38

¹¹Pwe Jaunkamaur ipwidi on komail ran wet nan kanim en Dawid iei Kaun Krijtuj.

¹²A iet kilel on komail: Komail pan diar jeri o a kidikidiki pena likau en jeri o wonon nan deun kamana man.

¹³A madan pwin en tounlan nederenia mi ren tounlan o, me kapina Kot majani:

¹⁴Kapina on Kot waja ileile o jappa en popol; o aramaj konekonelar!

¹⁵Kadekadeo tounlan kan lao kotila jan ir, kotidala nanlan, jilepan jip akan ap inda nan pun arail: Kitail pan kola Petleem pwen kilan me wiauier waja o, me Kaun o kotin kajale on kitail er.

¹⁶Irail ari madanedo, ap diaradar Maria i Iojep o jeri o, a wonon nan deun kamana man.

¹⁷Irail lao kilaner, rap kalok jili me re kajokajoi on ir duen kijin jeri o.

¹⁸A karoj, me ronadar, puriamuiki en jilepan jip oko ar kajokajoi on irail.

¹⁹A Maria nekinekid majan pukat karoj o madamadauaki nan monion i.

²⁰O jilepa ko puredo kalinanada o kapina Kot duen karoj, me irail ronadar o kilaner, duen a loloke don irail er.

²¹Kadekadeo murin pon walu pon, ran en a jirkomjaij, re ki on mar a Iejuj, duen me tounlan kotiki on mon a kotin ipwidier.

²²Ran akan en a kamakelekel lao daulier duen kapun en Mojej, ira ap wa don i Ierujalem, pwen mueid on Kaun o.

²³Duen a intinidier nan kapun en Kaun o: Mejeni ol karoj me jaraui on Kaun o.

²⁴O pwen kida mairon eu, duen me intinidier nan kapun en Kaun: Turtel muroi riamen de muroi pulepul riamen.

²⁵A kilan, aramaj amen mi Ierujalem, mar a Jimeon, iei aramaj o me pun o majak Kot, o auiaui kapol pan Ijrael, o Nen jaraui kotikot re a.

²⁶A Nen jaraui kotin kajale on i, me a jota pan mela, mon a pan kilan japwilim en Kaun Krijtuj.

²⁷O Nen jaraui kotiki on i, en kolan im en kaudok. A jam o in a lao walon on nan im en kaudok jeri o, pwen kapwaiada duen tiak en kapun o,

²⁸I ap koledi i kapina Kot indada:

²⁹Main, re kotin kajamo japwilim omui ladu popol duen omui majan,

³⁰Pwe maj ai udialer omui kamaur,

³¹Me re kotin kauada janjal mon aramaj karoj.

³²Pwen marain eu, me kamaraineki men liki kan, o kalinanada japwilim omui men Ijrael.

³³A jam a o in a puriamuiki meakan, me re indinda duen i.

³⁴Jimeon ari kapai ir ada indan Maria in a: Kom kotin mani, men et me japwile don kapupedi o kamaureda me toto ren men Ijrael, kilel eu, me re pan kaundenkoma.

³⁵Nan kodlaj pan dokodi nen omui, pwe monion en me toto en mulekiada.

³⁶O li jaukop amen mia, mar a Ana, nain Panuel kijan kadaudok en Ajer, me likailapalar, me papaud jaunpar iju jan ni anjaun a makelekel.

³⁷I ari li odi men jaunpar waleijok paieu tauer poa, ap jota kin pedoi jan nan im en kaudok, papa Kot kaijejol o kapakap ni ran o ni pon.

³⁸I me pil pwarado ni klok ota, kapina Kaun o kajokajoi duen i on toun Ierujalem karoj, me auiaui jaunkamaur.