Luka 6:3-22

³Mupie Jesuzi ʒiŋuc jazawec: “Dawidi â ŋicfâcne nânâre hâmohuc wiac embiŋ, i ŋoŋe wose manac mi eeŋgopieŋ me?

⁴Dawidi e Anuture ufuŋko ferâ poroŋ Anuture biŋe râekicne i rorâ nâhuc ŋicfâcne jareme mâmâc nâmbiŋ. Poroŋ i ŋic omane bâtâc bajarekicne, bâzi ririke ŋic micbuc‐jeŋic. Eme i sifu nâmbiŋ.”

⁵Iŋuc murâ muwec: “Ŋic Fâri Wâtuŋne e sabata hombaŋ irec rune jukac wâc.”

⁶Eme sabata hombaŋ mocko mitificko ferâ miti jaza qazuc ewec. Ehame ira ŋic moc ŋewec, e me fârene ɋaŋakicne.

⁷Eme miti qaqazu â farisaio jaŋe hombaŋko ŋic bâpiaŋkeme honerâ dâŋko râeniŋte ruc bahuc ŋembiŋ.

⁸Eme Jesuzi maŋjeŋicko hone tararâ ŋic mene ɋaŋakicne e ʒiŋuc âzâcnewec: “Go fahare mai domac.” Mume fahare domawec.

⁹Ehame Jesuzi ʒiŋuc jazawec: “No wio‐ŋarepe muniŋ: Sabata hombaŋko wiac biaŋne me wiac sâqocne ezo, ŋic bâpiaŋ‐jopazo me sipiric‐jopazo?”

¹⁰Iŋuc murâ risic forisic honec‐joparâ ŋic ʒiŋuc âzâcnewec: “Mege fâretiŋnec.” Eme ŋic e iŋuc eme meticne sanaŋkewec.

¹¹Eme jaŋe i hone manac erâ aariczi maŋjeŋic fusucmame Jesu iŋuc me iŋuc ecneniŋte muc manac embiŋ.

¹²Dameŋ ira Jesuzi tikio numuocte fewec. Ferâ ŋafe ʒora Anutu numucnehec juhame hae furewec.

¹³Hae fureme kikefuŋfâc‐ticne hefârec‐joparâ jaŋeraonec 12 bâwosâec‐joparâ motec bacjopawec, ehuc ʒâŋe sâko‐jeŋic aposolo muwec.

¹⁴Ʒâŋe buchuc‐jeŋic ine ʒiŋuc: Simoŋ, ʒâŋe‐ticne moc Petoro â ɋaticne Anderea, erâ Jakobo â Johane, erâ Filipo â Batolomaio,

¹⁵erâ Mataio â Toma, erâ Jakobo Alifaiore ŋokâ â Simoŋ Ʒelote,

¹⁶erâ Juda Jakobore ŋokâ â Juda Karioto haeonec, e juku Jesu doc bawec.

¹⁷Eme rocjopame tikionec waharâ wâneŋko fisirâ juhapie kikefuŋfâc‐ticne bocjaha â ŋic guru sâko erao tumaŋnembiŋ. Jaŋe Judaia mâreŋkonec â Jerusalem haeonec â Tiro Sidoŋ hâwec moŋgeŋkonec fisipie miti jazawec â huchec ɋiɋicne bacjopawec.

¹⁸Erâ demoŋzi areŋ ejarewec jaŋe wâc bâpiaŋ‐jopawec.

¹⁹Eme bâuapie tâpiri‐ticne jaŋerao fotâcneme ɋiɋic qambiŋte bâuaniŋte kime iriac mâretec ecnembiŋ.

²⁰Eme Jesuzi motecfâc‐ticne jaŋerao ʒâŋe fihuc ʒiŋuc muwec: “Hapetac jueŋgopieŋ ŋoŋere manape ʒerine ekac, ŋoŋe hâcne Anuture uucmaŋ biŋe qaŋarekicne.

²¹Dameŋ ʒiŋuczia nâ hâmoc ehuc jueŋgopieŋ ŋoŋere manape ʒerine ekac, ŋoŋe hâcne juku nâ gapec enʒoŋgopieŋ. Dameŋ ʒi ki busâqoc ehuc jueŋgopieŋ ŋoŋere manape ʒerine ekac, ŋoŋe hâcne juku bubiaŋ bâfuanʒoŋgopieŋ.

²²Ŋic jaŋe Ŋic Fâri Wâtuŋne ere erâ qaisoc‐ŋopârâ jâpe bâsuec eŋarerâ musâqorec‐ŋoparâ ʒâŋe‐ŋeŋic musoriŋkeniŋmu, ŋoŋe manariŋ‐ŋopakopac.