Text copied!
CopyCompare
Kâte Bible - Luka - Luka 20

Luka 20:6-41

Help us?
Click on verse(s) to share them!
6Me ‘ŋickonec fuawec’, iŋuc mupene ŋic sasawa jaŋe manarâ qânâzi hehâmoc‐nâponiŋmu. Jaŋe Johanere manapie porofete fârine ekac i!”
7Irec Jesu ʒiŋuc âzâcnembiŋ: “Hece, nâŋe Miti Opâ‐ticnere fuŋne mi manaŋgopeneŋ.”
8Mupie Jesuzi ʒiŋuc jazawec: “Wiac murâ sâcne, eme noni iŋuc jaha, more micte ʒira wiac eekopac, okacne wâc mi ŋazapemu.”
9Jesu e ŋic dâŋ herâricne moc ʒiŋuc jazawec: “Ŋic moczi waiŋ gie sarawec. Sara‐fârerâ soŋaŋ râec‐joparâ mâreŋ wiwicko rârâ ira dameŋ ʒoricne juwec.
10Juku fârine fufua dameŋ maickeme kiŋaŋ motec moc fârine tucne roocte soreme ra fisime soŋaŋ jaŋe qa imac ecnerâ jâpepie metariŋ risiewec.
11Risieme runezi harierâ kiŋaŋ motec moc soreme rame iŋuc jaha wiac gâgâpâcne ecnerâ jâpepie metariŋ jaha risiewec.
12Eme runezi harierâ kiŋaŋ motec moc soreme jaŋerao fisime ʒâpâ qarâ tuŋkembiŋ.
13Iŋuc epie waiŋ gie runezi manarâ muwec: ‘Ʒi wenac epe? Joroc ŋokâ‐nane sorepe rame araŋ bacneniŋmu mecne.’
14Eme soŋaŋ jaŋe ine ŋokâ‐ticne honerâ nazaŋ gazaŋ erâ mumbiŋ, ‘Eki hâcne juku gie ʒi rauckeocmu, murâ qapene gie ʒi nâŋâcne ezejec.’
15Iŋuc murâ kâteo tuŋke tuŋke rarâ qâhâmombiŋ. Eme gie rune e soŋaŋ weniŋuc ejareocmu?
16Manaŋgopieŋ, e warerâ soŋaŋ iŋucne jopa qâhâmoc ejarerâ gie‐ticnao soŋaŋ furune râec‐jopaocmu.” Eme jaŋe manarâ mumbiŋ, “Aricne, iŋuc mi ejâmbâŋkezo.”
17Mupie Jesuzi hone dendeŋ‐jopahuc muwec: “Miti dâŋɋâreŋ moc kecʒiŋuc fokac i fuŋne weniŋucte? ‘Ficbapa ŋic jaŋe wâtuŋ surehuc behembiŋ, wâtuŋ izi mi jâmâ wâtuŋ ezejec i!’
18Ŋic moczi jâmâ wâtuŋ ira herâ sahac‐ticne imackeocmu, â wâtuŋzi ŋic mocte faio waha qaocmu ine qâgâreckeocmu.”
19Iŋuc mume miti qaqazu â taha bapa micne jaŋe ʒoaŋ ijaha kâpâcwâru baniŋte mumbiŋ. Jesu e dâŋ suŋsuŋne jaŋere muwec, i mana tararâ iŋuc ecnezo murâ ŋic jaŋere hâwic‐jopame behembiŋ.
20Eme jaŋe Jesure ruc bahuc doc bapa ŋic erao sorec‐jopapie rambiŋ. Eme ŋic izi hâcne miti hawari juhuc Jesu dâŋzi bitiŋ bacnepie kime kiarao râeniŋte
21mu esâic ecnehuc mumbiŋ: “Qaqazu, nâŋe gore fuŋne manaŋgopeneŋ, go dâŋ sâcne nâza qazuc eekic, erâ fekicne fosâoc‐jopahuc dâŋ mi muhasickeekic, ehuc Anuture hata jâmbomacko mutiŋne‐nâreekic.
