Luka 8:39-54

³⁹“Kumulu a kulo pang ye malala kiong, lo kugasa pang di tooltool ye so dook mata yo Maro iyeii pong i.” Motong la tool tani, in imulu a ilo pang malala mai a lo igasa pang di tooltool ye so tina le imot yo Yesu iyei panga nga.

⁴⁰Motong la Yesu iyege ni tani, inbe iye di galiunu tiyiri ye ookoo kidi a timulu a tila pang ran koonoo kapala. Ngan le di tooltool malala mai yo titar matadi ye a tinamu nga, ngan tikamata le lodi ponana ye yo imulu a ilong pang ye di nga.

⁴¹Inbe tool atu yo ene Yairus i, in ipa a idu. Ngan ya in tool mai atu yo matan kala rumu kidi Yuda ke gaongo i. Le nga idu ikamata Yesu, motong la igun turunu du Yesu kene punu, inbe itoru a imangmang ye be yaru tidi pang rumu ki.

⁴²Ngan imangmang ye nen, yesoo bong Yairus tani in natunu garup ataleu, inbe rai ki sangaul be ru leu, bong matamatenge mai ikauu le be imata. Motong la Yesu ipa a be idi pang ye rumu ke tool tani, ngan le di tooltool malala mai tina ngan titoo lapau le tiparlokoloko.

⁴³Ngan garup atu yo iyolo rara ye rai sangaul be ru i, in iyepe lapau. Bong tool sa be ikamata a iloni, a nen ngan ikarata le tinini dook mata mulu, ngan tiap.

⁴⁴Motong la garup tani in ipa ke Yesu murini le isulmaia baene la itoko sousoungu matolene ke Yesu, in matana. Yeisa be iyei nen, ngan le pattu leu be rara mooloo tani in imot ye le iwodowodo dook mata.

⁴⁵Motong la Yesu itor di nen, “Ai, sei itokau i?” Ngan di tooltool tina ngan di le imot tipataukala, motong la Pita iyei ne, “Tool mai, di tooltool malala mai san la tigaliu ong le tiparlokoloko nga.”

⁴⁶Bong ngan Yesu iyei ne, “Tool atu la itokau i, le ayetai ben gurana kiau kasin ilungmai au oo.”

⁴⁷Motong la garup tani in lon tar nen o ke be itarkoo tiap. Le nga itattadai, inbe itangarur a iman tina le igun turunu du Yesu kene punu, inbe iwete pang di tooltool tina ngan le imot ye soo so a le itoko Yesu, ngan le pattu leu be tinini dook mata mulu ye i.

⁴⁸Motong la Yesu iwete panga nen, “Natuk, lo medana kiong yo kutaru pau i, in la ikaratong le tinim dook mata mulu i. Le kula ngan le la kuyepe ye lo silene ke Maro.”

⁴⁹Yesu iwetewete pang garup tani in go, inbe tool atu ipa ye rumu ke Yairus a ipot pombe. Le nga iwete pang Yairus nen, “Atoo, natum garup in imata oo. Le kin kuporo pannoongoo in be idi mulu be.”

⁵⁰Yesu ilongo betanga tina yo tool tani in iwete nga, le nga iwete pang Yairus nen, “Kin kutattadai be, bong kuparama lo medana yo kutaru pau in le imede, ngan natum ole imadit mulu.”

⁵¹Yesu iwete nen a imot, motong la kene yo tipa le di pombe rumu ke Yairus tani nga, ngan ilele di tooltool be titoo a tilo rumu lono be. Le ikaua Pita ye Yowan ye Yemis inbe garup kase tani in tamana le tinana leu, la iye di tilo rumu lono nga.

⁵²Tilo ngan di tooltool le imot yo tiyepe rumu nga, ngan titangtang inbe tiwou aisor. Motong la Yesu iwete pang di a ilele di nen, “Katang dookoot! Garup kase in imata tiap, bong iken mata leu.”

⁵³Ngan nen le di tooltool tina tingeleraia Yesu ye yo iwete nen nga, yesoo lodi galanga nen, garup kase in imata oo.

⁵⁴Motong la Yesu itoko garup kase tani in baene, inbe koonoo panga nen, “Natuk, kumadit.”