Luka 7:17-40

¹⁷Ebu Iesuꞌa nagini haḡairoteꞌe hariḡaniꞌa Iuda habaꞌa ebu uhiḡa habaꞌa niduꞌano bororaro.

¹⁸Ioane Babatisoꞌe ḡuꞌa neḡano radiuteꞌe zamaḡano tahiꞌaḡaniꞌa ane vaḡe onamadu Iesuꞌa haḡairoteꞌe hariḡa niduꞌa meꞌodo haro. Ebu Ioaneꞌa ane tahiꞌa ꞌaheu huze onaadu ziro.

¹⁹“Zuhiꞌa Boro Iesu vaḡe onamadu ꞌahige ḡadinoꞌi, 'Onaiꞌuma raꞌeteꞌe vazeḡa Kerisoꞌe ḡahe ga eme vaze ꞌahoga guhiniꞌuma?'”

²⁰Ebu zeꞌe Iesu mazao feurirotene, ani niro, raenaꞌa, “Ioane Babatisoꞌa ḡadinoga veize eme tuḡufeha. Ani raenaꞌa, 'Onaiꞌuma raꞌeteꞌe vazeḡa Kerisoꞌe ḡahe ga eme vaze ꞌahoga guhiniꞌuma?'”

²¹Eꞌe madaḡano Iesuꞌa ugi nunu meiroteꞌe vazeḡa ḡehaḡa faiziro, vine sauꞌa sauꞌa hegoze buziro ebu ubuma kuru azaḡa ḡehaḡa bare ehamanoga radu faiziro.

²²Eꞌanoꞌo Iesu ani vaze ꞌaheu eꞌe naenaeziro, raeaꞌa, “Bare onamadu zaꞌe nagini horonateꞌe zu egateꞌe moneo Ioane ihonoꞌi! Ubuma kuru azaḡaꞌe ehamuꞌohe, oda sauꞌa azaḡaꞌe edauꞌohe, lefera azaḡaꞌe manore deheruꞌohe, teḡaze uhuḡa azaḡaꞌe igiꞌohe zu rune azaḡaꞌe bare ḡabozeꞌohe. Ebu zahara azaḡa hari manoḡa haramo ziniꞌohe.

²³Eḡe mazao fi mene modeꞌeteꞌe vazeḡaꞌe manohuga hidiꞌuma!”

²⁴Ioaneꞌa tuḡuziroteꞌe azaḡaniꞌa iḡunirotene, Iesuꞌa Ioane moneo vaze ḡuḡuvaḡa ziro, raenaꞌa, “Za vaze nagiḡa horonoga veize haba bohaꞌa onamiro? Zavaraꞌa imi veḡa hudi naeninaeniꞌeteꞌe horonoga radu onamirohe? Mene!

²⁵ꞌOugadu za vaze nagiḡa horonoga veize onamiro? Naeḡa boro dabuaḡa vidauꞌeteꞌe vazeḡahe? Mene! Dabua manomano vidauꞌeteꞌe zu ḡau manomanoḡeta radiuꞌeteꞌe vazeḡaꞌe kini neo radiuꞌohe.

²⁶ꞌOugadu vaze nagiḡa horonoga veize onamiro? Peroveta vazeḡahe? Oꞌe! Eḡeꞌa ziꞌohe. Peroveta azaḡa niduꞌa vitizeꞌeteꞌe vazeḡaꞌe Ioane.

²⁷Ioane moneo Buka Zaḡoḡano ꞌahige mirihiro, raenaꞌa 'Ḡianoꞌi! Badiꞌaꞌa ḡae zamao vaze ꞌahoga ibite tuḡuniꞌuma. Aniꞌe ḡae zamao ḡae ibi ruhibiꞌuma.'

²⁸Ioaneꞌa Keriso ibi ruhibiroteꞌe uꞌano, aniꞌe rahao ꞌada radiuꞌeteꞌe vazeḡa boꞌaḡano vaze niduꞌa vitineꞌohe. Rehano, Badiꞌaꞌa ibitoziniꞌeteꞌe zamaḡano ḡonaga vazeḡa zu Ioane vitineꞌohe.”

