29Inbe timadit tina le tinganga Yesu be ikoo ye malala mai tani a idu diki. Motong la tikauu a tilo ye arono matana yo tikarata malala mai ye i, a be nen ngan tikauu a tikatte du ke madini ye ni yo dook tiap i.
30Bong Yesu ipa le ipalanai di tooltool budanga mai tina ngan a ila.
31Motong la Yesu idu iyepe ye malala mai Kapenam yo iken ye tana mai Galili i. Le nga lal kidi Yuda ke sungunu pombe, ngan Yesu ilo ye rumu kidi Yuda ke gaongo, inbe ipatomonai di tooltool.
32Ngan le di Yuda tina titakrai ye patomonaingi ki, yesoo betanga ki ipa ye gurana ke Maro.
33Inbe ye kene tani, in tool atu iyepe ye rumu ke gaongo tani, bong tool tani in so sadi iyepe ye. Le so sadi idiwidiwoo le nga koonoo le somai. Iyei ne,
34“Atoo! Yesu ke Nasaret, ngan soo so be kuyeii pam i? Nga kuman be man kugarungam, too? Au i lok galanga yong oo, ong in Tool Tani Yo Maro Ipootoo Panga Ya Taunu I.”
35Motong la Yesu ipasak pang so sadi tani a iwete katkat panga. Iyei ne, “Ai, kuwetewete dookoot! Kupas ye tool in a kusi tana!” Motong la so sadi ikatte tool tani du tana sila dama kidi tooltool tina, inbe ipas a ikoo, bong igarungu tiap.
36Ngan nen le di tooltool tina tikamata le nga titakrai, inbe tiwete pang di diedi nen, “Ona tiap! I soo patomonaingi nen i na? Patomonaingi ki ipa ye gurana mai san, le ipas le iwete leu, inbe di so sadi tilongo betanga ki a tikoo!”
37Le nga bingi ke so tina yo Yesu iyei nga, ngan ipa a ingaua tana mai i le imot.
Luka 4
Luka 4:29-37