Luka 5:4-23

⁴Le nga iwetewete pang di a imot, motong la iwete pang Simon nen, “Ai, kapie pang lama ni a kadu, lo ngan be kakatte pu kiang tina du, a nen ngan kakap i sa ye.”

⁵Motong la Simon tani iraua betanga ki nen, “Atoo, tool mai, ye bong mooloo i, am le imot guramam be le amkaua i sa, ngan le amkap touo i siap. Bong dookoot kuwete oo, le ole atoo koom a akatte pu mulu du.”

⁶Yeisa be tikatte pu tina du ngan le tikap welewele di i alunu san le kasin leu be pu kidi tina ngan pukpukbe.

⁷Le nga tipatai pang di diedi yo tiyepe ye ookoo san nga, ngan be man tilon di. Motong la timan a tiye di tiyau i tina ngan a tipadid ookoo kidi tina ru nga, ngan le kasin leu be timere.

⁸Simon Pita ikamata so tina nen nga, le nga igun turunu du Yesu kene punu ke dama, inbe iwete panga nen, “Tool Mai, kukoo yau le manga mooloo, yesoo au i tool dook tiap ke yeingi noonoo.”

⁹Iwete panga nen, yesoo iye di diene tikamata i tina yo tikap nga, ngan le titakrai ye.

¹⁰Ngan Pita di diene yo Sebedi di natunu ru nga, Yemis iye Yowan, ngan di lapau tikamata i tina nen nga le titakrai ye lapau. Motong la Yesu iwete pang Simon nen, “Kutattadai be! Nookoot katai a ilo nga, ngan ole kouo urata ke kaungu di tooltool a timan pang yau.”

¹¹Ngan nen le tiyolo ookoo kidi tina ngan ilo ete, inbe tiyege so kidi ngan le imot sila ikino, inbe titoo Yesu a tila.

¹²Kene atu in Yesu iyepe ye malala mai atu, inbe tool atu yo botoboto medana ikana tinini mai i le imot i, in iman le man ikamata Yesu. Motong la iro du iken Yesu kene punu ke dama, inbe imangmang ye a iwete panga nen, “Tool Mai, be lom nen nga, ngan kuyei au le tinik igalanga mulu.”

¹³Motong la Yesu isulmaia baene la itoko tool tani, inbe iwete panga. Iyei ne, “Dook mata, au i lok nen, le ole tinim igalanga mulu.” Ngan le pattu leu be botoboto medana tina imapmap, inbe tinini dook mata mulu.

¹⁴Motong Yesu iwete betanga medana pang tool tani nen, “Ai, kin kula kugasa pang di tooltool ye so yo ayeii yong ye, in be. Bong kupa so le la ong taum kupatnai ong pang tool ke paroranga so pang Maro in muku. Lo ngan be kuyei paroranga ye so pang Maro ye yo tinim igalanga mulu, dawa ben tina yo ger ke Mose iwete nga, a be nen ngan di tooltool lodi galanga ye yo tinim igalanga koot nga.”

¹⁵Bong Yesu bingi ki ipa a ingaua ni mai le imot ye so tina yo iyei nga. Le nga di tooltool alunu kaiye timan be man tilongo betanga ki, inbe ikarata di ye matamatenge kidi a be nen ngan tinidi dook mata mulu.

¹⁶Bong ye ke kapala ngan Yesu iyege di tooltool tina, inbe ila ye ni yo taukan tooltool i la ya taleu iyepe, inbe ipatarau.

¹⁷Ye kene atu in Yesu ipatomonai di tooltool yo iye di tiyepe nga, ngan di Paresi le di pannoongoo ke ger ke Maro ngan tiwurur lapau. Ngan di tooltool tina ngan tipa ke malala mai Yerusalem, inbe ke malala le imot yo iken ye tana mai Galili le Yudia a tisi. Ye kene tani in Tool Mai ikaua gurana mai pang Yesu be ikarata di tooltool yo matamatenge ikap di nga.

¹⁸Le nga di tooltool pattu titokotoko tool atu yo kene le baene ikap rama i, in ye sasaka a tikapye be tilo pang rumu lono, a be nen ngan lo titaru dama ke Yesu.

¹⁹Bong ni mangana pa be tilo ye tiap, yesoo di tooltool alunu mata le tisak. Le nga tirookoo a tilo ke rumu pono, motong la tisarraka piti le gumono a tipadua le ipa ye sasaka ki ye ni gumono tani a idu dama ke Yesu. Ngan nen le tool tani in du pombe kataunu kat kidi tooltool budanga mai tina.

²⁰Tiyei nen le Yesu ikamata di ben di nga titara lodi medana panga moolmool nga, le tina iwete pang tool tani nen, “Tool kiau, noonoo kiong ngan agir oo.”

²¹Nen le nga di Paresi le di pannoongoo ke ger ke Maro ngan tilongo Yesu yo iwete nen nga, le nga lodi wetewete nen, “Ona tiap! I sei tool a iwete betanga nen nga? Nga o be ikaua Maro nene, too? Tool sa yo be igiri noonoo kidi tooltool ngan tiap, bong Maro ya taleu.”

²²Ngan Yesu lon galanga ye di ye yo lodi kaua urata nen, ngan oo, le itor di nen, “Nga yelei be lomim kaua urata ye dada nen nga?

²³Soo betanga imarra be aweta i? Be awete panga nen, ‘Noonoo kiong ngan agir oo’, too be awete panga nen, ‘Kumadit a kupa’?