Luka 22:3-47

³Tegani o Sotoni đerdina ano Juda tari diz Iskariot kova inele jekh oto dešuduj apostolja e Isusesere.

⁴Ov dželo koro šerutne sveštenici hem koro narednici e hramesere hem dogovorinđa pe olencar sar te predel lenđe e Isuse.

⁵On radujisale hem phende e Judase da ka den le love.

⁶I ov pristaninđa. I ađahar lelja te rodel šukar momenti te izdajini e Isuse ked na ka oven but manuša uzalo leste.

⁷Ked alo o Dive oto bikvasconengere mare, ko savo valjanđa te čhinel pe bakrore zaki Pasha,

⁸o Isus phenđa e Petrese hem e Jovanese: ''Džan hem ćeren amenđe e pashakoro xajba te šaj te xa.”

⁹A on phende lese: ''Kaj mangeja te ćera la?”

¹⁰Ov phenđa lenđe: “Šunen. So ka đerdinen ki diz Jerusalim, ka resel tumen jekh manuš kova akhari pani ano khoro. Džan palo leste. Ko čher ko savo ka đerdini

¹¹roden e čherutne hem vaćeren lese: 'O učitelj pučela ki savi soba šaj te xal e pashakoro xajba ple učenikonencar?'

¹²I ov ka mothoj tumenđe i bari upruni soba savi već pripremime. Adari čhiven amenđe zako xajba.”

¹³I on džele hem arakhle sa ađahar sar so phenđa lenđe o Isus i adari čhivde zako xajba e pashakoro.

¹⁴I ked alo o vreme te xal pe i Pasha, o Isus čhivđa pe uzalo astali ple apostolencar.

¹⁵I phenđa lenđe: “Edobor zorale mangljum te xav akaja pasha tumencar angleder nego so ka ovav mučime hem mudardo.

¹⁶Adalese so, vaćerava tumenđe, na ka xav aver Pasha đikote lakoro čačimasoro značenje na pherđola ano carstvo e Devlesoro.”

¹⁷Tegani lelja i čaša e moljaja, zahvalinđa e Devlese hem phenđa e apostolenđe: “Len akaja mol hem ulaven la maškara tumende.

¹⁸Adalese so, vaćerava tumenđe, na ka pijav više mol đikote o carstvo e Devlesoro na avela.”

¹⁹I lelja o maro, zahvalinđa e Devlese, phaglja le hem ulavđa le e apostolenđe vaćerindoj: “Akavai mlo telo savo dela pe tumenđe. Akava nastavinen te ćeren te setinen tumen mandar.”

²⁰Palo xajba, lelja i čaša e moljaja, zahvalinđa e Devlese hem dinđa la e apostolenđe vaćerindoj: “Akaja čaša e moljaja nevoi savez ano mlo rat savo čhorela pe tumenđe.

²¹Ali ače, o manuš kova ka izdajini man mancari uzalo astali.

²²Adalese so, me, o Čhavo e Manušesoro, valjani te merav sar soi odredime, ali jao okole manušese kova ka izdajini man!”

²³I o apostolja lelje te pučen pe maškara pumende ko olendar šaj te ovel adava so ka ćerel ađahar nešto.

²⁴I o apostolja lelje te raspravinen pe kovai olendar najbaro.

²⁵A o Isus phenđa lenđe: “E poganengere carija vladinena upro lende hem o vladarija lengere pumen vičinena 'manuša kola ćerena šukar'.

²⁶Ali tumen ma oven esavke! Nego, o najbaro maškara tumende nek ovel sar najtikoro, a o vođa nek ovel sar sluga.

²⁷A kovai po baro? Okova kovai uzalo astali ili okova kova kandela le? Ini okova kovai uzalo astali? A me maškara tumende injum sar okova kova kandela.

²⁸Tumen injen adala kola ačhile mancar ano mle iskušenja.

²⁹I me dava tumen autoritet te vladinen ano carstvo, sar so mlo Dad o Devel dinđa man:

³⁰te xan hem te pijen maje uzalo astali ano carstvo mlo, hem te bešen ko tronja te vladinen upro dešuduj plemija e Izraelesere.”

³¹“Simone, Simone, ače o Sotoni rodinđa e Devlestar te mukel lese te iskušini tumari vera ana mande sar ked neko čhorela o điv maškari sita.

³²Ali me molinđum tuće te ačhol ti vera ana mande. I ked palem ka irine tut kora mande, zorjar te phraljen.”

³³A ov phenđa lese: “Gospode, injum spremno te džav tuja hem ko phandlipe hem ko meriba.”

³⁴A o Isus phenđa: “Vaćerava će, Petre, o bašno na ka đilabi avdive đikote trin puti na ka xovave da na pendžareja man.”

³⁵I phenđa e apostolenđe: “Ked bičhalđum tumen ko drom bizo kese lovencar, bizo torbe hem bizi buderi obuća, na li falinđa tumenđe nešto?” A on phende: “Ništa.”

³⁶Tegani o Isus phenđa lenđe: “Ali akana kas isi kesa lovencar, nek lel la! Ađahar hem i torba! A kas nane mači, nek biknel plo fostani hem nek činelfse jekh

³⁷adalese so, vaćerava tumenđe, valjani te pherđol adava soi mandar pisime ko Sveto Lil: 'Dikhle le sar manuše kova ćerela bišukaripe.' Čače, pherđola sa soi pisime mandar.”

³⁸A on phende: “Gospode, ače isi amen duj mačija!” A ov phenđa: “Šukari!”

³⁹I iklindoj adathar, palo plo adeti, dželo ki E maslinakiri gora. Palo leste džele hem lesere učenici.

⁴⁰I ked resle adari, phenđa lenđe: “Molinen tumen te na peren ko iskušenje!”

⁴¹I cidinđa pe dur olendar, edobor kobor šaj te frdel pe o bar, pelo ko kočija hem molinđa pe e Devlese

⁴²vaćerindoj: “Dade! Te mangeja, cide akaja čaša e patnjaja mandar, te na pijav olatar. Ali, nek ovel pali ti volja, a na pali mli.”

⁴³Tegani o anđeo mothovđa pe lese taro nebo hem hrabrinđa le.

⁴⁴A ked inele ani po bari patnja, po zorale molinđa pe. Lesoro znoj ulo sar kaplje oto rat save perena ine upri phuv.

⁴⁵I pali molitva uštino, alo đi ple učenici hem arakhlja len sar sovena adalese so inele umorna taro tugujiba.

⁴⁶Tegani phenđa lenđe: “Sose sovena? Ušten hem molinen tumen te na peren ko iskušenje!”

⁴⁷Sar ine o Isus vaćeri adava, ale nakoro leste but manuša kolen anđa o Juda kova inele jekh oto dešuduj apostolja. Ov alo koro Isus hem čumudinđa le ki čham.