Luka 4:5-21

⁵Lee kadugo na a Shitaanni di gari ni wu ni fugba ni, na shɛ koŋɔ saanra ti bɛɛri shɛ wu na taapile ni.

⁶A Shitaanni di wu pye: «Nɛ na te ɲuŋɔ fɛɛrɛ te ni ti nɔɔrɔ wu bɛɛri kan ma mu, bani tʼa jé nɛ keŋɛ ni. Nʼa giin di ti kan wemu mu ge, di ti kan wee mu.

⁷Ma bu nuguro sin nɛ fɛɛ ni, yee bɛɛri na bye ma woyo.»

⁸A Yesu di wu ɲɔ shɔ na: «Lʼa ka Kilɛ Kafila wu ni na: ‹Mʼa ma Kafɔɔ Kilɛ yɛ pɛlɛ, ma da labye pyi wee yɛ nigin mu.›»

⁹A Shitaanni di wu ɲaha co sanha, na kari Zheruzalɛmu ni, na wu yaha Kilɛ-pɛɛŋɛ pugbɔhɔ ki ɲidii li ni, na wu pye: «Ma bi ɲɛ Kilɛ wo Ja we, kɔn to ɲiŋɛ na.

¹⁰Bani lʼa ka Kilɛ Kafila wu ni na: ‹Kilɛ na ma kaa jo wu mɛlɛkɛɛ pu mu na pʼa ma kasɛri.

¹¹Pu na ma co pu keye ni, kɔnhɔ ma tɔɔgɔ ganha bu guu kagereŋɛ yafiin na wɛ.›»

¹²A Yesu di wu ɲɔ shɔ na: «Lʼa ka Kilɛ Kafila wu ni na: ‹Ma ganha bu ma Kafɔɔ Kilɛ taanna wii wɛ.›»

¹³Ba Shitaanni ya xɔ tee nɔwuuro ti bɛɛri ni wɛ, na gari na wu yaha wà, fo wu ɲidaan tuun wa bɛtii.

¹⁴A Yesu di guri shɛ Galile fiige ki ni Fɛfɛɛrɛ Munaa gbɔɔrɔ ni. Wu mɛgɛ ki bi foro fiige ki bɛɛri ni.

¹⁵Wʼa bi sipyii kalaa pu Kilɛ-pɛɛŋɛ piyɛyɛ yi ni, sipyii pu bɛɛri di wu pɛlɛ.

¹⁶Yesu ya nɔ Nazarɛti ni, xuu wemu ni wʼa bii ge, na jé Kilɛ-pɛɛŋɛ puga ki ni cadɛɛngɛ ki ni, na yìri yere, kɔnhɔ wu Kitabu wu kalaa.

¹⁷A pʼi Kilɛ tudunmɔɔ Ezayi wo Kitabu wu kan wu mu. A wu wu ɲɔ mugi na xuu wa ta wà, lʼa ka wà na:

¹⁸«Kafɔɔ Munaa wa nɛ na, bani wʼa nɛ tìre, kɔnhɔ nɛ Kilɛ Jozaama jo la baa fɛɛ mu. Wʼa nɛ tun na nɛ wu buloo ni kasolemɛɛ faha, di fyɛnmɛɛ ɲɛmugunɔ yɛrɛ pye, di cɔnrɔmɔ fɛɛ wolo pu kanhama ni,

¹⁹di Kafɔɔ wo fɛrɛmɛ yee li yɛrɛ pye.»

²⁰Lee kadugo na a Yesu di Kitabu wu ɲɔ tɔ, na wu kan kapyebye wu mu, na diin, kɔnhɔ wu da pu kalaa. A Kilɛ-pɛɛŋɛ puga ki sipyii pu bɛɛri di ɲahaya kɔ le wu ni.

²¹Wee tuun wu ni a Yesu di ɲɔ kɔn na yu pu mu na: «Pe Kitabu jomɔ pe yʼa logo niɲaa ge, pee ɲɔ ya fa.»