LUKA 9:6-21

⁶Taunabunai, idia na e raka lao, hanua hanua lalodiai sivarai namo e harorolaia, bona gorere taudia e hamauridia.

⁷Herod Ḡaubada ese Iesu ena kara haridia e kamonai, bena kudouna e hetaha, badina he haida eto Ioane na mase amo vada e tore isi lou.

⁸Ma haida eto Elia vada e hedinarai. Ma haida eto peroveta tauna gunana ta vada e tore isi lou.

⁹A Herod eto, Ioane be kwarana na utua oho, a ina harina na kamonaiamu tauna be daika? Bena e urava baine itaia.

¹⁰Aposetolo taudia na e lou, edia kara iboudiai Iesu e hamaorolaia. Bena ia ese e hakaudia siri, gabu ḡaḡaena ta, Betesaida kahana ai, unu e hakaudia lao.

¹¹A hutuma dibadia bena e ḡavaia; bena ia ese e abidia dae, Dirava ena basileia herevadia e harorolai henidia, bona gorere taudia e hamauridia.

¹²Dina ḡelona ai, gwauta-raruosi ia dekena ela, eto, Aru taudia na boma siaidia, hanua lalodiai bona uma gabudia ai adia bema tahu, bona bema mahuta; badina be ita na tano ḡaḡaena ai.

¹³A ia ese e hamaorodia, eto, Umui ese adia ba henidia. Idia eto, Ada aniani ḡaudia na ima hona, bona gwarume rua. Eiava, aniani baia ha hoi ini hutuma adia?

¹⁴Badina be taunimanima na daha-ima readia. Bena ia ese ena hahediba e hamaorodia, eto, Ba haduadia, imahui imahui amo bae helai helai diho.

¹⁵Unu e kara toma, bena iboudiai e helai helai diho.

¹⁶Bena ia ese aniani ḡaudia imaosi bona gwarume ruaosi e abi, guba ai e gaga dae, e hanamoa; bena e baki sisi, hahediba e henidia, bae heni hagau-hagau.

¹⁷Iboudiai e aniani, bogadia e kunu. Bena aniani bahudia e habou, bosea gwauta-rua e hahonu.

¹⁸Nega ta ia sibona e ḡuriḡuri; ena hahediba danu ia ida e nohova. Bena ia ese e nanadaidia, eto, Taunimanima be dahaka e tomamu, lau be daika?

¹⁹Idia e haere, eto, Ioane Bapatiso e tomu; a haida e tomu Elia, ma haida e tomu peroveta tauna gunana ta vada e tore isi lou.

²⁰Ia ese ma e nanadaidia, eto, A umui be dahaka o tomamu, lau be daika? Petro ese e haere henia, eto, Dirava ena Keriso.

²¹Bena ia ese e taravadia, eto, Tau ta basio hamaoroa.