Luka 20:5-27

⁵Zeḡeꞌa zeḡe daꞌo neneḡaniro. “Badiꞌa mazaonoꞌo reine, 'Za nougadu Ioane ḡoere mene mae ḡihinido?' rae ifiꞌuma.

⁶U vaze mazaonoꞌo reine, vaze niduꞌa hadi hina uḡue ruiꞌuma, mazaḡa zeḡe niduꞌa Ioane aniꞌe hube hune peroveta vazeḡa rae mae ḡihiniro.”

⁷Eꞌanoꞌo ze naenaeninaꞌa, “Eme aḡuꞌa Ioane gigiꞌaꞌe noumanoꞌo meiro.”

⁸Ebu Iesuꞌa zinaꞌa, “Eḡe zuni noꞌe gigiꞌa hina haḡai ꞌahi haḡaeteꞌe mene ihoziꞌuma.”

⁹Iesuꞌa vaze mazao hari ꞌahi idaniro. “Vaze ꞌahoganiꞌa vaini mebaḡa ḡoranadu hihi azaḡa nuꞌevora tiꞌenaꞌa, ꞌahige reiro. 'Hiriviꞌeteꞌe ḡauḡa nu eꞌa meꞌuma.' Ebu aniꞌa haba ꞌahoga onamadu mada faḡa ragavinu.

¹⁰Vaini maḡa riꞌiꞌeteꞌe madaḡa reirotene, vaini maḡa nu mouga radu ani tuḡureḡa vazeḡa ꞌahoga hihi azaḡa eꞌe vaḡe tuḡune onamiro. Rehano zeꞌa bounadu ꞌevoꞌa isoḡa tuḡune baroniro.

¹¹Ani hena tuḡure vazeḡa ꞌahoga bare tuḡuniro, rehano ani zuni bouniro, mazagarone runiro zu ꞌevoꞌa isoḡa tuḡuniro.

¹²Ebu ani tuḡure vazeḡa uḡiduḡa bare tuḡuniro, rehano eꞌe vazeḡaꞌe ruharo zu uhine baroniro.

¹³Ḡonagano vaini mebaḡa vazeḡaniꞌa ꞌahige reiro. 'E nagini haḡaiꞌuma? Eḡe ubude zamarone tahiꞌaḡa tuḡuniꞌuma, giseha ze ani uꞌu gubaniꞌuma.' ꞌOugadu ani tuḡuniro.

¹⁴Rehano hihi azaḡaniꞌa horonirotene, zeḡeꞌa neneḡaniro. 'Aniꞌe vaini mebaḡa ꞌadi meꞌuma vazeḡa! 'Aro matihi, ebu vaini mebaḡa ꞌadi emeḡeꞌa meꞌuma!'

¹⁵Eꞌanoꞌo zeꞌa vaini mebaḡanonoꞌo ani uhine bunadu mau runiro. ꞌOugadu vaini mebaḡa vazeḡꞌe ze mazao nagini haḡaiꞌuma?

¹⁶Ani onaadu hihi azaḡa eꞌe mau ruziꞌuma ebu vaini mebaḡaꞌe vaze nu ziniꞌuma.” Vazeꞌa hari eꞌe igirotene, ze niro, raenaꞌa, “ꞌAhiguḡa mene fureraune manoḡa!”

¹⁷Rehano Iesuꞌa ḡiazadu zinaꞌa, “ꞌOuge rouga idaḡa, rehano Buka Zaḡoḡa zamaḡano ꞌahige mirihiroteꞌe ḡoeꞌa hugaꞌe zamaroꞌi! Vazeꞌa hadi hina ne ogorarotene, zeꞌa mene uratadu mae modiroteꞌe hadiḡaniꞌe, gauḡa boro hadiḡa raha.

¹⁸Vaze ꞌahoga hadiḡa eꞌe rana higaune, ani vahegu tahitahiꞌuma, zu hadiḡa eꞌeꞌa vaze ꞌahoga rana higaune, aniꞌe seꞌetiꞌuma.”

¹⁹Mose goro ḡoeꞌa ihozeꞌeteꞌe azaḡa zu Badiꞌa dibuꞌo hauꞌeteꞌe ḡihiꞌaḡaḡihiꞌaḡaꞌe Iesu hari idaidaḡa zeḡe veize reiroteꞌe ederirotene, zeꞌe Iesu zogone obone tihi reiro. Rehano ze mene ꞌougiro, mazaḡa vaze ḡuḡuvaḡaniꞌa ze mazao maḡuniꞌuma radu rihoziro.

²⁰Mose goro ḡoeꞌa ihozeꞌeteꞌe azaḡa zu Badiꞌa dibuꞌo hauꞌeteꞌe ḡihiꞌaḡaḡihiꞌaḡaniꞌa Iesu faine ḡianiro. Zeꞌe uꞌuru gaueꞌenaꞌa duduḡa rae ḡurireꞌeteꞌe azaḡa madu Iesu mazao tuḡuziro, mazaḡa Iesu ani ḡau nu rae veꞌonine Roma gavana vazeḡa mazao utoga reiro.

²¹Ebu ze Iesu vaḡe onamadu ḡadiniro, raenaꞌa, “Ihore vazeḡa, eme edeḡa ḡaꞌe huga daꞌo ḡoereꞌohe zu ihozeꞌohe. Ebu vaze boro zu komeꞌa idazeꞌohe, zu Badiꞌaꞌa urateꞌeteꞌe ibiḡa hugano daꞌo ihozeꞌohe.

²²Eꞌanoꞌo ꞌahi ḡadimatihi. Roma kiniḡa takesi moniḡa haune, idaḡa ga mene?”

²³Iesu ani zeꞌa ani soꞌoneꞌetaꞌaꞌe ederiro, ebu zinaꞌa,

²⁴“Roma moniḡa ihohoꞌi! Iniu viga zu iniu niḡa eꞌe rana touga?” Zeꞌa naenaeniro. “Aꞌe Roma kiniḡa viga zu niḡa.”

²⁵Ebu aniꞌa ziro. “Tena Roma kiniḡa ḡauꞌe Roma kiniḡa ane hanoꞌi, u Badiꞌa ḡauꞌe Badiꞌa ane hanoꞌi!”

²⁶Eꞌanoꞌo ze vazevaze ubumao Iesuꞌa reiroteꞌe ḡoeꞌaꞌe veꞌoga raꞌeteꞌe mene idararo. Ebu Iesuꞌa ḡadimuze naenaeniroteꞌano ze zaguzagadu sifu radiro.

²⁷Eꞌe ḡarugano Sadukea azaḡa nuꞌa Iesu vaḡe ariro. Sadukea azaḡaꞌe vazeꞌa runeonoꞌo mene bare ḡabode iḡuniꞌuma rae reiro.