Lukaj 12:17-46

¹⁷I ari lamelame indada: Da me i en wiada? Pwe jolar waja en nekinek ia ai kapwa kan.

¹⁸I ari indada: Nan iet me i pan wiada: I pan palan pajan ai im en nak kan, ap kauada me laude jan kai; i waja me i pan nekidala me wojadan ia o ai dipijou karoj;

¹⁹A i pan indan nen i: Nen i, dipijou toto on par toto, me nekineki on uk er. En moleilei, o mana, o nim o perenta!

²⁰A Kot ap majani on i: Pweipwei men koe, pwe ponpon wet nen om pan ilakido. A ij me pan aneki kapwa pukat, me koe nanak penaer?

²¹Nan iduen me kin roporop pena dipijou on pein i, ap jota kapwapwa ren Kot.

²²A a kotin majani on japwilim a tounpadak kan: I me I indai on komail, eder lamelame maur omail, me komail pan tunole, pil iermen pali war, me komail pan likauki!

²³Maur me kajampwal jan mana, o war me mau jan likau.

²⁴Kalelapok on rape kan! Re jota kin kamorok, re pil jota kin nak pena, pil jota arail pera de im en nak, a Kot kin kotin katunole ir. A komail jo kajampwal jan manpir kaualap?

²⁵A ij nan pun omail, ni a nonki, me pan kak uje pajan pein i ki tipon en pa eu?

²⁶Ari, ma komail jota kak on wiada me manai, a da me komail kin nonki okotme?

²⁷Kalelapok on kiop akan, me mi nan jap, duen ar kakairida! Re jota kin dodok, o re jota kin monkol pena. A I indai on komail, pil Jalomo ni a linan karoj jota a likau dueta apot irail.

²⁸Ari, ma iduen Kot kotin kapwataki dip, me mi nan jap ran wet, a lakap pan lokidokila nan jtop, iaduen a jota pan madan kalikauwiada komail, me pojon tikitik?

²⁹A komail, ender nonki, me komail pan mana o nim, o komail der injenjued!

³⁰Pwe mepukat men liki kan kin nononki. Pwe Jam omail, me kotikot nanlan, mani, me mepukat karoj mau on komail.

³¹A rapaki japwilim a wei, a mepukat pan poujalan komail.

³²Der majak pwin tikitik koe, pwe iet kupur en Jam omail: En ki on komail wei o.

³³Netikila omail kapwa kan, ap kijakija wei, wiai on komail ed ko, me jota pan marinala, o pai nanlan, me jo pan ola, waja me lipirap men jo kak on, o man en mot jo kak kawela ia.

³⁴Pwe waja omail pai mi ia, iei waja monion omail pil kin mia,

³⁵Nan luke pamail en katenten pena o omail jer en ijij

³⁶O komail en dueta aramaj akan, me auiaui ar monjap ni a pan kodo jan kamadip en papaud, pwe i lao kodo letelet, re en madan ritinada mo a.

³⁷Ladu ko meid pai, me monjap o ni a pan pwarado, diar ar majamajan. Melel I indai on komail, a pan kaiada a likau o kamod irail edi on mana, ap pan apapwali irail.

³⁸O ma a pwarado ni auer kariau, de kajilu, ap diar ir majamajan, nan meid pai ladu pukat.

³⁹A komail en aja, ma kaun pan im o ajaer anjaun lolap o pan pwarado, a pan majamajan o jo pan mueid on, im a en kulia jan.

⁴⁰Komail ari pil ononop, pwe Nain aramaj pan pwarado nianjau me komail jaja.

⁴¹Petruj ap potoan on i: Main, re kotin majani don kit karajeraj wet, de on irail karoj?

⁴²A Kaun o kotin majani: Ari ij jaunkoa lelapok o lolekon, me a monjap kajapwilada, en kaunda a ladu kan, pwen nek on irail kan ar mana ni anjau me kon on?

⁴³Meid pai ladu o, me a monjap pan diarada wiawia duen met ni a pan pwarado!

⁴⁴Melel I indai on komail, a pan kajapwiladan i pon a dipijou karoj.

⁴⁵A ma ladu o pan lamelame nan monion i: Ai monjap pwapwand, o a pan tapiada kame ladu o lidu kan, o mana o nim, o kamom jakau,

⁴⁶Monjap en ladu o ap pan pwara do ni ran o, me a jo auiaui i, o ni auer, me a jaja, o a pan lepuk pajan i, o kajapokalan nan pun en me jopojon akan.