²⁹Ebu Iesu ḡoere igiroteꞌe azaḡa niduꞌa zu takesi azaḡa raenaꞌa, “Hube, Badiꞌa haḡaeꞌeteꞌe ibiꞌaꞌe duduḡa!”, mazaḡa zeꞌe Ioaneꞌa bapatizozadu ḡihuriro.

³⁰U Farisea azaḡa zu Mose goro ḡoeꞌa ihozeꞌeteꞌe azaḡaꞌe Ioane bapatizo hezaho hanadu mene ḡihuriro. ꞌOugadu zeḡe veize Badiꞌaꞌa urateꞌeteꞌe haḡaiḡa zu hezaho haro.

³¹Iesuꞌa bare raenaꞌa, “Izidi azaḡaꞌe naginio idaziꞌuma? Ze iniu heuḡa?

³²Zeꞌe tahiꞌa komeꞌa komeꞌaniꞌa ne hunio ehoradu araheꞌeteꞌe heuḡa. Ze rovonadu none tahiꞌaḡaniꞌa mone tahiꞌaḡa mazao harae huhuꞌuhiꞌenaꞌa, 'Eme muio zavonoga radu suraꞌi hodeha, rehano za mene zavoneha. Ebu eme rune habaꞌano niau ḡoinaheha, rehano za mene nianeha.'

³³Ioane bapatizoꞌa onaadu ogomu mene audo zu vaini vuḡa mene gagido. ꞌOugadu za rae modiro, raenaꞌa, 'Ioaneꞌe vine sauꞌaḡeta.'

³⁴U eḡe, Vaze Ubugaꞌe onaadu ogomu auꞌohe ebu vaini vuḡa gageꞌohe. Rehano za e rae modeꞌohe, raenaꞌa, 'Aniꞌe ogomu fuꞌa zu vaini vuḡa fuꞌa. Ebu ani takesi azaḡa zu haḡai sauꞌa azaḡa teite tiburuꞌohe.'

³⁵Rehano Badiꞌa hegoteꞌeteꞌe azaḡa huhuzaḡaꞌe eḡe zu Ioaneꞌe duduḡa rae reꞌuma.”

³⁶Mada ꞌahogano Farisea vazeḡa ꞌahoga niḡa Simonaꞌa Iesu ane teite oganoga veize huniro. Ebu Iesu ani Farisea vazeḡa ne onamadu ogaꞌuma habaꞌano taviro.

³⁷Eꞌe habaꞌanoꞌe haḡai sauꞌa haḡainuteꞌe roḡaeḡa ꞌahoganiꞌa radiunu. Aniꞌe Iesuꞌa Farisea vazeḡa neo ogaueteꞌe ederirotene, dehoro hohoga manoḡa naeḡa boro bio komeꞌa manohuga irivaꞌonadu mae onamiro.

³⁸Ebu roḡaeꞌa ne diuḡadu Iesu ḡaruḡa onamadu niauꞌenaꞌa, odaḡa babaḡano ḡuḡuriro. Ebu niḡa vuḡaniꞌa Iesu oda rana sore buanadu abune vanirotene, iguḡa hina odaḡa zauhe iminiro. Ebu gubaneꞌenaꞌa, odaḡa furaꞌinadu dehoro beuꞌiro.

³⁹Iesu oganoga radu huniroteꞌe Farisea vazeḡa Simonaꞌa roḡae eꞌeꞌa ꞌouge haḡairoteꞌe horonirotene, ani ane zamao zamariro, raenaꞌa, “Vaze ꞌadiꞌe peroveta vazeḡa reine, ani roḡae nagiḡaniꞌa oboneꞌetaꞌe ederiꞌuma. Ebu roḡae ꞌahiꞌe sauꞌa rae ederiꞌuma!”

⁴⁰Ebu Iesuꞌa niro, raenaꞌa, “Simona, e hari ꞌahoga ḡeꞌuma.” Simonaꞌa ninaꞌa, “Ihore vazeḡa, ehoꞌi!”