Luka 22:35-58

³⁵I phenđa e apostolenđe: “Ked bičhalđum tumen ko drom bizo kese lovencar, bizo torbe hem bizi buderi obuća, na li falinđa tumenđe nešto?” A on phende: “Ništa.”

³⁶Tegani o Isus phenđa lenđe: “Ali akana kas isi kesa lovencar, nek lel la! Ađahar hem i torba! A kas nane mači, nek biknel plo fostani hem nek činelfse jekh

³⁷adalese so, vaćerava tumenđe, valjani te pherđol adava soi mandar pisime ko Sveto Lil: 'Dikhle le sar manuše kova ćerela bišukaripe.' Čače, pherđola sa soi pisime mandar.”

³⁸A on phende: “Gospode, ače isi amen duj mačija!” A ov phenđa: “Šukari!”

³⁹I iklindoj adathar, palo plo adeti, dželo ki E maslinakiri gora. Palo leste džele hem lesere učenici.

⁴⁰I ked resle adari, phenđa lenđe: “Molinen tumen te na peren ko iskušenje!”

⁴¹I cidinđa pe dur olendar, edobor kobor šaj te frdel pe o bar, pelo ko kočija hem molinđa pe e Devlese

⁴²vaćerindoj: “Dade! Te mangeja, cide akaja čaša e patnjaja mandar, te na pijav olatar. Ali, nek ovel pali ti volja, a na pali mli.”

⁴³Tegani o anđeo mothovđa pe lese taro nebo hem hrabrinđa le.

⁴⁴A ked inele ani po bari patnja, po zorale molinđa pe. Lesoro znoj ulo sar kaplje oto rat save perena ine upri phuv.

⁴⁵I pali molitva uštino, alo đi ple učenici hem arakhlja len sar sovena adalese so inele umorna taro tugujiba.

⁴⁶Tegani phenđa lenđe: “Sose sovena? Ušten hem molinen tumen te na peren ko iskušenje!”

⁴⁷Sar ine o Isus vaćeri adava, ale nakoro leste but manuša kolen anđa o Juda kova inele jekh oto dešuduj apostolja. Ov alo koro Isus hem čumudinđa le ki čham.

⁴⁸Tegani o Isus pučlja le: “Judo, čumudipnaja li predeja e Čhave e Manušesere?”

⁴⁹Ked o učenici kola inele adari dikhle so o Isus ka ovel dolime, pučle le: “Gospode, te napadina len li e mačencar?”

⁵⁰I jekh olendar khuvđa mačeja e bare sveštenikosere sluga hem čhinđa lesoro desno kan.

⁵¹A o Isus phenđa ple učenikonenđe: “Ačhaven tumen adalestar! Muken len te ćeren adava!” I čhivđa plo vas ko than kote o sluga inele čhindo hem sasljarđa le.

⁵²Tegani phenđa okolenđe so ale te dolen le, e šerutne sveštenikonenđe, e hramesere narednikonenđe hem e starešinenđe: “Mačencar hem kaštencar aljen pala mande sar palo pobunjeniko.

⁵³Divencar injumle tumencar ano Hram, i na dolinđen man. Ali akavai tumaro vreme hem o zoralipe e tominakoro vladini.”

⁵⁴I dolinde e Isuse hem adathar legarde le ko čher e bare sveštenikosoro. A o Petar odural džala ine palo lende.

⁵⁵Ked resle, tharde jag ko maškar e borosoro hem bešle uzalo late. O Petar bešlo olencar.

⁵⁶I nesavi sluškinja dikhlja le sar bešela uzali jag, dikhlja ano leste hem phenđa: “I akava inele e Isuseja!”

⁵⁷A o Petar xovavđa vaćerindoj: “Đuvlije, na pendžarava le!”

⁵⁸Na nakhino but palo adava, dikhlja le nesavo aver manuš hem phenđa: “I tu injan jekh okolendar kola inele e Isuseja!” A o Petar phenđa: “Manušeja, na injum!”