22Irec mutec mananaŋ, Roma ŋicwofuŋ takesi moneŋ râcnepene sâckeekac me mâcne?”
23Mupie eeatuc‐jeŋicte fuŋne mana tararâ muwec,
24“Ŋoŋe siliwa moneŋ moc bâfuarâ nowatupie honepe, ira more hawari â qâreŋ fokac?” Eme jaŋe mumbiŋ, “Roma ŋicwofuŋte.”
25Eme jazarâ muwec: “Murâ ŋicwofuŋte biŋe i ŋicwofuŋ râcnenʒepieŋ, â Anuture biŋe i Anutu râcnenʒepieŋ,”
26Iŋuc mume jaŋe dâŋticne batackerâ wemocko ŋic jaŋere maio qorickenʒapiŋ. Irec mâc wareckerâ dâŋjeŋic fâsâewec.
27Jaŋe rahapie sadukaio ŋic gâcne Jesurao fisimbiŋ. Ŋic i jaŋe, hâmockonec fafahare mi fokac, iŋuc muhuc jumbiŋ.
28Jaŋe hâcne fisirâ Jesu dâŋ ʒiŋuc muhuc âzâcnembiŋ: “Qaqazu, Mose e dâŋ kecʒiŋuc mutâcnewec, ‘Ŋic moczi ŋokac rorâ ɋâric‐ticne mi fuahame hâmome ɋanezi hozec‐ticne rorâ hahac‐ticnere biŋe ɋâric bâfuazejec.’
29Eme hahac ɋa 7 jumbiŋ, ehuc mârâc hahac‐jeŋic ŋokac rorâ ɋâric tâmiric jurâ hâmowec.
30Hâmome ɋanezi hozec‐ticne rorâ iŋuc jaha hâmowec.
31Hâmome ɋaticne moczi hozec ijaha rowec. Iŋuczi iŋuc hahac ɋa 7 jaŋe ŋokac ijaha rorâ ɋâric tâmiric hâmo‐fârembiŋ.
32Eme ʒâhecko hozec‐jeŋic iŋuc jaha wâc hâmowec.
33Eme ŋic 7 jaŋe mâmâc sasawa ŋokac ijaha rombiŋte juku fafahare dameŋko more ŋonâŋ ezokac?”
34Mupie Jesuzi ʒiŋuc jazawec: “Dameŋ ʒiŋuczia ʒira mâreŋko ŋic ŋokac roroc eeŋgopieŋ.
35Juku dameŋ sâkoo Anutuzi mana‐jareme sâckeha juju sanaŋte ɋârerâ faharenʒoŋgopieŋ, ŋic ŋokac i jaŋe ine roroc mocwâc mi enʒoŋgopieŋ.
36Wemocte? Jaŋe hâmockonec faharerâ Anuture naru motecfâc ehuc aŋelo jaŋe iŋucne hâmo hetiric mi ehuc furu jaha junʒoŋgopieŋ.
37Hâmokicnezi ɋârerâ faharenʒoŋgopieŋ, i Mosezi wâc ʒocbâruŋ jâc dutunao fuawec irec binaŋko mufuawec. E Wofuŋte ʒiŋuc qâreŋkewec: ‘E Abraham â Isaka â Jakobo jaŋere Anutu.’
38Ine hâcne, e hâmokicne jaŋere Anutu mâcne, e ɋâricne juju jaŋere Anutu, eki maname mâmâc sasawa jujune eŋgopeneŋ ekac hâcne.”
39Jesu e iŋuc muhuc jazame miti qaqazu gâcnezi mumbiŋ, “Qaqazu, go dâŋ mutecne biaŋkekac.”
40Eme mocwâc mu esâic ecneniŋte manapie ŋemâckeme behembiŋ.
41Eme Jesuzi ʒiŋuc muhuc esâic‐jopawec: “Kristo e Dawidire ɋâric mueŋgopieŋ i weniŋucte?

Read Luka 20Luka 20
Compare Luka 20:6-41Luka 20:6-41