Lukaj 21:11-35

¹¹O rerer laud en jap akan pan wiaui, o lek, o jon en jomau pan pwaida, o pil janjal kamajapwek kai, o kilel lapalap akan pan pwarada jan nanlan.

¹²A mon mepukat re pan jaik komail edi, o kame komail, o pana komail la nan jinakoke kan o imaten pwen kalualan ren nanmarki o jaumaj akan pweki ad ai.

¹³A mepukat pan wiaui on komail, pwen kadede kin ia.

¹⁴Komail ari inauki on pein komail nan monion omail, me komail jota pan patauki, me komail pan japenki.

¹⁵Pwe nai me pan kalokaia komail, o kalolekonla, pwe me kailon kin komail, en jota kak kalikama, o jo palian.

¹⁶A jam o in omail, o ri ol akan, o jau omail, o kompokepa kan pan pana komail la, o akai komail me re pan kamela.

¹⁷O aramaj karoj pan kailon kin komail pweki ad ai.

¹⁸A jota pit en mon omail pit pan lokidokila.

¹⁹Dore kila kanonama maur omail:

²⁰A komail lao udial, me jaunpei kan kapili pena Ierujalem, komail ap ajaki, me a ola korendor.

²¹A me mimi Iudäa, ni anjau o, en tandala nan nana; o me mi nan waron a, en pitila jan; o me mimi nan jap, ender purelan i.

²²Pwe i anjaun depuk, pwe karoj, me intinidier, en pwaida.

²³Juedi on me lijean o me kadidi jeri ni ran oko! Pwe kalokolok pan lapalapia nan jap et o onion on aramaj pukat.

²⁴O re pan kame kila kodlaj, o jalilan wei karoj, o Ierusalem pan tiak pajan ren men liki kan, lao anjau en men liki kan, pan lel.

²⁵O kilel akan pan wiaui ni katipin, o jaunipon, o uju kan, o aramaj nan jappa pan majak o pan pinidar, o madau o iluk kan pan anian nil laudeda;

²⁶O aramaj akan pan okila ar majak o auiaui me pan wiaui nan jappa; pwe kel en lan akan pan mokideda.

²⁷Irail ap pan kilanada Nain aramaj a kodido ni dapok ki rojon o linan kaualap.

²⁸Mepukat lao pikikidi wiaui, komail ap jarada o kajinenda, pwe a leler omail kamaioda.

²⁹A kotin majani karajeraj eu on irail: Kilan tuka pik o tuka karoj!

³⁰Ni omail kilan me irail wiliada, komail kin ajaki, me rak o me korendor.

³¹Iduen komail, komail lao kilan mepukat lao wiaui, komail ajaki, me wein Kot korendor.

³²Melel I indai on komail, di wet jota pan imwila mon mepukat karoj pan pwaida.

³³Lan o jappa pan jorela, a ai majan akan jota pan poula.

³⁴Komail ari kalaka pein komail, pwe monion omail de toutouki kaped en mana, o kamom jakau, o nononki maur et, o ran o ap madan lel don komail.

³⁵Pwe likamata injar eu, a pan ko don karoj, me kin kakaujon jappa.