Luka 4:22-41

²²Zeḡe niduꞌa ani mae ḡihine ḡoeriro zu ani hebeonoꞌo buaudoteꞌe ḡoeꞌa manoḡa egadu zaguzagaro. Rehano, ze raenaꞌa, “Aniꞌe Iosefa ubuga! Emeꞌe ani ḡoere mene igiꞌuma.”

²³Ebu Iesuꞌa ziro. “E edeḡa zaꞌe eḡe mazao ḡoere ꞌahi raꞌohe, raenaꞌa, 'Gohe vazeḡa, ibite ḡaeꞌa ugiḡo fainoꞌi, ebu vaze ꞌahoga ugi fainoꞌi!' Ebu raenaꞌa, 'Iesu, ḡa Kaperanauma neḡano haḡai gigiꞌa haḡairoteꞌe teige, ḡae haba ꞌadao zuni haḡaoꞌi! ꞌOugine, emeḡeꞌa ḡae ḡoereꞌe mae ḡihiniꞌuma.'

²⁴E hube hune ziꞌohe. Zaeꞌa eḡe ḡoere mene mae ḡihineꞌeteꞌe teige, peroveta azaḡa zuni zeḡe habao vazeꞌa mene mae ḡihizeꞌohe.

²⁵Rehano zamaroꞌi! Peroveta vazeḡa niḡa Elia madaḡano, muri uḡidu zu ḡahaꞌa zamaḡano iruguꞌa mene ruꞌaro, eꞌanoꞌo Isaraela habaꞌa niduꞌa zamaḡano zahara boroꞌa buaro. Eꞌe madaḡano ḡozoba ḡehaḡaꞌe Isaraela habaꞌano radiunu.

²⁶Rehano Elia'e Badiꞌa'a Isaraela ḡozoba azaḡa mazao mene tuḡuniro. Aniꞌe Sidoni haba'a uhiḡano ne 'ahoga niḡa Zarepatio radiunuteꞌe ḡozobaḡa 'ahoga mazao tuḡuniro. Zarepati neḡaꞌe mene Isaraela habaꞌa

²⁷Ebu peroveta vazeḡa niḡa Elisa madaḡano Isaraela habaꞌano lefera azaḡa ḡehaḡaniꞌa radiunu, rehano ze mene dehene faiziro. U Siria habaꞌa vazeḡa niḡa Na'amani da'o dehene fainiro. Siria habaꞌa zu mene Isaraela habaꞌa. Eḡe zuni adama haḡai gigiꞌa mene haḡaiꞌuma, rehano ne ꞌahoga vaḡe onamiꞌuma, mazaḡa zaꞌe mene mae ḡihiheꞌohe.”

²⁸Iesuꞌa ꞌouge reirotene, nu'onu'o neḡa zamaḡano vaze nidu'a maḡune rudaro.

²⁹Zeḡe nidu'a iḡunadu, e'e haba'anono'o ani tuḡune vaḡiniro. Ebu dofarao duine feunoga radu, neze ogorarote'e haba'a hitaga tutune itiro.

³⁰Rehano Iesuꞌa vaze ḡunuḡano onamadu ane edeḡano dauḡiro.

³¹Ebu Iesuꞌa Galilea haba'ano Kaperanauma neḡa ovoadu Bana Madaḡano nuꞌonuꞌo neḡano vaze ihoziro.

³²Vaze nidu'a aniꞌa ihozoga igirotene zaguzagaro, mazaḡa ani ḡoere'e gigi'a, Badiꞌa ḡoere heuḡa.

³³Bana Madaḡa 'ahogano vine sau'aḡeta vazeḡa ꞌahogaꞌe nu'onu'o neḡano radiro. Aniꞌa hounaꞌiro, raenaꞌa,

³⁴“Iesu Nazareta vazeḡa! Eme ago ḡunuḡunuꞌoꞌi! Ḡa eme ruifoga radu arahehe? Ḡa iniuꞌe e edeḡa. Ḡa'e Badi'a vaze zaḡoḡa!”

³⁵Iesu'a vine sau'a taꞌiroharo, raena'a, “Hezo'a! Vaze e'e mazaono'o buanoi!” Ebu vine sau'ani'a zeḡe nidu'a boꞌaḡano vaze e'e mae rahao higonadu buau dauḡiro. Rehano vaze a'e mene omatiro.

³⁶Vaze nidu'a zaguzagaro ebu zeḡe zeḡe'a bare raenaꞌa, “Ani ḡoereꞌe nagiḡa? Aniꞌa inaraḡa zu gigiꞌaḡa hina vine sauꞌa zeatene ze egohanadu buaneha!”

³⁷Ebu Iesu hariḡaꞌe uhiḡa uhiḡa haba'a niduꞌa bororaro.

³⁸Iesu'e nu'onu'o neḡa modadu Simona ne onamiro. De'ea Simona emoḡa roḡaeḡaꞌe ahiꞌaniꞌa gigine runiro, eꞌanoꞌo ani fainoga veize vazeꞌa Iesu uminiro.

³⁹Ebu Iesuꞌe ani uhiḡano edanadu ahiꞌa gigiꞌa eꞌe ḡoere riga hina hegone buniro. ꞌOugadu ugi e'e'a ani mazaonoꞌo vaḡiniro. Ebu Simona emoḡaniꞌa zogone iḡunadu zeḡe veize ogomu ḡorohe ziniro.

⁴⁰Ebu mada'a ovoe'eteꞌe zamaḡano, vazevaze'a ugi iraḡa nunu Iesu vaḡe tutuze onamiro, ebu Iesuꞌa evo'a zeḡe tiba tiba rana teadu manore hauḡiro.

⁴¹Vine sau'a sau'aꞌe Iesuꞌe Keriso rae ederiroteꞌe uꞌano, ze vazevaze mazaonoꞌo buarotene, huaro, raenaꞌa, “Iesu, ḡa'e Badi'a ubuga!” Rehano Iesuꞌe, zeꞌa ani rae furenoga mene uratiro, eꞌanoꞌo ani'a tairo zenadu ḡoereze gararoziro.