LUKA 22:18-47

¹⁸Badina be na hamaoromuimu, lau na vine ranuna basina inua lou ela bona Dirava ena basileia baine kau.

¹⁹Bena flaoa atagana ta e abia, e hanamoa, e bitua, e henidia, eto, Lau taugu binai, umui daimui ai vada e heni; ini ba kara toma, lau ilalolaigu.

²⁰E aniani vaitani, bena ia ese kehere ma e abia, eto, Ina kehere na herohemaino matamatana lau raragu ai, umui daimui ai baine hebubu.

²¹Taogu itorena tauna imana na pata latanai, ina lau ohegu ai.

²²Momokani, Taunimanima Natuna vada be laomu, e gwaurai guna heḡereḡerena, a taona itorena tauna madi ihabaina.

²³Bena sibodia e henanadai heheni, idia daika unu baine kara toma.

²⁴Ma sibodia e hapapahuahu heheni, idia daika vada e herea.

²⁵Bena ia ese e hamaorodia, eto, Bese idau-idau edia pavapava ese e lohiadiamu; bona hanua idau-idau taudia ese edia lohia e heatolaidiamu.

²⁶To umui na dia unuheto: umui bogaragimui ai tau guna na tau muritai ai bainela, bona hahekau tauna danu hesiai tauna ai bainela.

²⁷Hereana be daika: aniani gabuna ai e ege dihomu tauna, eiava hesiai tauna? Aniani gabuna ai e ege dihomu tauna ani? Lau be umui bogaragimui ai hesiai taugu na heto.

²⁸A umui be e dibaḡaniguva negadia ai dekegu ai o noho tarikatarikava taumui;

²⁹taunabunai, Tamagu ena basileia ta lauegu vada e gwauraia heḡereḡerena, lau danu basileia ta umui emui na gwauraiamu;

³⁰bena egu basileia lalonai egu pata ai bavaniani bona ba inuinu, bona terono ai ba helai kau, bena Israel iduhudia gwauta-ruaosi ba hahemaoro henidia.

³¹Simona e, Simona e, na hamaoromuimu, Satana ese umui iboumui ai vada e gwauraimui, baine tapomui hidi uit na heto.

³²A lau ese emu vada na ḡuriḡuri, emu abidadama basine darere. Bena lalomu baine lou negana ai ma tadikakamu ba hagoadadia.

³³Ia eto, Lohiabada e, lau baina bamomu ela bona dibura rumana, ela bona mase.

³⁴A Iesu eto, Petro e, na hamaoromumu, kokoroku do basine tai, oi ese hatoi ba ḡoregu, baoto “Lau na asi dibagu ia”.

³⁵Ma eto, Lau ese na siaimuiva negana ai, asi emui vaina, asi emui moda, asi emui tamaka, o raka, umui na ḡau ta ai o dabu a? Idia eto, Lasi.

³⁶Ia eto, A harihari ta mai ena vaina, baine abia kau; ta mai ena moda danu unuheto; ta asi ena dare, ena dabua amo dare baine hoia.

³⁷Badina be na hamaoromuimu, ina e torea herevana anina be lauegu ai baine vara; eto, Ia na kara havara-havara taudia ida vada e duahidia hebou. Momokani, una hereva be lauegu ai baine ḡuḡuru.

³⁸Idia eto, Lohiabada e, dare aurua o ini. Ia eto, Vada heḡereḡere.

³⁹Bena e raka lasi, vaia ena kara Olive ororona ela; ena hahediba danu ia murinai e raka.

⁴⁰Una gabu ai e kau, bena ia ese e hamaorodia, eto, Ba ḡuriḡuri, hedibaḡani ese baine butumui tao na garina.

⁴¹Bena ia sibona e raka siri, nadi ta bema tahoa sisivana; bena e hetuitui, e ḡuriḡuri,

⁴²eto, Tamagu e, lalomu bema heḡereḡere ina kehere na egu amo boma abia oho; to dia lauegu ura, oiemu ura hari.

⁴³Bena aneru ta guba amo ienai e kau, ihagoadana totona;

⁴⁴a hisihisi bada ese ia lalona e gugubaia, bena e ḡuriḡuri goadagoada ela bona varahuna tano ai e moru, rara komutudia na heto.

⁴⁵Ḡuriḡuri amo e tore isi, hahediba dekedia e lou ela, mahutadia ai e davaridia, daradia e doko dainai.

⁴⁶Bena ia ese e gwau henidia, eto, Dahaka dainai o mahutamu? A tore isi, a ḡuriḡuri, hedibaḡani ese baine butumui tao na garina.

⁴⁷Ena hereva lalonai, hutuma vada e gini dae; luda, gwauta-rarua tauna ta, ese e gunalaidia, bena Iesu iharahuna totona e raka kahi lao.