LUKA 1:38-80

³⁸Maliamu kedika kalonga, “Nie na mtumigwa wa Mndewa, na nhendelwe kamba vuulongile.” Abaho, ija msenga wa Mulungu wa kuulanga kahalawa.

³⁹Kipigiti kidodo hamwande Maliamu kaisasala, hima kachola kuna ikiwambo kili muisi ya vigongovigongo ya Yudea.

⁴⁰Kengila muna ing'anda ya Zakalia, kamulamsa Elizabeti.

⁴¹Elizabeti viyahulike ndamsa ya Maliamu, chana king'hele kizumha mkudeng'ha muinda ya Elizabeti. Na Elizabeti kamemezigwa Loho wa Mulungu,

⁴²na kenula dizwi kalonga, “Kumota gweye kubanza watwanzi wose, na imwana yondaumulele kamota!

⁴³Vilihi mbuli zino ng'hulu zindawilile nie, hata mama wa Mndewa wangu yeze kumwangu?

⁴⁴Mhunde vinihulike ndamsa yako, chana king'hele muinda yangu kizumha mkudeng'ha.

⁴⁵Kumota gweye utogole kamba gaja gayalongile Mndewa kumwako golawilila!”

⁴⁶Na Maliamu kalonga, “Moyo wangu womuyenzi Mulungu.

⁴⁷Loho yangu yomdeng'helela Mulungu Mkombola wangu.

⁴⁸Kwavija kamgelegeza nyakadala wake imwende! Avo kusongela lelo wanhu wa milelo yose wong'hema yamotile,

⁴⁹mmbuli zija ng'hulu Mulungu Mkulu zayanitendele. Twaga jake ding'ala.

⁵⁰Kulawa wanhu wa mulelo umwe mbaka mulelo uyagwe kowonela bazi awo womdumba heyo.

⁵¹Kaugolosa mkono wake mkulu na kawapwililisa awo woitopela ngelegeza zao.

⁵²Kawahumulusa wandewa wali na mhiko walawe muna ivigoda vao va undewa, na kawenula iwakumbulu.

⁵³Wali nzala kawegutiza vinhu vinogile, na wagoli kawaleka wachole bila kinhu.

⁵⁴Kakigoga kilagano chayailagane na wahenga zetu, avo keza kumtaza mtumigwa wake Islaeli.

⁵⁵Kakumbukila kumonela bazi Ablahamu na ng'holo zake zose milongo yose kamba viwailagane na wahenga zetu!”

⁵⁶Maliamu kakala na Elizabeti kamba milenge midatu vino, abaho, kabwela ukae yake.

⁵⁷Kipigiti cha Elizabeti kulela kivika, kamulela mwana mbigalo.

⁵⁸Wanhu wa mmambwegambwega na walawile mulukolo lwake viwahulike mbuli zija zinogile za mkanganyo Mndewa ziyamtendele, wose wadeng'helela hamoja na heyo.

⁵⁹Zua da nane weza kumwingiza kumbi imwana, walonda kumgwaa twaga da tataake, Zakalia.

⁶⁰Mamaake kalonga, “Ndema! Twaga jake dokemigwa Yohana.”

⁶¹Wanhu wamulongela, “Ila mulukolo lwenu haduhu munhu yali na twaga hijo.”

⁶²Abaho, wamuuza tataake mkumulagusila na makono, womuuza kamba twaga dilihi doyolonda yagweleligwe mwanage.

⁶³Kawapula kibanzi cha kwandikila, kandika vino, “Twaga jake Yohana.” Wanhu wose wakanganya.

⁶⁴Baho mulomo na lulimi lwake Zakalia vifunguligwa, kasonga kulonga, kamuyenzi Mulungu.

⁶⁵Bwembwe diwengila wanhu wose wa mmambwegambwega na mbuli hizo zisimulilwa ng'ambu zose za isi ya vigongovigongo ya Yudea.

⁶⁶Wose wahulike mbuli hizo wagelegeza mmioyo yao, wolonga, “Mwana ino kowa munhu wa vilihi? Kwavija mhiko za Mndewa za hamoja na heyo.”

⁶⁷Zakalia tataake imwana kamemezwa Loho wa Mulungu, na kulonga usenga uno wa Mulungu,

⁶⁸“Yayenzigwe Mndewa, Mulungu wa Islaeli! Kwavija keza kuwataza wanhu zake na kuwakombola.

⁶⁹Katugwelela Mkombola mkulu, wa lukolo lwa mtumigwa wake Daudi,

⁷⁰kamba vija vayailagane na wahokozi zake wang'alile umwaka,

⁷¹kamba kotukombola tulawe mmakono ga wadumuka, na kulawa mmakono ga wose watwihile.

⁷²Kalonga kowonela bazi wahenga zetu na kudikumbukila lagano jake ding'alile.

⁷³Kamduilila Ablahamu tata wetu,

⁷⁴kailagana na heyo kamba kotukombola kulawa mmakono ga wadumuka, na kututenda tweye tumsang'hanile heyo bila bwembwe,

⁷⁵giladi tuwe wanhu wang'alile na tulibule uzenzeleganye haulongozi wake, mazua gose ga ugima wetu.

⁷⁶“Na gweye, mwanangu, kokwiza kukemigwa muhokozi wa Mulungu Mkulu Ng'hani. Kolongola haulongozi wa Mndewa kumtandila nzila yake,

⁷⁷kowalongela wanhu zake avija vondawakomboligwe mkusegezelwa vilozo vao.

⁷⁸Mulungu wetu kogatenda higo sama ya bazi jake kulu, na ukombola wake kulawa kuulanga wotuhumulukila kamba zua da imitondo

⁷⁹na kuwamulikila wose wokala mdiziza na awo wakala mdisisila da kudanganhika, na kugalongoza magulu getu muna inzila ya tindiwalo.”

⁸⁰Mwana ija kakula na kuwa na mhiko muloho. Kakala muluwala mbaka zua dija viyalawilile mwa wanhu wose wa Islaeli.